ନଗଡ଼ା ବୁଲି ଦେଖିଲେ ଯାଜପୁର ଜିଲ୍ଲାପାଳ ରଞ୍ଜନ ଦାସ : ଅଧପନ୍ତରିଆ ଉନ୍ନୟନ ମୂଳକ କାମକୁ ଦେଖି ବିଭାଗୀୟ ଅଧିକାରୀଙ୍କ ଉପରେ ବର୍ଷିଲେ, ତୁରନ୍ତ କାମ ସାରିବାକୁ ନିର୍ଦ୍ଦେଶ
କନକ ବ୍ୟୁରୋ : ଅପପୁଷ୍ଟି ଯୋଗୁଁ ଶିଶୁମୃତ୍ୟୁକୁ ନେଇ ଚର୍ଚ୍ଚାକୁ ଆସିଥିବା ନଗଡା ବୁଲି ଦେଖିଲେ ଯାଜପୁର ଜିଲ୍ଲାପାଳ । ଶିଶୁମୃତ୍ୟୁ ଘଟଣାକୁ ୩ବର୍ଷ ପୁରି ଚାରିବର୍ଷ ଚାଲିଥିଲେ ବି ନଗଡାର ସ୍ଥିତି ସୁଧୁରି ପାରିନାହିଁ । ରାଜ୍ୟ ରାଜକୋଷରୁ କୋଟି କୋଟି ଟଙ୍କା ଖର୍ଚ ହୋଇଥିଲେ ମଧ୍ୟ ଏପର୍ଯ୍ୟନ୍ତ ସୁଧୁରିନି ନଗଡାବାସୀଙ୍କ ଦୁଃଖ । ସବୁ ରହିଯାଇଛି ଅଧାପାନ୍ତରିଆ । କନକ ନ୍ୟୁଜରେ ନଗଡା ସ୍ଥିତି ନେଇ ଖବର ପ୍ରସାରଣ ପରେ ତତ୍ପର ହୋଇ ଉଠିଛି ଜିଲ୍ଲା ପ୍ରଶାସନ ।
Kanak News is now on WhatsApp
Join and get latest news updates delivered to you via WhatsApp
ଜିଲ୍ଲାପାଳ ରଂଜନ ଦାସଙ୍କ ନେତୃତ୍ୱରେ ଅତିରିକ୍ତ ଜିଲ୍ଲାପାଳ ମିହିର ପ୍ରସାଦ ମହାନ୍ତି, ଡିଆରସିଏ ପ୍ରକଳ୍ପ ନିର୍ଦେଶକ ମନୋଜ ବେହେରା, ଜିଲ୍ଲା ସାମାଜିକ ସୁରକ୍ଷା ଅଧିରାରୀ ନଗଡାରେ ପହଂଚି ବାସ୍ତବ ସ୍ଥିତିର ଯାଂଚ କରିଛନ୍ତି । ସରକାରୀ ଯୋଜନାର ତଦାରଖ କରି ଅଧାପନ୍ତରିଆ ପଡିଥିବା ଉନ୍ନୟନ ମୂଳକ କାମ ପାଇଁ ବିଭାଗୀୟ ଅଧିକାରୀଙ୍କ ଉପରେ ଅସନ୍ତୋଷ ପ୍ରକାଶ କରିଛନ୍ତି ଜିଲ୍ଲାପାଳ । ଏହାସହ ତୁରନ୍ତ ଏହି କାର୍ଯ୍ୟକୁ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି ।
ନଗଡାରୁ ଫେରିବା ପରେ ସୁକିନ୍ଦା ବ୍ଲକ କାର୍ଯ୍ୟାଳୟରେ ଜିଲ୍ଲାର ସମସ୍ତ ପ୍ରଶାସନିକ ଅଧିକାରୀଙ୍କୁ ନେଇ ଏକ ସମିକ୍ଷା ବୈଠକ କରିଥିଲେ ଜିଲ୍ଲାପାଳ । ବୈଠକରେ ନଗଡାବାସୀଙ୍କ ଆର୍ଥିକ ବିକାଶ ପାଇଁ କୁକୁଡା, ମହୁ, ଧାନ , ମକା, ବିଭିନ୍ନ ପନିପରିବା ଚାଷ ପ୍ରତି ଅଧିକ ଗୁରୁତ୍ୱ ଦେବା ପାଇଁ ଓଡିଶା ମିଶନ ଶକ୍ତିକୁ ନିର୍ଦ୍ଦେଶ ଦେଇଛନ୍ତି । ଏହାଛଡା ନଗଡାରେ ପକ୍କାଘର ପାଇନଥିବା ହିତାଧିକାରୀଙ୍କୁ ତୁରନ୍ତ ପକ୍କାଘର ଯୋଗାଇ ଦେବା ସହ ଆସନ୍ତା ଜୁଲାଇ ୧୫ତାରିଖ ସୁଧା ପୁରା ନଗଡାରେ ଆଲୋକିକରଣ କରିବା ପାଇଁ ବିଦ୍ୟୁତ ବିଭାଗକୁ ନିର୍ଦ୍ଦେଶ ଦେଇଛନ୍ତି ।