ଚଢ଼ା ଦରରେ ବିକ୍ରି ହେଉଛି ଚାଉଳ, ହେଲେ ଧାନର ଅଭାବୀ ବିକ୍ରି ! ‘ବାସୁମତୀ’କୁ ନେଇ ଚାଷୀଙ୍କ ଅଭିଯୋଗ, କହିଲେ ବିକ୍ରି ହେଉନି ଧାନ, ମିଳୁନି ଉଚିତ୍ ମୂଲ୍ୟ ।
କନକ ବ୍ୟୁରୋ : ପର୍ବ-ପର୍ବାଣୀରୁ ଆରମ୍ଭ କରି ପୂଜାପାଠ, ସବୁଠି ବାସୁମତି ଚାଉଳର ଚାହିଦା । ଚାଉଳର ବାସ୍ନା ଯେମିତି, ସ୍ୱାଦ ବି ସେମିତି । ସେଇଥି ପାଇଁ ତ’ ବାସୁବତୀ ଚାଉଳର ଦାମ କିଲୋ ପିଛା ୬୦ରୁ ୧୦୦ ଟଙ୍କା । ଆପଣ ଭାବୁଥିବେ ବାସୁମତୀ ଧାନ କରୁଥିବା ଚାଷୀ, ବେଶ ଲାଭ ପାଉଥିବେ । ଯଦି ଆପଣ ଯାଜପୁର ଜିଲ୍ଲାର ଚାଷୀଙ୍କ କାହାଣୀ ଜାଣିବେ, ହୁଏତ ଆପଣଙ୍କ ଧାରଣା ବି ବଦଳି ଯିବ । ବାସୁବତୀ ଧାନ ଚାଷ କରି ବି ଅଭାବ ଅନଟନରେ ଚଳୁଛନ୍ତି ଚାଷୀ । କାରଣ ବାସୁବତୀ ଧାନ ବି ଅଭାବି ବିକ୍ରି ହେଉଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଧାନରୁ ଚାଉଳ, ଆଉ ସେଇ ଚାଉଳ ଚକଚକିଆ ପକେଟରେ ଭର୍ତି ହୋଇ ବଡ ବଡ ଦୋକାନ କିମ୍ବା ମଲକୁ ପହଂଚି ଗଲେ ବଦଳି ଯାଉଛି, ବାସୁମତୀ ଚାଉଳର ଦର । କିଲୋ ପିଛା ଶହେରୁ ଅଧିକ ଟଙ୍କା ଦେଇ ବାସୁମତୀ ଚାଉଳ କିଣି ନେଉଛନ୍ତି ଲୋକେ । ହେଲେ ଏହି ଧାନ ଉତ୍ପାଦନ କରୁଥିବା ଚାଷୀଙ୍କ ହାତକୁ ଯାଉଛି କ’ଣ ?
ଯାଜପୁରରୁ ଆସିଛି ‘ବାସୁମତୀ’ର କାହାଣୀ । ହରଡ଼ଘଣାରେ ବଡ଼ଚଣାର ଧାନ ଚାଷୀ । ବଡ଼ଚଣା ବ୍ଲକ୍ ଡଗରପଡ଼ା ଗାଁରୁ ଆସିଛି ବାସୁମତୀ ଧାନର ଅଭାବି ବିକ୍ରିର କାହାଣୀ । ମଣ୍ଡିରେ ଏହି ବାସୁମତୀ ଧାନକୁ ନେଉନଥିବା ଅଭିଯୋଗ ହେଉଥିବା ବେଳେ ବାଧ୍ୟ ହୋଇ ଚାଷୀ କମ୍ ଦାମରେ ଧାନ ବିକ୍ରି କରିଦେଉଛନ୍ତି । ଫଳରେ ପରିଶ୍ରମର ମୂଲ୍ୟ ମିଳୁନଥିବା ଅଭିଯୋଗ ହୋଇଛି ।
ପ୍ରାୟ ୪୦ବର୍ଷ ହେଲାଣି ଗାଁର ୧୭୦ ପରିବାର ବାସୁମତୀ ଧାନ ଚାଷ କରି ଆସୁଛନ୍ତି । ଦିନକୁ ଦିନ ଖର୍ଚ୍ଚ ବଢ଼ୁଥିବା ବେଳେ ଅନ୍ୟପଟେ ଅମଳର ପରିମାଣ କମିବାରେ ଲାଗିଛି । ଏଭଳି ସ୍ଥିତିରେ ପୁଣି ବାସୁମତୀ ଭଳି ଧାନର ଉଚିତ ମୁଲ୍ୟ ମିଳିବା ଚାଷୀଙ୍କୁ ବ୍ୟଥିତ କରିଛି । ଯେଉଁ ଧାନ କରି ଚାଷୀ ଗୁଜୁରାଣ ମେଂଟାଇବାକୁ ବି ସମର୍ଥ ହେଉ ନାହାନ୍ତି, ସେହି ଧାନରୁ ହେଉଥିବା ଚାଉଳ ବଜାରରେ ଚଢ଼ା ଦରରେ ବିକ୍ରି ହେଉଛି । ହେଲେ ଏସବୁ ଭିତରେ କିନ୍ତୁ ଚାଷୀଙ୍କ ହାତ ଖାଲି ।