ଖଣି ଜରିମାନା ୧୯୫୦୦କୋଟି ! ସୁପ୍ରିମକୋର୍ଟଙ୍କ ରାୟ ପରେ ଜରିମାନା ଆଦାୟ ନେଇ ହିସାବ ନିକାଶ କଲେ ସରକାର
କନକ ବ୍ୟୁରୋ : ସୁପ୍ରିମ କୋର୍ଟଙ୍କ ରାୟ ପରେ ବେଆଇନ ଖଣିଜପଦାର୍ଥ ଉତ୍ତୋଳନ ବାବଦରେ ଖଣି ମାଲିକମାନଙ୍କ ଉପରେ କେତେ ଜରିମାନା ପଡ଼ିବ ସେ ନେଇ ଆଜି ପ୍ରାଥମିକ ସୂଚନା ଦେଇଛନ୍ତି ସରକାର । କେନ୍ଦ୍ରୀୟ କ୍ଷମତାସଂପନ୍ନ କମିଟି ବା ସିଇସି ପରିବେଶ ଉଲ୍ଲଂଘନ ବାବଦରେ ଖଣିମାଲିକମାନଙ୍କ ଉପରେ ପ୍ରାୟ ୧୭ ହଜାର ୫୦୦ କୋଟି ଟଙ୍କା ଜରିମାନା ଧାର୍ଯ୍ୟ କରିଥିବା ବେଳେ ତାହାକୁ ମାନି ନେଇଛନ୍ତି ସୁପ୍ରିିମକୋର୍ଟ । ସେହି ଆଧାରରେ ପ୍ରଥମେ ଖଣି ମାଲିକମାନଙ୍କୁ ଦଶ ଦିନ ମଧ୍ୟରେ ଜୋରିମାନା ଦେବାକୁ ନୋଟିସ୍ ଜାରି କରାଯିବ ।
Kanak News is now on WhatsApp
Join and get latest news updates delivered to you via WhatsApp
ଏହାବାଦ୍ ସୁପ୍ରିମକୋର୍ଟଙ୍କ ନିର୍ଦ୍ଦେଶ ମୂତାବକ ମାଇନିଂ ପ୍ଲାନ୍ ଓ କନ୍ସେଂଟ୍ ଟୁ ଅପରେଟର ଆଇନ ଉଲ୍ଲଂଘନ କରିଥିବା ଖଣି ମାଲିକମାନଙ୍କ ଉପରେ ପ୍ରାୟ ୨ ହଜାର କୋଟି ଟଙ୍କା ଜରିମାନା କରାଯିବ । ଜଙ୍ଗଲ ଆଇନର ଉଲ୍ଲଂଘନ ବାବଦରେ କେତେ ଜରିମାନା ହେବ ସେ ନେଇ ହିସାବ ଚାଲିଥିବା ମୁଖ୍ୟସଚିବ ସୂଚନା ଦେଇଛନ୍ତି । ଡିସେମ୍ବର ୩୧ ତାରିଖ ସୁଦ୍ଧା ସମସ୍ତ ଜରିମାନା ଆଦାୟ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ଜରିମାନା ନଦେଲେ ଖଣିଗୁଡ଼ିକୁ ବନ୍ଦ କରିଦିଆଯିବ । ଆଜି ଉଚ୍ଚସ୍ତରୀୟ ଅଧିକାରୀ ଓ ଆଡଭୋକେଟ୍ ଜେନେରାଲଙ୍କ ସହ ଆଲୋଚନା କରିବା ପରେ ଏଭଳି ସୂଚନା ଦେଇଛନ୍ତି ମୁଖ୍ୟସଚିବ ।