ଦିନକ ପରେ ଆରମ୍ଭ ହେବ କ୍ରିକେଟର ମହାପର୍ବ । ବିଶ୍ୱର ଶ୍ରେଷ୍ଠ ୧୦ଟି ଦେଶ ମଧ୍ୟରେ ହେବ ବଡ ଲଢେଇ । କିଏ ଜିତିବ ଦ୍ୱାଦଶ ସଂସ୍କରଣ ବିଶ୍ୱକପ୍ ଟ୍ରଫି ?
କନକ ବ୍ୟୁରୋ : ଆରମ୍ଭ ହୋଇସାରିଛି କ୍ରିକେଟ୍ ବିଶ୍ୱକପ୍ କାଉଣ୍ଟଡାଉନ୍ । ଆଉ ମାତ୍ର କେଇ ଘଣ୍ଟାର ଅପେକ୍ଷା । ଦିନକ ପରେ ଅର୍ଥାତ ଆସନ୍ତା ମେ’ ମାସ ୩୦ ତାରିଖରୁ ଆରମ୍ଭ ହେବାକୁ ଯାଉଛି କ୍ରିକେଟ୍ ବିଶ୍ୱକପ୍ ଲଢେଇ । ଇଂଲଣ୍ଡ ଏବଂ ୱେଲସ ଠାରେ ମେ ୩୦ ତାରିଖରୁ ଜୁଲାଇ ୧୪ ତାରିଖ ପର୍ଯ୍ୟନ୍ତ ଏହି କ୍ରିକେଟ୍ ମହାକୁମ୍ଭ ଚାଲିବ । ବିଶ୍ୱର ଶ୍ରେଷ୍ଠ ୧୦ଟି ଦେଶ ମଧ୍ୟରେ ହେବ କଡା ଟକ୍କର । ଆଇସିସି କ୍ରିକେଟ୍ ବିଶ୍ୱକପର ଦ୍ୱାଦଶ ସଂସ୍କରଣର ଟ୍ରଫି ହାତେଇବା ପାଇଁ ଚାଲିଛି ଜୋରଦାର ପ୍ରସ୍ତୁତି ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱକପ୍ ପାଇଁ ସମସ୍ତ ପ୍ରସ୍ତୁତି ପାଖାପାଖି ଶେଷ ହୋଇଥିବା ବେଳେ, ଟ୍ରଫି ହାତେଇବା ପାଇଁ ଜୋରଦାର କସରତ କରୁଛନ୍ତି ସମସ୍ତ ଦଳ । ବିଶ୍ୱକପ୍ ପୂର୍ବରୁ ଖେଳାଯାଉଛି ଅଭ୍ୟାସ ମ୍ୟାଚ୍ । ତେବେ ଚଳିତ ବିଶ୍ୱକପରେ ଭାରତର ଅଭିଯାନ ଆସନ୍ତା ଜୁନ୍ ମାସ ୫ ତାରିଖରୁ ଆରମ୍ଭ ହେବାକୁ ଯାଉଛି । ବିଶ୍ୱକପ ୨୦୧୯ର ନିଜ ପ୍ରଥମ ମ୍ୟାଚରେ ଦକ୍ଷିଣ-ଆଫ୍ରିକାକୁ ଭେଟିବ ଟିମ୍ ଇଣ୍ଡିଆ । ଆଉ ଏହାରି ଭିତରେ ସମସ୍ତଙ୍କ ନଜର ରହିଛି ଆସନ୍ତା ଜୁନ୍ ମାସ ୧୬ ତାରିଖକୁ । କାରଣ ଏହି ଦିନ ବିଶ୍ୱ ଦେଖିବ କ୍ରିକେଟର ସବୁଠାରୁ ବଡ ଲଢେଇ । ଯେତେବେଳେ ମୁହାଁମୁହିଁ ହେବେ ବିଶ୍ୱର ଦୁଇ ପାରମ୍ପରିକ ପ୍ରତିଦ୍ୱନ୍ଦୀ ଦଳ ଭାରତ ଏବଂ ପାକିସ୍ତାନ ।
ବିଶ୍ୱକପର ଆରମ୍ଭକୁ ଆଉ ମାତ୍ର ଗୋଟିଏ ଦିନ ବାକି ରହିଥିବା ବେଳେ କ୍ରୀଡାପ୍ରେମୀଙ୍କ ମଧ୍ୟରେ ଉତ୍କଣ୍ଠା ବଢି ବଢିଚାଲିଛି । ତେବେ ଆସନ୍ତୁ ନଜର ପକାଇବା ବିଶ୍ୱକପ କ୍ରିକେଟର ଇତିହାସ ଉପରେ ।
କ୍ରିକେଟ୍ ବିଶ୍ୱକପର ଆରମ୍ଭ ୧୯୭୫ରେ ହୋଇଥିଲା । ଏପର୍ଯ୍ୟନ୍ତ ବିଶ୍ୱକପର ୧୧ଟି ସଂସ୍କରଣ ଖେଳାଯାଇଥିବା ବେଳେ ଅଷ୍ଟ୍ରେଲିଆ କ୍ରିକେଟ୍ ଦଳ ସର୍ବାଧିକ ୫ ଥର ବିଶ୍ୱକପ ଜିତିଛି । ଅଷ୍ଟ୍ରେଲିଆ ପରେ ଭାରତ ଏବଂ ୱେଷ୍ଟଇଣ୍ଡିଜ ୨-୨ ଥର, ଶ୍ରୀଲଙ୍କା ଏବଂ ପାକିସ୍ତାନ ୧-୧ ଥର ବିଶ୍ୱକପ ନିଜ ନାମରେ କରିଛନ୍ତି । ଆସନ୍ତୁ ନଜର ପକାଇବା ୧୯୭୫ରୁ ନେଇ ଆଜି ପର୍ଯ୍ୟନ୍ତ କ୍ରିକେଟ୍ ବିଶ୍ୱକପର ଫଳାଫଳ ଉପରେ ।
୧୯୭୫ – ୱେଷ୍ଟଇଣ୍ଡିଜ (ଚାମ୍ପିୟନ), ଅଷ୍ଟ୍ରେଲିଆ (ରନର୍ସଅପ୍)
୧୯୭୯ – ୱେଷ୍ଟଇଣ୍ଡିଜ (ଚାମ୍ପିୟନ), ଇଂଲଣ୍ଡ (ରନର୍ସଅପ୍)
୧୯୮୩ – ଭାରତ (ଚାମ୍ପିୟନ), ୱେଷ୍ଟଇଣ୍ଡିଜ (ରନର୍ସଅପ୍)
୧୯୮୭ – ଅଷ୍ଟ୍ରେଲିଆ (ଚାମ୍ପିୟନ), ଇଂଲଣ୍ଡ (ରନର୍ସଅପ୍)
୧୯୯୨ – ପାକିସ୍ତାନ (ଚାମ୍ପିୟନ), ଇଂଲଣ୍ଡ (ରନର୍ସଅପ୍)
୧୯୯୬ – ଶ୍ରୀଲଙ୍କା (ଚାମ୍ପିୟନ), ଅଷ୍ଟ୍ରେଲିଆ (ରନର୍ସଅପ୍)
୧୯୯୯ – ଅଷ୍ଟ୍ରେଲିଆ (ଚାମ୍ପିୟନ), ପାକିସ୍ତାନ (ରନର୍ସଅପ୍)
୨୦୦୩ – ଅଷ୍ଟ୍ରେଲିଆ (ଚାମ୍ପିୟନ), ଭାରତ (ରନର୍ସଅପ୍)
୨୦୦୭ – ଅଷ୍ଟ୍ରେଲିଆ (ଚାମ୍ପିୟନ), ଶ୍ରୀଲଙ୍କା (ରନର୍ସଅପ୍)
୨୦୧୧ – ଭାରତ (ଚାମ୍ପିୟନ), ଶ୍ରୀଲଙ୍କା (ରନର୍ସଅପ୍)
୨୦୧୫ – ଅଷ୍ଟ୍ରେଲିଆ (ଚାମ୍ପିୟନ), ନ୍ୟୁଜିଲାଣ୍ଡ (ରନର୍ସଅପ୍)