କନକ ବ୍ୟୁରୋ: କୋଣାର୍କର ଗୋପ ବ୍ଲକ ତେସ୍ତଲି ପଂଚାୟତ ପିଙ୍ଗଳ ଗାଁରେ ବାଣ ବିସ୍ଫୋରଣ ଘଟିଛି । ଏଥିରେ ଜଣେ ପ୍ରାଣ ହରାଇଥିବାବେଳେ ଅନ୍ୟ ଜଣେ ଗୁରୁତର ହୋଇଛି । ଛାତ ଉପରେ ବାଣ ଭିଡୁଥିବା ବେଳେ ଏହି ବିସ୍ଫୋରଣ ହୋଇଛି । ଏହି ସମୟରେ ବାପ ପୁଅ ବାଣ ଭିଡୁଥିଲେ । ଘଟଣାସ୍ଥଳରେ ବାପ ରଞ୍ଜିତ ବିଶ୍ୱାଳ ପ୍ରାଣ ହରାଇଥଇବାବେଳେ ପୁଅ ବାପି ବିଶ୍ୱାଳ ଗୁରୁତର ହୋଇଛନ୍ତି ।

ମିଳିଥିବା ସୂଚନା ଅନୁଯାୟୀ, ପିଙ୍ଗଳ ଗ୍ରାମର ରଞ୍ଜିତ ବିଶ୍ୱାଳ( ୫୮ ବର୍ଷ) ଓ ତାଙ୍କ ପୁଅ ବାପି ବିଶ୍ୱାଳ(୨୫ ବର୍ଷ) ଆଜି ସକାଳ ୮ଟା ବେଳେ ନିଜ ଦୋମହଲା ଘରର ଛାତ ଉପରେ ବାଣ ଭିଡୁଥିବା ବେଳେ ଅଚାନକ୍ ଏକ ହାତବୋମା ବିସ୍ଫୋରଣ ଘଟିଥିଲା। ବିସ୍ପୋରଣ ଏତେ ତୀବ୍ର ଥିଲାରେ ଯେ ଉଭୟ ରଞ୍ଜିତ ଓ ବାପି ଗୁରୁତର ଭାବେ ଆହତ ହୋଇଥିଲେ।

ବାପିଙ୍କର ଡାହାଣ ହାତ ଛିଡ଼ି ଯାଇଥିବା ବେଳେ ଦେହର ମାଂସ ଖଣ୍ଡ ଛାତ ଉପରେ ଓ ଗାଁ ଦାଣ୍ଡରେ ଖଣ୍ଡ ଖଣ୍ଡ ହୋଇ ପଡ଼ିଥିଲା। ଉଭୟଙ୍କୁ ଗୁରୁତର ଅବସ୍ଥାରେ ଚାରିଛକ ଡାକ୍ତରଖାନାକୁ ନିଆଯାଇଥିଲା। ସେଠାରେ ରଞ୍ଜିତଙ୍କୁ ଡାକ୍ତର ମୃତ ଘୋଷଣା କରିଥିଲେ। ଗୁରୁତର ଅବସ୍ଥାରେ ବାପିଙ୍କୁ ସେଠାରୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି।