ରାତି ଅଧରେ ରାଜଧାନୀରେ ଫୁଟିଲା ଗୁଳି ! କାର ଆରୋହୀଙ୍କ ପିଠିରେ ବାଜିଛି ଗୁଳି, ଚିକିତ୍ସା ପାଇଁ କ୍ୟାପିଟାଲ ମେଡିକାଲରେ ଭର୍ତି
ରାତି ଅଧରେ ରାଜଧାନୀରେ ଫୁଟିଲା ଗୁଳି
କନକ ବ୍ୟୁରୋ : ଦୀର୍ଘ ଦିନର ନିରବତା ପରେ ରାଜଧାନୀରେ ପୁଣି ଗର୍ଜିଛି ବନ୍ଧୁକ। ସୋମବାର ବିଳମ୍ବିତ ରାତିରେ ବମିଖାଲ ଦୁର୍ଗାମଣ୍ଡପ ନିକଟରେ ଏକ କାର୍ ଉପରକୁ ଅତର୍କିତ ଗୁଳିମାଡ଼ ହୋଇଛି। ରାତି ପ୍ରାୟ ୧ଟା ବେଳେ ଏହି ବାଟ ଦେଇ ୨ଜଣ ଯୁବକ କାରରେ ଯାଉଥିବା ବେଳେ ଅଚାନକ ସେମାନଙ୍କ କାର୍ ଉପରକୁ ଗୁଳିବର୍ଷା ହୋଇଥିଲା। ଏଥିରେ ଜଣେ କାର୍ ଆରୋହୀଙ୍କ ପିଠିରେ ଗୁଳି ବାଜିଛି। ତେବେ ଭୟରେ ସେମାନେ କାର୍ ଅଟକାଇ ଦେବାରୁ ଦୁର୍ବୃତ୍ତମାନେ କାର ଭଙ୍ଗାରୁଜା କରିବା ସହ ଧାରୁଆ ଅସ୍ତ୍ରରେ ସେମାନଙ୍କୁ ଆକ୍ରମଣ କରିଥିଲେ।
Kanak News is now on WhatsApp
Join and get latest news updates delivered to you via WhatsApp
ଖବର ପାଇ ଲକ୍ଷ୍ମୀସାଗର ଥାନା ପୁଲିସ ଆହତଦ୍ୱୟଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଇଛି। ସେମାନଙ୍କ ମଧ୍ୟରୁ ପିଠିରେ ଗୁଳି ବାଜିଥିବା ଯୁବକଙ୍କ ଅବସ୍ଥା ସଂକଟାପନ୍ନ ରହିଥିବା ଜଣାଯାଇଛି। ସେହିପରି ଅନ୍ୟ ଯୁବକଙ୍କ ଶରୀରର ବିଭିନ୍ନ ସ୍ଥାନରେ ଛୁରାମାଡ଼ ଜନିତ କ୍ଷତ ସୃଷ୍ଟି ହୋଇଛି। ପୂର୍ବ ଶତ୍ରୁତା ନା ଲୁଟପାଟ ଉଦ୍ଦେଶ୍ୟରେ ଏହି ଆପରାଧିକ ଘଟଣା ଘଟିଛି, ରିପୋର୍ଟ ଲେଖା ହେବା ବେଳକୁ ତାହା ସ୍ପଷ୍ଟ ହୋଇପାରିନଥିଲା।