ନିରବ ମୋଦି, ମେହୁଲ ଚୋକସିଙ୍କ ବିଭିନ୍ନ କମ୍ପାନି ଉପରେ ଇଡି ଓ ଆଇଟି ରେଡ ଜାରି : ପୁଣି ୧୪୫ କୋଟି ଫ୍ରିଜ କଲା ଆୟକର ବିଭାଗ
କନକ ବ୍ୟୁରୋ : ପିଏନବି ମହାଦୁର୍ନୀତି ମାମଲାରେ ନିରବ ମୋଦି ଗ୍ରୁପର ବିଭିନ୍ନ କମ୍ପାନି ଶାଖାରେ ଲଗାତର ସପ୍ତମ ଦିନ ପାଇଁ ପ୍ରବର୍ତନ ନିର୍ଦ୍ଦେଶାଳୟର ରେଡ । ସେପଟେ ପୁଣି ୧୪୫ କୋଟି ଟଙ୍କାର ସଂପତି ଫ୍ରିଜ କଲା ଆୟକର ବିଭାଗ । ଗତକାଲି ୧୭ଟି ସ୍ଥାନରେ ଛାପା ମାରିଛି ପ୍ରବର୍ତ୍ତନ ନିର୍ଦ୍ଦେଶାଳୟ ବା ଇଡି । ନିରବ ମୋଦି ଗ୍ରୁପ ଓ ମେହୁଲ ଚୋକସିଙ୍କ ଗୀତାଞ୍ଜଳି ଜେମ୍ସର ବିଭିନ୍ନ ସେଲ କମ୍ପାନିରେ ଚଢାଉ କରିବା ସହ ୧୦ କୋଟି ଟଙ୍କାର ସଂପତି ସିଲ କରିଛି । ସେହିପରି ଆୟକର ବିଭାଗ ମଧ୍ୟ ନିରବ ମୋଦି କମ୍ପାନିର ବିଭିନ୍ନ ଷ୍ଟୋର, ସୋରୁମ ଓ କମ୍ପାନି ଶାଖାରେ ଚଢାଉ କରି ଗତକାଲି ୧୪୫ କୋଟି ୭୪ ଲକ୍ଷ ଟଙ୍କାର ସଂପତି ସିଜ କରିଛି । ପ୍ରାୟ ୧୧ ହଜାର ୪ଶହ କୋଟି ଟଙ୍କାର ଦୁର୍ନୀତି କରିଥିବା ନିରବ ମୋଦିଙ୍କର ଏପର୍ଯ୍ୟନ୍ତ ୫ହଜାର ୭ଶହ ୩୬ କୋଟି ଟଙ୍କାର ସଂପତି ଜବତ କଲେଣି ଇଡି ଓ ଆୟକର ବିଭାଗ । ଏଗୁଡିକ ଭିତରେ ଅଧିକାଂଶ ହୀରା, ସୁନା ଗହଣା ଓ ମୂଲ୍ୟବାନ ରତ୍ନ ପଥର ରହିଛି । ଉଭୟ ଇଡି ଓ ଆୟକର ବିଭାଗ ନଜରରେ ରହିଛି ନିରବ ମୋଦି ଗ୍ରୁପ ଓ ଗୀତାଞ୍ଜଳି ଜେମ୍ସର ୨ଶହ ସେଲ ଫାର୍ମ ଓ ବେନାମୀ ସଂପତି । ଇଡି ମଧ୍ୟ ନିରବ ମୋଦି ଓ ମେହୁଲ ଚୋକସିଙ୍କୁ ଏହି ସପ୍ତାହରେ ପ୍ରତ୍ୟକ୍ଷ ଭାବେ ହାଜର ହେବା ପାଇଁ ସମନ କରିଛି ।
Kanak News is now on WhatsApp
Join and get latest news updates delivered to you via WhatsApp
ନିରବ ମୋଦି ୧୧ ହଜାର ୪ଶହ କୋଟି ନେଇ ଫେରାର ହୋଇଯିବା ପରେ ପିଏନବି ମାନେ ପଞ୍ଜାବ ନ୍ୟାସନାଲ ବ୍ୟାଙ୍କରୁ ଋଣ ବାବଦରେ ସାରା ଦେଶରେ ଚର୍ଚ୍ଚା ହେଉଛି । ଜାଲ ଲେଟର ଅଫ ଅଣ୍ଡରଷ୍ଟାଣ୍ଡିଙ୍ଗ କରି ସେ ବିଦେଶରେ ଥିବା ବ୍ୟାଙ୍କରୁ ମଧ୍ୟ ଟଙ୍କା ଠକିଥିଲା । ପିଏନବି ମହାଦୁର୍ନୀତର ଏହି ଚର୍ଚ୍ଚା ଭିତରେ ଜାତୀୟ ଗଣମାଧ୍ୟମରେ ଆଉଏକ ପ୍ରସଙ୍ଗକୁ ନେଇ ବି ଜୋରଦାର ଚର୍ଚ୍ଚା ଆରମ୍ଭ ହୋଇଛି ଯେ କିଭଳି ପିଏନବିରୁ ମାତ୍ର ୫ହଜାର ଟଙ୍କା ଋଣ ନେଇ ଶୁଝିଦେଇଥିଲେ ଲାଲ ବାହାଦୁର ଶାସ୍ତ୍ରୀ । ନିରବ ମୋଦି ଟଙ୍କା ଫେରାଇବ ନାହିଁ ବୋଲି ଚିଠି ଲେଖି ସ୍ପଷ୍ଟ କରିସାରିଛି । ଆଉ ୧୯୬୫ରେ ତତକାଳୀନ ପ୍ରଧାନମନ୍ତ୍ରୀ ଲାଲ ବାହାଦୁର ଶାସ୍ତ୍ରୀ ନେଇଥିବା ୫ ହଜାର ଟଙ୍କାର ଲୋନ ତାଙ୍କ ମୃତ୍ୟୁ ପରେ ବି ସୁଝିଥିଲେ ପରିବାର । ଅତି ସାଦାସିଧା ଜୀବନ ବିତାଇବାକୁ ପସନ୍ଦ କରୁଥିବା ଲାଲ ବାହାଦୁର ଶାସ୍ତ୍ରୀ ନିଜ ପରିବାର ଲୋକଙ୍କୁ ନେବାଆଣିବା ପାଇଁ ସରକାରୀ ଗାଡିର ବ୍ୟବହାର କରୁନଥିଲେ ।
ତେଣୁ ସେତେବେଳେ ନିଜସ୍ୱ ଏକ ଫିଆଟ କାର କିଣିବାକୁ ପିଏନବିରୁ ୫ ହଜାର ଟଙ୍କା ଲୋନ କରିଥିଲେ । ସେତେବେଳେ କାରଟିର ଦାମ ଥିଲା ୧୨ ହଜାର ଟଙ୍କା । ହେଲେ ତାଙ୍କ ବ୍ୟାଙ୍କ ଆକାଉଂଟରେ ଥିବା ୭ ହଜାର ଟଙ୍କ।। ତେଣୁ ବାକି ୫ ହଜାର ଟଙ୍କା ସେ ଲୋନ ଆକାରରେ ପଞ୍ଜାବ ନ୍ୟାସନାଲ ବ୍ୟାଙ୍କରୁ ଆଣିଥିଲେ । ହେଲେ ଋଣ ଶୁଝିବା ପୂର୍ବରୁ ତାସକେଂଟ ଚୁକ୍ତି ସମୟରେ ଶାସ୍ତ୍ରୀଜୀଙ୍କ ଆକସ୍ମିକ ମୃତ୍ୟୁ ହୋଇଥିଲା । ଆଉ ଲୋନ ଶୁଝିବା ପାଇଁ ବ୍ୟାଙ୍କ ତାଙ୍କ ପତ୍ନୀ ଲଳିଚା ଶାସ୍ତ୍ରୀଙ୍କୁ ନୋଟିସ ପଠାଇଲା । ପରେ ଲାଲ ବାହାଦୁର ଶାସ୍ତ୍ରୀଙ୍କ ପତ୍ନୀ ପେନସନ ଟଙ୍କାରୁ କିସ୍ତିରେ ଏହି ଋଣ ପରିଷୋଧ କରିଥିଲେ । ଏବେ ବି ଡିଇଏଲ-ସିକ୍ସ ନମ୍ବର, ୧୯୬୪ ମଡେଲର ଫିଆଟ କାର ଦିଲ୍ଲୀ ଲାଲ ବାହାଦୁର ଶାସ୍ତ୍ରୀ ମମୋରିଆଲରେ ଥୁଆ ହୋଇଛି । ଆଉ ଯେତେବେଳେ ୧୧ ହଜାର କୋଟିର ଋଣ ନେଇ ନିରବ ମୋଦି ଫେରାଇବେ ନାହିଁ ବୋଲି କହୁଛନ୍ତି, ସେତିକିବେଳେ ଲାଲ ବାହାଦୁର ଶାସ୍ତ୍ରୀଙ୍କ ଏହି ୫ହଜାର ଟଙ୍କାର ଋଣ ଓ ମୃତ୍ୟୁ ପରେ ବି ପରିବାର ଗୋଟିଏ ଗୋଟିଏ ପଇସା ଶୁଝିବା ସାଧାରଣରେ ଚର୍ଚ୍ଚା ସୃଷ୍ଟି କରିଛି ।