ଦାଉଦ ଇବ୍ରାହିମ ଫେରିବ ! କେନ୍ଦ୍ର ସରକାର-ଦାଉଦ ମଧ୍ୟରେ ଆଲୋଚନା ଜାରି
କନକ ବ୍ୟୁରୋ: ମୁମ୍ବାଇ ବିସ୍ଫୋରଣର ମାଷ୍ଟରମାଇଣ୍ଡ ତଥା ମାଫିଆ ଡନ ଦାଉଦ ଇବ୍ରାହିମ ଭାରତ ଫେରିବାକୁ ଆଗ୍ରହୀ । ସେ ନିଜ ଶେଷ ଜୀବନ ଜନ୍ମଭୂମିରେ ବିତାଇବାକୁ ଚାହୁଁଛି । ଏନେଇ କେନ୍ଦ୍ର ସରକାରଙ୍କ ସହ ସେ ଆଲୋଚନା ଚଳାଇଛି । କିନ୍ତୁ ଦାଉଦକୁ ଭାରତ ଫେରାଇଆଣିଥିବା ବାହାବା ନେଇ ଆସନ୍ତା ସାଧାରଣ ନିର୍ବାଚନରେ ଫାଇଦା ଉଠାଇବାକୁ ବିଜେପିର ଲକ୍ଷ୍ୟ ରହିଛି ବୋଲି ଆଜି କହିଛନ୍ତି ମହାରାଷ୍ଟ୍ର ନବନିର୍ମାଣ ସେନାର ମୁଖ୍ୟ ରାଜ ଥାକରେ ।
Kanak News is now on WhatsApp
Join and get latest news updates delivered to you via WhatsApp
ଏଠାରେ ଏକ କାର୍ଯ୍ୟକ୍ରମରେ ଉଦବୋଧନ ଦେଇ ଥାକରେ କହିଲେ ଯେ, ଦାଉଦ ଏବେ ରୋଗଗ୍ରସ୍ତ ରହି ଦୁର୍ବଳ ହୋଇପଡ଼ିଛି । ଭାରତକୁ ଫେରି ଆତ୍ମୀୟସ୍ୱଜନଙ୍କ ମଧ୍ୟରେ ଶେଷ ଜୀବନ ବିତାଇବା ତା ଅନ୍ତିମ ଲକ୍ଷ୍ୟ । ଏଥିପାଇଁ ସେ କେନ୍ଦ୍ର ସରକାରଙ୍କ ସହ ଯୋଗାଯୋଗ ସ୍ଥାପନ କରିଛି । ଉଭୟ ପକ୍ଷ ମଧ୍ୟରେ ଏନେଇ ଆଲୋଚନା ଜାରି ରହିଛି । ତେବେ ଆଗାମୀ ସାଧାରଣ ନିର୍ବାଚନ ପୂର୍ବରୁ ଦାଉଦକୁ ଭାରତ ଆଣିବାକୁ ମୋଦି ସରକାରର ଯୋଜନା ରହିଛି । ଦାଉଦ ନିଜେ ଭାରତ ଆସିବାକୁ ଆଗ୍ରହ ପ୍ରକାଶ କରିଥିବାବେଳେ ତାକୁ ଭାରତକୁ ଆଣିଥିବା ପ୍ରଚାର କରି ଏଥିରୁ ନିର୍ବାଚନୀ ଫାଇଦା ଉଠାଇବାକୁ ବିଜେପି ଚାହୁଁଛି ବୋଲି ସେ କହିଥିଲେ ।
ରାଜ ଥାକରେଙ୍କ ଏହି ତଥ୍ୟର ସତ୍ୟତା ଜଣାପଡ଼ିନଥିଲେ ମଧ୍ୟ ଗତ ସପ୍ତାହରେ କେନ୍ଦ୍ର ବିଦେଶ ରାଷ୍ଟ୍ରମନ୍ତ୍ରୀ ଭିକେ ସିଂହ କେରଳ ଗସ୍ତରେ ଥିବାବେଳେ ରହସ୍ୟଜନକ ସଙ୍କେତ ଦେଇଥିଲେ । ବ୍ରିଟେନରେ ଦାଉଦର ସମ୍ପତ୍ତି ବାଜ୍ୟାପ୍ତ ହୋଇଥିବା ନେଇ ସାମ୍ବାଦିକମାନଙ୍କ ପ୍ରଶ୍ନରେ ସେ ବହୁତ କିଛି ଘଟୁଛି, ‘ବିଲେଇକୁ ଆମ କବଜାରୁ ଖସିଯିବାକୁ ଦେବୁନାହିଁ’ ବୋଲି କହିଥିଲେ ।
ଦାଉଦ ୧୯୯୩ ମୁମ୍ବାଇ ବିସ୍ଫୋରଣର ମୁଖ୍ୟ ସଞ୍ଚାଳକ ଥିଲା । ଏହି ବିସ୍ଫୋରଣରେ ୨୫୭ ଜଣ ପ୍ରାଣ ହରାଇଥିଲେ । ଦାଉଦ ଭାରତରୁ ପଳାଇଯାଇ ପାକିସ୍ତାନରେ ଆଶ୍ରୟ ନେଇଛି । ସେ କରାଚିରେ ରହିଥିବା ନେଇ ଭାରତର ଦାବିକୁ ଜାତିସଂଘ ସ୍ୱୀକାର କରିଛି । କରାଚିରେ ତା’ର ୩ଟି ଠିକଣା ରହିଥିବା ବ୍ରିଟେନ ସରକାର କହିଛନ୍ତି ।