ଅଭାବୀ ଲୋକଙ୍କୁ ଖାଦ୍ୟ ଯୋଗାଉଛନ୍ତି ଅନୁପ : ପ୍ରତିଦିନ ୫୦୦ଶହ ଲୋକଙ୍କ ପାଖରେ ପହଁଚାଉଛନ୍ତି ଖାଇବା
ନୋଏଡା : କୁହାଯାଏ ଜଣକୁ ଯଦି ତୁମେ ଖାଇବାକୁ ଦେଇ ସନ୍ତୁଷ୍ଟ କରିପାରିଲ , ତାହା ଏକ ମହତ କାମ ଅଟେ । କାରଣ ଭୋକିଲାକୁ ତୃପ୍ତ କଲେ ଈଶ୍ୱର ଆର୍ଶୀବାଦ ମିଳିଥାଏ । ଏହି ଛୋଟ ଛୋଟ ପ୍ରୟାସ ସମାଜରେ ଭଲ ପ୍ରଭାବ ପକାଇଥାଏ । ଦୟନୀୟ ଅବସ୍ଥାରେ ଖାଦ୍ୟ ପାଇଁ ସଂଘର୍ଷ କରୁଥିବା ଅଭାବୀ ଲୋକଙ୍କର ବହୁତ ଉପକାର ହୋଇଥାଏ । ଏମିତି କିଛି ଲୋକ ସମାଜରେ ଅଛନ୍ତି ଯେଉଁମାନେ ଏହି ଅଭାବୀ ଲୋକଙ୍କ ପାଇଁ ନିଜର ଶ୍ରମ ଓ ଅର୍ଥ ଦାନ କରିଥାନ୍ତି । ସେଇମାନଙ୍କ ମଧ୍ୟରେ ଜଣେ ହେଲେ ଦିଲ୍ଲୀର ନୋଏଡା ନିବାସୀ ତଥା ସାମାଜିକ କର୍ମୀ ଅନୁପ୍ ଖାନ୍ନା । ତାଙ୍କର ‘ଦାଦି କି ରଷୋଇ ’ ନାମକ ଏକ ଅଭିନବ ପ୍ରୟାସ ଖୁବ୍ ଲୋକପ୍ରିୟ ସାଜିଛି । ଏହା ମାଧ୍ୟମରେ ସେ ଆଜିର ମହଙ୍ଗା ସମୟରେ ଅଭାବୀ ଲୋକଙ୍କୁ ୫ଟଙ୍କାରେ ଖାଇବା ଓ ୧୦ ଟଙ୍କାରେ ପିନ୍ଧିବାକୁ ପୋଷାକ ଯୋଗାଇଦେଉଛନ୍ତି । ଆଉ ତାଙ୍କର ଏହି କାର୍ଯ୍ୟ ଯୋଗୁଁ ପାଖାପାଖି ୫୦୦ ଲୋକ ପ୍ରତିଦିନ ହେଉଛନ୍ତି ଉପକୃତ ।
Kanak News is now on WhatsApp
Join and get latest news updates delivered to you via WhatsApp
ବାପାଙ୍କ ଆଦର୍ଶରେ ଅନୁପ୍ରାଣୀତ ହୋଇ ସେ ସମାଜସେବା ଦିଗରେ ମନବଳାଇଥିଲେ ଅନୁପ୍ । ତାଙ୍କ ବାପା ଥିଲେ ଜଣେ ସ୍ୱାଧୀନତା ସଂଗ୍ରାମୀ । ବୟସ ବଢିବା ସହ ସମାଜ ପାଇଁ କିଛି କରିବାର ନିଶା ତାଙ୍କ ମନରେ ବସା ବାନ୍ଧିଲା । ଆଖପାଖରେ ଥିବା ଅଭାବୀ ଲୋକମାନଙ୍କର ଅସହାୟତାକୁ ସେ ଦେଖି ବ୍ୟଥିତ ହେଉଥିଲେ । ସେମାନଙ୍କର ଆବଶ୍ୟକତା ପୂରଣ କରିବା ପାଇଁ କିଛି କରିବାକୁ ଚିନ୍ତା କଲେ । ଆଉ ଆରମ୍ଭ କଲେ ‘ଦାଦି କି ରଷୋଇ’ କାର୍ଯ୍ୟକ୍ରମ । ନିଜ ସଂଚିତ ଅର୍ଥରେ ରୋଷେଇ କରିବା ନିମନ୍ତେ ଏକ ଘର ନିର୍ମାଣ କରିଥିଲେ । ରୋଷେଇ କରିବା ପାଇଁ ନିୟୋଜିତ କରିବା ପାଇଁ ନିୟୋଜିତ କରିଥିଲେ କିଛି କର୍ମଚାରୀଙ୍କୁ । ଆଉ ଏସମସ୍ତ କାର୍ଯ୍ୟରେ ଅନୁପଙ୍କ ପରିବାର ଲୋକ ତାଙ୍କୁ ବହୁତ ସହାଯ୍ୟ ଓ ସମର୍ଥନ କରିଥିଲେ ।
ପ୍ରତିଦିନ ଦୁଇବେଳା ରୋଷେଇ କରି ନୋଏଡାର ସେକ୍ଟର ୧୭ ଓ ସେକ୍ଟର ୨୯ରେ ଲୋକମାନଙ୍କୁ ବାଣ୍ଟିବା ପାଇଁ ପହଁଚିଯାଇଥିଲେ ସେ । ଧୀରେ ଧୀରେ ତାଙ୍କର ଏହି ପ୍ରୟାସ ପଚାରିତ ହୋଇଯାଇଥିଲା ଚାରିଆଡେ । ଆଉ ଲୋକଙ୍କ ସଂଖ୍ୟା ମଧ୍ୟ ବଢିଥିଲା । ଅନେକ ଲୋକ ହୋଇଥିଲେ ଉପକୃତ । ଅନୁପଙ୍କୁ ସହଯୋଗ କରିବାକୁ ଯାଇ ଲୋକମାନେ ସେମାନଙ୍କର ସ୍ୱତନ୍ତ୍ର ଦିନମାନଙ୍କରେ ଭିନ୍ନ ଭିନ୍ନ ଖାଦ୍ୟ ଯୋଗଇ ଦେଉଥିଲେ । ଏବେ ବି ଅନୁପଙ୍କ ଏହି ଧାରା ଜାରି ରହିଛି । ଦିନ ୧୦ଟାରୁ ୧୧.୩୦ ଯାଏ ସେକ୍ଟର ୧୭ରେ ଖାଦ୍ୟ ବାଂଟିବା ସହ ମଧ୍ୟାହ୍ନ ୧୨ଟାରୁ ୨ଟା ଯାଏ ସେକ୍ଟର ୨୯ରେ ବଂଟାଯାଉଛି ଖାଦ୍ୟ । ପ୍ରାୟ ୫୦୦ଲୋକଙ୍କ ପାଇଁ ପ୍ରତିଦିନ କରାଯାଉଛି ରୋଷେଇ ।
ଏହା ବ୍ୟତୀତ ଅନୁପ୍ ଏକ ସଦଭାବନା ଷ୍ଟୋର ମଧ୍ୟ ଖୋଲିଛନ୍ତି । ଏହି ଷ୍ଟୋର ଆବଶ୍ୟକ ଥିବା ଲୋକମାନଙ୍କୁ ପୋଷାକ, ଜୋତା ଓ ବହି ମାତ୍ର ୧୦ ଟଙ୍କାରେ ଯୋଗାଇ ଦେଉଛି । ଏଥିପାଇଁ ମଧ୍ୟ ସେ ଅନେକ ଲୋକଙ୍କର ସାହାଯ୍ୟ ପାଇଛନ୍ତି ।ପ୍ରଧାନମନ୍ତ୍ରୀ ଜନ ଔଷଧି ଯୋଜନାରେ ତାଲିକାଭୁକ୍ତ ହୋଇଛନ୍ତି ଅନୁପ୍ । ନୋଏଡାରେ ପ୍ରଥମକରି ଏକ ପ୍ରଧାନମନ୍ତ୍ରୀ ଜନ ଔଷଧ କେନ୍ଦ୍ର ଖୋଲିଛନ୍ତି । ଯେଉଁଠି ବି ଦୁର୍ଘଟଣାର ଖବର ପାଇବା ପରେ ସଂଗେ ସଂଗେ ଘଟଣାସ୍ଥଳରେ ପହଁଚି ଯାଉଛନ୍ତି ସେ । ସାରା ଜୀବନ ଏହି ସମାଜ ସେବାରେ ନିଜକୁ ବର୍ତ୍ତି କରିବାର ଅଭିପ୍ରାୟ ରଖିଛନ୍ତି ଅନୁପ ।
ଅନୁପଙ୍କର ଏଭଳି ମହତ ଉଦ୍ଦେଶ୍ୟ ଓ ପଦକ୍ଷେପକୁ ନେଇ ଆଜି ପାଲଟିଛନ୍ତି ପ୍ରଶଂସାର ପାତ୍ର । ଆଉ ଅଭାବୀ ଲୋକଙ୍କର ପ୍ରକୃତ ବନ୍ଧୁ ଭାବେ ଏକ ସ୍ୱତନ୍ତ୍ର ପରିଚତ ଦେଇଛନ୍ତି ସେ ।
(ସୌଜନ୍ୟ-ପତ୍ରିକା)