କନକ ବ୍ୟୁରୋ : ବରଗଡ଼ ଜିଲ୍ଲା କଳାପାଣି ଗାଁର ଭାଗଚାଷୀ ବୃନ୍ଦା ସାହୁଙ୍କ ଆତ୍ମହତ୍ୟା ଘଟଣାକୁ ଠିକ୍ ବର୍ଷେ ପୂରିଛି । ମାତ୍ର, ପ୍ରତିଶ୍ରୁତି ମୁତାବକ ତାଙ୍କ ପରିବାରକୁ ଏପର୍ଯ୍ୟନ୍ତ ଘର ଖଣ୍ଡେ ମିଳିନାହିଁ । ଗତବର୍ଷ ନଭେମ୍ବର ୧ ତାରିଖ ବୃନ୍ଦା ନିଜ ଉଜୁଡ଼ା ଜମି ଭିତରେ କୀଟନାଶକ ପିଇ ଦେଇଥିଲେ । ଏହାପରେ ତାଙ୍କ ପ୍ରାଣବାୟୁ ଉଡ଼ି ଯାଇଥିଲା । ଏହାର ଦିନକ ପୂର୍ବରୁ ବୃନ୍ଦା ଚକଡ଼ା ସାଲୁବାଲୁ ତାଙ୍କ ଫଳନ୍ତି ଧାନ କ୍ଷେତରେ ନିଆଁ ଲଗାଇ ଦେଇଥିଲେ । ବୃନ୍ଦାଙ୍କ ମୃତ୍ୟୁ ଘଟଣା ଦେଶବ୍ୟାପୀ ଆଲୋଡ଼ନ ସୃଷ୍ଟି କରିଥିଲା । ଚାଷୀ ଆନ୍ଦୋଳନ, ରାଜପଥ ଅବରୋଧ ହୋଇଥିଲା । ସବୁ ଦଳର ତୁଙ୍ଗ ନେତା ବୃନ୍ଦାଙ୍କ ଘରେ ପହଂଚି ସମବେଦନା ଜଣାଇଥିଲେ । ନାନାଦି ପ୍ରତିଶ୍ରୁତି ଦେଇ ଫେରି ଯାଇଥିଲେ । ବର୍ଷଟିଏ ବିତି ଯାଇଛି, କିନ୍ତୁ ବୃନ୍ଦାଙ୍କ ପରିବାରର ଲୁହ ଶୁଖିନି ।
Kanak News is now on WhatsApp
Join and get latest news updates delivered to you via WhatsApp
ପେଟପାଟଣା ପାଇଁ ଆଜିବି ସଂଘର୍ଷ କରୁଛନ୍ତି ବିଧବା ପତ୍ନୀ ସୁବାଷିନୀ, ଦୁଇ ଝିଅ ପୁଷ୍ପାଞ୍ଜଳି ଓ ପ୍ରୀତି, ଏକମାତ୍ର ପୁଅ ରାକେଶ । ଜାତୀୟ ରାଜପଥ କଡ଼ରେ ହିଁ ଏମାନଙ୍କ ଘର । ସଂପ୍ରସାରଣ କାମ ଚାଲୁଥିବାରୁ କୌଣସି ମୁହୂର୍ତ୍ତରେ ଘରଭଂଗା ଯିବ । ଏଭଳି ସ୍ଥିତିରେ ସେମାନେ କେଉଁଠି ମୁଣ୍ଡ ଗୁଂଜିବେ, ସେନେଇ ଦିନରାତି ଚିନ୍ତା ଘାରିଛି ।