ପାକିସ୍ତାନର ନିର୍ବାଚନ ରାଲିରେ ଆଇଏସଆଇଏସର ବଡ ଧରଣର ଆତ୍ମଘାତୀ ବିସ୍ଫୋରଣ । ୧୩୩ ଜଣଙ୍କର ମୃତ୍ୟୁ
ପାକିସ୍ତାନରେ ବଡ ଧରଣର ଆତ୍ମଘାତୀ ବିସ୍ଫୋରଣ । ପାକିସ୍ତାନର ପୂର୍ବ ପ୍ରଧାନମନ୍ତ୍ରୀ ନୱାଜ ସରିଫଙ୍କୁ ଗିରଫ କରିବାର ଠିକ୍ ପୂର୍ବରୁ ଏକ ନିର୍ବାଚନ ପ୍ରଚାର ରାଲିରେ ହୋଇଥିବା ଆତ୍ମଘାତୀ ବିସ୍ଫୋରଣରେ ୧୩୩ ଲୋକଙ୍କର ମୃତ୍ୟୁ ହୋଇଛି । ଏହାଛଡା ୧୨୫ ଜଣ ଗମ୍ଭୀର ଭାବେ ଆହତ ହୋଇଛନ୍ତି । ଏହି ବେଲୁଚିସ୍ତାନରେ ହୋଇଛି । ବେଲୁଚିସ୍ତାନ ଆୱାମ ପାର୍ଟିର ନେତା ସିରାଜ ରାୟସାନୀଙ୍କ ନିର୍ବାଚନ ରାଲିରେ ଏହିଭଳି ବିସ୍ଫୋରଣ ହୋଇଛି । ଏହି ବିସ୍ଫୋରଣ ପାଇଁ ଆଇଏସଆଇଏସ ନିଜୁକ ଦାୟୀ କରିଛି ।
Kanak News is now on WhatsApp
Join and get latest news updates delivered to you via WhatsApp
ପୋଲିସ ଅଧିକାରୀଙ୍କ କହିବା ଅନୁଯାୟୀ, ବେଲୁଚିସ୍ତାନ ଆୱାମ ପାର୍ଟିର ନେତା ସିରାଜ ରାୟସୀନ ମଧ୍ୟ ଏହି ବିସ୍ଫୋରଣରେ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ତେବେ କ୍ୱୈଟା ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ହିଁ ତାଙ୍କର ମୃତ୍ୟୁ ହୋଇଛି । ବେଲୁଚିସ୍ତାନର ପୂର୍ବ ମୁଖ୍ୟମନ୍ତ୍ରୀ ନୱାବ ଅସଲମ ରାୟସୀନଙ୍କ ଭାଇ ହେଉଛନ୍ତି ସିରାଜ ରାୟସୀନ । ବେଲୁଚିସ୍ତାନର ସ୍ୱାସ୍ଥ୍ୟ ମନ୍ତ୍ରୀଙ୍କ କହିବା ଅନୁସାରେ, ପ୍ରଥମରୁ ମୃତକଙ୍କ ସଂଖ୍ୟା ଅଧିକ ନଥିଲା କିନ୍ତୁ ରାୟସୀନଙ୍କ ଭଳି ଗମ୍ଭୀର ରୂପେ ଆହତ ହୋଇଥିବା ଅଧିକାଂଶ ଲୋକଙ୍କର ମୃତ୍ୟୁ ହସ୍ପିଟାଲରେ ହୋଇଥିଲା । ମୃତ୍ୟୁ ସଂଖ୍ୟା ଆହୁରି ବୃଦ୍ଧି ପାଇପାରେ ବୋଲି ସେ ସୂଚନା ଦେଇଛନ୍ତି ।
ବମ ନିରୋଧକ ସ୍କ୍ୱାର୍ଡ ଅନୁସାରେ, ଏହା ଏକ ଆତ୍ମଘାତୀ ବିସ୍ଫୋରଣ ଥିଲା । ଏହି ଶକ୍ତିଶାଳୀ ବିସ୍ଫୋରଣରେ ପ୍ରାୟ ୧୬-୨୦ କିଲୋଗ୍ରାମର ବିସ୍ଫୋଟକ ବ୍ୟବହାର କରାଯାଇଥିଲା । କେବଳ ବେଲୁଚିସ୍ତାନରେ ନୁହେଁ ଏହା ପୂର୍ବରୁ ମୁତ୍ନାହିଦା ମଜଲିସ ଅମାଲ ନେତା ଅକରମ ଖାନ ଦୁରାନୀଙ୍କ ରାଲିରେ ମଧ୍ୟ ବିସ୍ଫୋରଣ ହୋଇଥିଲା । ଯେଉଁଥିରେ ୫ ଲୋକଙ୍କର ମୃତ୍ୟୁ ହୋଇଥିବା ବେଳେ ୩୭ ଜଣ ଆହତ ହୋଇଥିଲେ । ୨୫ରେ ହେବାକୁ ଥିବା ସାଧାରଣ ନିର୍ବାଚନରେ ପିଟିଆଇ ପ୍ରମୁଖ ଇମରାନ ଖାନଙ୍କ ବିରୋଧରେ ମୈଦାନକୁ ଓହ୍ଲାଇଛନ୍ତି ଅକରମ ଖାନ ଦୁରାନୀ ।ସାଧାରଣ ନିର୍ବାଚନ ପୂର୍ବରୁ ପାକିସ୍ତାନର ଆଇନ ବ୍ୟବସ୍ଥ୍ା ସମ୍ପୂର୍ଣ୍ଣ ଭାବେ ବିପର୍ଯ୍ୟସ୍ତ ହୋଇପଡିଛି । ତେବେ ଏହି ଘଟଣାକୁ ପାକିସ୍ତାନର ପ୍ରଧାନମନ୍ତ୍ରୀ ଓ ରାଷ୍ଟ୍ରପତି ନିନ୍ଦା କରିଛନ୍ତି ।