କନକ ବ୍ୟୁରୋ : ଶେଷରେ ଅପେକ୍ଷାର ଅନ୍ତ ଘଟିଛି । ପ୍ରାୟ ୬୦ ଘଂଟା ପରେ ଭାରତକୁ ପ୍ରତ୍ୟାବର୍ତ୍ତନ କରିଛନ୍ତି ଦେଶର ବୀର ସନ୍ତାନ ଅଭିନନ୍ଦନ ବର୍ଥମାନ । ପାକିସ୍ତାନରୁ ଫେରିଲେ ୱିଙ୍ଗ କମାଣ୍ଡର ଅଭିନନ୍ଦନ ବର୍ଥମାନ । ୨ ଦିନ ଧରି ପାକ୍ କବଜାରେ ରହିବା ପରେ ଶୁକ୍ରବାର ୱାଘା ବର୍ଡର ଦେଇ ଭାରତ ଫେରିଛନ୍ତି ବୀର ଯବାନ ଅଭିନନ୍ଦନ । ଶୁକ୍ରବାର ରାତି ପ୍ରାୟ ୯ଟା ୨୫ ମିନିଟରେ ୱାଘା ବର୍ଡର ଦେଇ ଭାରତ ମାଟିରେ ପାଦ ରଖିଥିଲେ ସେ । ସେହି ହସ ହସ ମୁହଁ । ଛାତି ଚଉଡା କରି ଶତ୍ରୁ ଦେଶର ମାଟିରୁ ଆସି ଭାରତ ମାଟିରେ ପାଦ ରଖିଥିଲେ ଅଭିନନ୍ଦନ । ଦେଶକୁ ଫେରି ଭଲ ଲାଗୁଛି ବୋଲି କହିଥିଲେ ଅଭିନନ୍ଦନ ।
Kanak News is now on WhatsApp
Join and get latest news updates delivered to you via WhatsApp
ଅଭିନନ୍ଦନ ଭାରତ ମାଟିରେ ପାଦ ରଖିବାର ଖବର ଟେଲିଭିଜନରେ ପ୍ରସାର ହେବା କ୍ଷଣି, ଦେଶର ବିଭିନ୍ନ ଅଂଚଳରେ ଆରମ୍ଭ ହୋଇଥିଲା ଉତ୍ସବ । ସତେ ଯେମିତି ଏହି ମୁହୁତ୍ତକୁ ସାରାଦେଶ ଅପେକ୍ଷା କରି ରହିଥିଲା, ତେବେ ଏହି ହସ୍ତାନ୍ତରରେ ଅନେକ ସମୟ ବିଳମ୍ବ ହୋଇଥିଲା । ପ୍ରଥମେ କୁହାଯାଉଥିଲା ଅପରାହ୍ନ ୪ ଟାରେ ଆସିବେ ଅଭିନନ୍ଦନ । ତେବେ ଭାରତୀୟ ୱିଙ୍ଗ ପାଇଲଟ୍ଙ୍କୁ ଫେରାଇବା ନେଇ ଦୁଇ ଦେଶ ମଧ୍ୟରେ କାଗଜପତ୍ର ଯାଂଚ୍ ପ୍ରକ୍ରିୟାର ଜଟିଳ କାର୍ଯ୍ୟ ପାଇଁ ଲାଗି ଯାଇଥିଲା ପ୍ରାୟ ୪ ଘଂଟାରୁ ଅଧିକ ସମୟ ।
ଲାହୋରରୁ ଦିନ ପ୍ରାୟ ୧୨ଟାରେ ସ୍ଥଳ ପଥରେ ବାହାରିଥିଲେ , ୱାଘା ବର୍ଡରରେ ପହଁଚିବା ବେଳକୁ ଅପରାହ୍ନ ସାଢେ ୪ଟା ହୋଇ ସାରିଥିଲା । ପାକିସ୍ତାନର ବିଟିଙ୍ଗ ଦ ରିଟ୍ରିଟ୍ ପାଇଁ ସେଠାରେ ଫସିଗଲେ ରାସ୍ତାରେ । ଏହା ସରିବା ପରେ ଶୁକ୍ରବାର ସାଢେ ୬ଟାରୁ ଅଭିନନ୍ଦନଙ୍କୁ ପାକିସ୍ତାନ, ଭାରତକୁ ହସ୍ତାନ୍ତର ପ୍ରକ୍ରିୟା ଆରମ୍ଭ କରିଥିଲା । ଏହି ପ୍ରକ୍ରିୟା ରାତି ସାଢେ ୯ଟା ଯାଏଁ ଚାଲିଥିଲା । ଶେଷରେ ରାତି ପ୍ରାୟ ସାଢେ ୯ ଟାରେ ପାକିସ୍ତାନ, ୱାଘା ବର୍ଡରରେ ଅଭିନନ୍ଦନଙ୍କୁ ଭାରତକୁ ହସ୍ତାନ୍ତର କରିଥିଲା । ଅଭିନନ୍ଦନଙ୍କୁ ହସ୍ତାନ୍ତର ପରେ ତାଙ୍କର ଏସଓପି ଅନୁଯାୟୀ ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା ।
ଏହାପରେ ୱାଘା ବର୍ଡରରୁ ତାଙ୍କୁ ଅମ୍ରିତସର ବିମାନ ବନ୍ଦରରୁ ନିଆଯାଇ, ସ୍ୱତନ୍ତ୍ର ବିମାନରେ ଦିଲ୍ଲୀ ଅଣାଯାଇଛି । ଦିଲ୍ଲୀରେ ସେନା ହସ୍ପିଟାଲରେ ତାଙ୍କର ସ୍ୱାସ୍ଥ୍ୟପରୀକ୍ଷା କରାଯାଇଛି । କୁହାଯାଉଛି ପାରାଚୁଟରୁ ଖସିବା ବେଳେ ତାଙ୍କ ପିଠିରେ ଆଘାତ ଲାଗିଛି । ଆଗାମୀ ୩ ମାସ ପାଇଁ ସେ ବିମାନ ଉଡାଇ ପାରିବେ ନାହିଁ ।