ଏମିତି ଏକ ହୃଦୟ ବିଦାରକ ଫଟୋ ! ଯାହା ଏକ ଗରିବ ପରିବାରକୁ ଦେଲା ୫୭ ଲକ୍ଷ ଟଙ୍କା ।
ଏକ ଦୁଃଖଭରା ଫୋଟ, ଯାହା ପାଇଁ ଏକ ଗରିବ ପରିବାରକୁ ମିଳିଛି ୫୭ ଲକ୍ଷ ଟଙ୍କା । ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଏହା ସତ । ଏହି ହୃଦୟ ବିଦାରକ ଫଟୋକୁ ଟ୍ୱିଟରରେ ୩୧ ହଜାରରୁ ଅଧିକ ଥର ସେୟାର କରାଯାଇଛି । ତେବେ ଘଟଣାଟି ହେଉଛି କିଛି ଏପରି । ଦିଲ୍ଲୀର ୩୭ ବର୍ଷୀୟ ଅନିଲ ନାମକ ଜଣେ ସଫେଇ କର୍ମୀଙ୍କର ଶୁକ୍ରବାର ଦିନ କାମ କରୁଥିବା ସମୟରେ ମୃତ୍ୟୁ ହୋଇଥିଲା । ଏହାପରେ ଜଣେ ଟ୍ୱିଟର ବ୍ୟବହାରକାରୀ ଏକ ଫଟୋ ପୋଷ୍ଟ କରିଥିଲେ, ଯେଉଁଥିରେ ଏକ ଶବ ପାଖରେ ୧୧ ବର୍ଷର କୁନି ପୁଅ କାନ୍ଦୁଥିବାର ଦେଖାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ସୋସିଆଲ ମିଡିଆରେ ଏହି ଫଟୋ ଭାଇରାଲ ହେବା ପରେ ଲୋକମାନେ ଏହି ଗରିବ ପରିବାରକୁ ସହାୟତାର ହାତ ବଢାଇଥିଲେ । ଏହା ପରେ କ୍ରାଉଡ୍ ଫଣ୍ଡିଂ ୱେବସାଇଟ କେଟୋ ଡଟ୍ ଓଆରଜିରେ ଏକ ଏନଜିଓରେ ସାହାଯ୍ୟରେ ଫଣ୍ଡ ଜମା କରିବା ପାଇଁ କ୍ୟାମ୍ପେନ୍ କରାଯାଇଥିଲା । ପାଖାପାଖି ୨ ଦିନ ମଧ୍ୟରେ ଲୋକମାନେ ୫୭ ଲକ୍ଷ ଟଙ୍କା ଅନିଲଙ୍କ ପରିବାରକୁ ଦେଇଛନ୍ତି ।
ଜାତୀୟ ଗଣମାଧ୍ୟମରୁ ମିଳିଥିବା ରିପୋର୍ଟ ଅନୁଯାୟୀ, ସୁରକ୍ଷା ଉପକରଣ ବିନା ସଫେଇ କାମ କରିବା କାରଣରୁ ଅନିଲଙ୍କର ମୃତ୍ୟୁ ହୋଇଥିଲା । ତେବେ ଅନିଲ ପରିବାରରେ ତାଙ୍କ ସ୍ତ୍ରୀ ଏବଂ ତିନି ଜଣ ପିଲା ଅଛନ୍ତି । ତେବେ ପରିବାରର ଆର୍ଥିକ ଅବସ୍ଥା ଏତେ ଶୋଚନୀୟ ଥିଲା ଯେ, ଅନିଲଙ୍କର ଅନ୍ତିମ ସଂସ୍କାର କରିବା ପାଇଁ ମଧ୍ୟ ତାଙ୍କ ପରିବାର ପାଖରେ ଟଙ୍କା ନଥିଲା । ତେବେ ହୃଦୟ ବିଦାରକ ଏହି ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଏହି ଗରିବ ପରିବାରକୁ ୫୭ ଲକ୍ଷ ଟଙ୍କାର ସାହାଯ୍ୟ ମିଳିଛି ।