ଦେବ୍ରିଗଡରେ ବୁଲୁଛି ମହାବଳ। ଜଙ୍ଗଲ ଭିତରକୁ ପ୍ରବେଶ ଦୃଶ୍ୟ କ୍ୟାମେରାରେ କଏଦ ପରେ ତତ୍ପର ହେଲା ବନବିଭାଗ।
କନକ ବ୍ୟୁରୋ: ଦେବ୍ରିଗଡ ଅଭୟାରଣ୍ୟରେ ବୁଲୁଛି ବାଘ । ପ୍ରବେଶ ପଥ ଦେଇ ରାସ୍ତାରେ ଅତି ସନ୍ତର୍ପଣରେ ଜଙ୍ଗଲ ଭିତରକୁ ପ୍ରବେଶ କରୁଛି ମହାବଳ । ଅଭୟାରଣ୍ୟର ମୁଖ୍ୟ ଦ୍ୱାରର ପଏଣ୍ଟଜିରୋରୁ ଜଙ୍ଗଲ ଭିତରକୁ ଯାଇଥିବା ରାସ୍ତାରେ କିଛି ବାଟ ବୀରଦର୍ପରେ ଚାଲିବା ପରେ ମହାବଳ ଜଙ୍ଗଲ ଭିତରକୁ ଯାଇଛି ଏହି ଯୁବ ମହାବଳ । ଆଉ ଯେଉଁ ଦୃଶ୍ୟକୁ କ୍ୟାମେରାରେ କଏଦ କରିଛନ୍ତି ବନ କର୍ମଚାରୀ ଓ ସେଠାରେ ଉପସ୍ଥିତ ଥିବା ପର୍ଯ୍ୟଟକ । ଗତ ଗୁରୁବାର ସଂଧ୍ୟା ସମୟରେ ଏଭଳି କିଛି ଦୃଶ୍ୟ ଏବେ ପଶୁପ୍ରେମୀଙ୍କ ପାଇଁ ଆଣିଛି ଖୁସି ଖବର । ଦେବ୍ରିଗଡ଼ ଅଭୟାରଣ୍ୟରେ ମହାବଳ ବାଘ ଦେଖାଯିବା ପରେ ସୁରକ୍ଷାକୁ ନେଇ ତତ୍ପର ହୋଇଉଠିଛି ବନବିଭାଗ । ୨ଟି ଟାଇଗର ମନିଟରିଂ ଟିମ, ୧୨ଟ ପେଟ୍ରୋଲିଂ ଟିମ ଓ ଶହେଟି କ୍ୟାମେରା ଯୋଗେ ବାଘର ଗତିବିଧି ଉପରେ ନଜର ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଦେବ୍ରିଗଡ଼ ଅଭୟାରଣ୍ୟରେ ପୂର୍ବରୁ କେବେ ମହାବଳ ବାଘ ଦେଖାଯାଇନଥିବା ବେଳେ, ୨୦୧୮ରେ ସମାନ ଭାବରେ ଏକ ମହାବଳ ପ୍ରବେଶ କରିଥିଲା । କିନ୍ତୁ ବନବିଭାଗର ବେପରୁଆ ମନୋଭାବ ପାଇଁ ଅଳ୍ପଦିନ ଭିତରେ ଶିକାରୀଙ୍କ ହାତରେ ତାର ପ୍ରାଣ ଯାଇଥିଲା ।
ମହାବଳକୁ ସୁରକ୍ଷା ଦେବାରେ ସମ୍ପୂର୍ଣ୍ଣ ଫେଲ ମାରିଥିଲା ବନବିଭାଗ । ଅଭୟାରଣ୍ୟ ଉପକଣ୍ଠରେ ବାଘକୁ ମାରି ତାର ଦାନ୍ତ ଓ ନଖ ନେଇ ମୃତଦେହକୁ ପୋତି ଦେଇଥିଲେ ଶିକାରୀ । ସ୍ନେକ ହେଲ୍ପ ଲାଇନର ସମ୍ପାଦକ ଶୁଭେନ୍ଦୁ ମଲ୍ଲିକ କୈାଣସି ସୂତ୍ରରୁ ସୂଚନା ପାଇ ଏହି ଖବର ଲୋକ ଲୋଚନକୁ ଆଣିଥିଲେ । କିନ୍ତୁ ସେତେବେଳେ ଏହା ଏକ କଲରାପତରିଆ ବାଘ ବୋଲି କହି ନିଜ ମୁଣ୍ଡରୁ ଦୋଷ ଖସାଇବାକୁ ଉଦ୍ୟମ କରିଥିଲେ । ଅବଶ୍ୟ ପରେ ଏହି ଘଟଣାରେ ୪ଜଣ ଶିକାରୀଙ୍କୁ ଗିରଫ କରାଯାଇଥିଲା । ତେଣୁ ଏବେ ଏହି ବାଘକୁ ସୁରକ୍ଷା ଦେବା ବନବିଭାଗ ପାଇଁ ବଡ଼ ଚ୍ୟାଲେଞ୍ଜ ।
ପଡ଼ୋଶୀ ଛତିଶଗଡ଼ରୁ ବାଘଟି ଏଠାକୁ ଆସିଥିବା ସନ୍ଦେହ କରାଯାଉଛି । ତେଣୁ ବାଘ ଦେବ୍ରିଗଡ଼ ଅଭୟାରଣ୍ୟରେ ରହୁଛି କି ଅନ୍ୟ କୁଆଡ଼େ ଯାଉଛି ତା ଉପରେ ନଜର ରଖାଯାଇଛି । ତେବେ ୨୦୧୮ର ଘଟଣା ଯେପରି ପୁନରାବୃତି ନହୁଏ ସେଥିପାଇଁ ସତର୍କ ହୋଇଉଠିଛି ବନବିଭାଗ ।