କନକ ବ୍ୟୁରୋ : ଲୋକଙ୍କୁ ନ୍ୟାୟ ଦେଉଥିବା ଓକିଲ ଏବେ ନିଜେ ନ୍ୟାୟ ଅପେକ୍ଷାରେ ପଡ଼ି ରହିଛନ୍ତି । ଯିଏ ଦିନେ କଳାକୋର୍ଟ ପିନ୍ଧି ଅଦାଲତକୁ ଧାଇଁ ଯାଉଥିଲେ ସେ ଆଜି ଦୟନୀୟ ଅବସ୍ଥାରେ ଦିନ କାଟୁଛନ୍ତି । ଦୀର୍ଘ ୨ ମାସ ଧରି ହସ୍ପିଟାଲ ବେଡରେ କୋମାରେ ପଡ଼ି ରହିବା ପରେ ଏବେ ଘରକୁ ଫେରିଛନ୍ତି ସତ, ହେଲେ ଏବେବି ତାଙ୍କ ମାନସିକ ସ୍ଥିତିରେ ସୁଧାର ଆସିନାହିଁ । ଯେଉଁଥି ପାଇଁ ତାଙ୍କୁ ଘରେ ହାତଗୋଡ଼ରେ ଶିକୁଳି ବାନ୍ଧି ରଖିବାକୁ ପଡ଼ିଛି ।
Kanak News is now on WhatsApp
Join and get latest news updates delivered to you via WhatsApp
ଠିକ୍ ଅପରାହ୍ନ ୪ଟା, ସାମାନ୍ୟ ପୂର୍ବ ଶତ୍ରୁତାକୁ କେନ୍ଦ୍ରକରି ସଂଜୟ ତ୍ରିପାଠୀଙ୍କୁ ମଣାନ୍ତକ ଆକ୍ରମଣ କରିଥିଲେ ସାଥୀ ଓକିଲ । ତୁରନ୍ତ ପୁରୀ ମୁଖ୍ୟ ଡାକ୍ତରଖାନାକୁ ନିଆଗଲା, ସେ’ଠୁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଗଲା । ଜୀବନ ସିନା ବଂଚିଗଲା, ଦେଲେ ଦୀର୍ଘ ୨ ମାସ ଧରି କୋମାରେ ପଡ଼ି ରହିଲେ ସଂଜୟ । ଆଉ ଯେତେବେଳେ ଅଭିଯୁକ୍ତ ୨ଜଣ ଓକିଲଙ୍କୁ ଗିରଫ କଲା ପୁଲିସ । ରାସ୍ତାକୁ ଓହ୍ଲାଇଥିଲେ ଆଇନଜୀବୀ ।
ଏହି ଘଟଣାରେ ସଂପୃକ୍ତ ଦୁଇ ଜଣ ଓକିଲଙ୍କ ଗିରଫଦାରୀର ପ୍ରତିବାଦରେ ବହାରି ଆସିଲେ ଆଇନଜୀବୀ । ପୁଲିସ କାର୍ଯ୍ୟାନୁଷ୍ଠାନ ବିରୋଧରେ ଏକାଠି ହୋଇଥିଲେ ଓକିଲ । ଆଉ ପୁରା ଘଟଣା ଭିନ୍ନ ମୋଡ ନେଇଥିଲା ଯେତେବେଳେ ପୁରୀ ପୁଲିସ ବିରୋଧରେ କଚେରୀ ନିକଟରେ ଲାଗିଲା ପୋଷ୍ଟର । ପୁରୀ ପୁଲିସକୁ ଚୋରର ଆଖ୍ୟା ଦିଆଗଲା । ଆଉ ଘଟଣାରେ ପୁରୀ ଓକିଲ ସଂଘ ପକ୍ଷରୁ କ୍ଷମା ପ୍ରାର୍ଥନା ବି କରାଯାଇଥିଲା । କିନ୍ତୁ ପରବର୍ତୀ ମୁହୂର୍ତରେ ବଦଳିଗଲା ପୁଲୀ ଓକିଲ ସଂଘର ସ୍ୱର ।
ଓକିଲ ସଂଜୟ ତ୍ରିପାଠୀଙ୍କୁ ହତ୍ୟା ଉଦ୍ୟମ ଘଟଣାକୁ ୪ମାସ ବିତିଗଲାଣି । କେତେବେଳେ ଓକିଲ ମାନେ ରାସ୍ତାକୁ ଆସୁଛନ୍ତି, ତ ଆଉ କେତେବେଳେ ପୁଲିସ ବିରୋଧରେ ସହରରେ ପୋଷ୍ଟର ଲାଗୁଛି । ହେଲେ ଏସବୁ ଭିତରେ ନ୍ୟାୟ ଅପେକ୍ଷାରେ ସଂଜୟଙ୍କ ପରିବାର । ପୁଲିସ ଓକିଲ ବିବାଦ ଭିତରେ ମୂଳ ପ୍ରସଙ୍ଗକୁ ନେଇ କେତୋଟି ପ୍ରଶ୍ନ ଉଠୁଛି ।
– ନ୍ୟାୟ ଅପେକ୍ଷାରେ ଥିବା ଓକିଲଙ୍କ ପରିବାରକୁ ସାହାଯ୍ୟ କରିବା ପାଇଁ ସାଥୀ ଓକିଲମାନେ ଆଗେଇ ଆସିବେ କି ?
– ଦିନ ଦ୍ୱିପ୍ରହରରେ ଜଣେ ଓକିଲଙ୍କୁ ମାଡ଼ ମାରିଥିବା ଅପରାଧୀଙ୍କୁ ଗିରଫ କରିବା ପାଇଁ ଓକିଲ ସଂଘ ଦାବି କରିବ କି ?
– ଯଦି ଓକିଲମାନେ ଜଣେ ସାଥୀ ଓକିଲକୁ ମାଡ଼ ମାରିଥିବାର ଅଭିଯୋଗ ପ୍ରମାଣିତ ହୁଏ, ତାହେଲେ ଆଇନକୁ ତା ବାଟରେ ଯିବା ପାଇଁ ବାଟ ଛାଡ଼ିବେ କି ?