ଭାରତରେ ତିଆରୀ ହେବ ଜନସନ ଆଣ୍ଡ ଜନସନର କୋଭିଡ ଟିକା : କ୍ୱାଡ ରାଷ୍ଟ୍ର ସମୂହ ବୈଠକରେ ନିଷ୍ପତି; ଅର୍ଥ ଯୋଗାଇ ଦେବେ ଆମେରିକା ଆଉ ଜାପାନ
ବିଭିନ୍ନ ଦେଶକୁ ପରିବହନର ଦାୟିତ୍ୱ ନେବ ଅଷ୍ଟ୍ରେଲିଆ
କନକ ବ୍ୟୁରୋ : ଆମେରିକାର ଜନ୍ସନ ଆଣ୍ଡ୍ ଜନ୍ସନ କମ୍ପାନିର ସିଙ୍ଗଲ ଡୋଜ୍ କୋଭିଡ ଟିକା ଭାରତରେ ତିଆରି ହେବ । କ୍ୱାଡ୍ ରାଷ୍ଟ୍ର ସମୂହର ଟିକା ବିକାଶ ଯୋଜନାରେ ଏହି ପଦକ୍ଷେପ ଗ୍ରହଣ କରାଯାଇଛି । ଏବଂ ଭାରତ, ଆମେରିକା, ଜାପାନ ଓ ଅଷ୍ଟ୍ରେଲିଆର ମିଳିତ ସହାଭାଗିତାରେ ଏହି ଟିକା ତିଆରି କରାଯିବ । ଭାରତରେ ଏହି ଟିକା ପ୍ରସ୍ତୁତ କରିବା ପାଇଁ ଜାପାନ ଏବଂ ଆମେରିକା ଅର୍ଥ ଯୋଗାଣ କରିବେ ଏବଂ ଅଷ୍ଟ୍ରେଲିଆ ବିଭିନ୍ନ ରାଷ୍ଟ୍ରକୁ ଏହି ଟିକା ପହଂଚାଇବା ପାଇଁ ପରିବହନ ଦାୟିତ୍ୱ ଗ୍ରହଣ କରିବ ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱର ସବୁଠାରୁ ବଡ ଟିକା ନିର୍ମାତା ରାଷ୍ଟ୍ର ଭାରତରେ ଏବେ ଅକ୍ସଫୋର୍ଡ ଆଷ୍ଟ୍ରାଜେନେକାର କୋଭିଡ ଟିକା କୋଭିସିଲ୍ଡ ଏବଂ ଭାରତ ବାୟୋଟେକ- ଆଇସିଏମ୍ଆର୍ର ସ୍ୱଦେଶୀ ଟିକା କୋଭାକ୍ସିନର ଉତ୍ପାଦନ ହେଉଛି । ଭାରତ ଏହି ଦୁଇ ଟିକାକୁ ଦେଶରେ ଜରୁରୀ ବ୍ୟବହାର ପାଇଁ ଅନୁମୋଦନ କରିବା ସହ ବିଶ୍ୱର ବିଭିନ୍ନ ରାଷ୍ଟ୍ରକୁ ଟିକା ଯୋଗାଇ ଦେଉଛି ।
ଭର୍ଚୁଆଲ ମାଧ୍ୟମରେ ଆୟୋଜିତ ଆଜିର କ୍ବାଡ୍ ବୈଠକରେ ଆମେରିକା ରାଷ୍ଟ୍ରପତି ଜୋ ବାଇଡେନ, ଜାପାନ ପ୍ରଧାନମନ୍ତ୍ରୀ ୟୋସିହିଡେ ସୁଗା, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ସ୍କଟ୍ ମରିସନ ଯୋଗଦେଇଥିଲେ । ରାଷ୍ଟ୍ରପତିଭାବେ ଦାୟିତ୍ବ ଗ୍ରହଣ କରିବା ପରେ ଏହା ହେଉଛି ବାଇଡେନଙ୍କ ଦ୍ବିତୀୟ ଉଚ୍ଚସ୍ତରୀୟ ବହୁରାଷ୍ଟ୍ରୀୟ ସମ୍ମିଳନୀ । ପୂର୍ବରୁ ସେ ଜି-୭ ସମ୍ମିଳନୀରେ ଯୋଗଦେଇଥିଲେ ।
ବିଶ୍ବରେ ବଢିଚାଲିଥିବା ଚୀନର ଆଧିପତ୍ୟକୁ ରୋକିବାକୁ ଏହି କ୍ବାଡ୍ ରଣନୈତିକ ମେଣ୍ଟ ଗଠନ କରାଯାଇଛି । ଗତ ୨୦୧୭ରେ ଏହି ମେଣ୍ଟର ପରିକଳ୍ପନା କରାଯାଇଥିଲା । ଏହି ମେଣ୍ଟର ବଢିଚାଲିଥିବା ପ୍ରଭାବ ଚୀନକୁ ଚିନ୍ତାରେ ପକାଇଦେଇଛି ।