ନୂତନ କୃଷି ଆଇନକୁ ଆଇଏମ୍ଏଫ୍ ର ପ୍ରଶଂସା । ଆଇଏମ୍ଏଫ୍ କହିଲା ଏହି ଆଇନ କୃଷକ ମାନଙ୍କର ଅର୍ଥିକ ସୁଧାର ପାଇଁ ନିଭାଇବ ମହତ୍ୱପୂର୍ଣ୍ଣ ଭୂମିକା
କନକ ବ୍ୟୁରୋ : ଅର୍ନ୍ତରାଷ୍ଟ୍ରୀୟ ମୁଦ୍ରାକୋଷ ବା ଆଇଏମଏଫ ନୂତନ କୃଷି କାନୁନକୁ ପ୍ରଶଂସା କରିଛନ୍ତି । ଆଇଏମ୍ଏଫ୍ ତରଫରୁ କୁହାଯାଇଛି କି ଏହି କାନୁନ୍ କୃଷି କ୍ଷେତ୍ରର ସୂଧାର ପାଇଁ ସରକାରଙ୍କ ଏକ ମହତ୍ୱପୂର୍ଣ୍ଣ ପଦକ୍ଷେପ । ଆଇଏମଏଫର ପ୍ରବକ୍ତା ଗୌରୀ ରାଇସ ଏଭଳି ମନ୍ତବ୍ୟ ଦେବା ସହ ଆହୁରି କହିଛନ୍ତି କି ଏହି ଆଇନ ଦ୍ୱାରା ଯେଉଁ କୃଷକ ମାନଙ୍କର କ୍ଷତି ହେବ ସେମାନଙ୍କୁ ସରକାର ସାମାଜିକ ସୁରକ୍ଷା ଯୋଗାଇ ଦେବାର ଆବଶ୍ୟକତା ରହିଛି ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଭାରତରେ ଚାଲିଥିବା କୃଷକ ଆନ୍ଦୋଳନକୁ ନେଇ ଏକ ସାମ୍ବାଦିକ ସମ୍ମିଳନୀରେ ଗୌରୀ ରାଇସଙ୍କୁ ପ୍ରଶ୍ନ ପଚରା ଯାଇଥିଲା । ତାହାର ଉତ୍ତର ଦେଇ ସେ କହିଥିଲେ କି ଭାରତର କୃଷି କ୍ଷେତ୍ରରେ ସୁଧାର ପାଇଁ ଭାରତ ସରକାର ଆଣିଥିବା କାନୁନ ମହତ୍ୱପୂର୍ଣ୍ଣ ଭୂମିକା ନିଭାଇବ । ଏହି ଆଇନ ବଳରେ କୃଷକ ମାନେ ସେମାନଙ୍କ ଉତ୍ପାଦିତ ସାମଗ୍ରୀ ବିକ୍ରି ବେଳେ ବ୍ୟବସାୟୀ ମାନଙ୍କ ସହ ମୂଲଚାଲ କରିପାରିବେ । ଏହି ଆଇନ ବଳରେ ବ୍ୟବସାୟୀଙ୍କ ମନମୁଖୀ କାରବାର ଉପରେ ବି ରୋକ୍ ଲାଗିପାରିବ । ଏହାସହ ବ୍ୟବସାୟୀ ଓ କୃଷକଙ୍କ ମଧ୍ୟରେ ଏନେଇ କିଛି ବିବାଦ ହେଲେ କୃଷକଙ୍କୁ ସାମାଜିକ ସୁରକ୍ଷା ଯୋଗାଇ ଦେବା ସରକାରଙ୍କ ଦାୟିତ୍ୱ ହେବା ଦରକାର ।
ଅନ୍ୟପଟେ ଆଜି ସରକାର ଓ କୃଷକ ସଂଗଠନ ମାନଙ୍କ ମଧ୍ୟରେ ନବମ ଥର ପାଇଁ ବୈଠକ ବସିଛି । ହେଲେ ବୈଠକ ପୂର୍ବରୁ କିଛି କୃଷକ ନେତା କହିଛନ୍ତି କି ଏହି ଆଲୋଚନାରୁ କିଛି ନିଷ୍କର୍ସ ବାହାରିବ ତାହା ଆଶା କରାଯାଉ ନାହିଁ । କାରଣ ଆଇନ ପ୍ରତ୍ୟାହାର ବ୍ୟତିିତ ଆମେ ଅନ୍ୟ କିଛି ପ୍ରସ୍ତାବରେ ରାଜି ହେବୁ ନାହିଁ ବୋଲି କୃଷକ ନେତା ମାନେ ମତ ଦେଇଛନ୍ତି ।
ସେପଟେ କୃଷକ ଆନ୍ଦୋଳନ ଉପରେ ରୋକ୍ ଲଗାଇବାକୁ ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ କମିଟିର ବୈଠକ ୧୯ ତାରିଖରେ ହେବ ବୋଲି ସୂଚନା ମିଳିଛି । ଫଳରେ ସରକାର ଓ କୃଷକ ମାନଙ୍କ ମଧ୍ୟରେ ବସିଥିବା ଆଜିର ବୈଠକ ଶେଷ ବୈଠକ ବୋଲି ଅନୁମାନ କରାଯାଉଛି ।