ତୃତୀୟ ମହଲାକୁ ବୈଜୟନ୍ତଙ୍କ ଆକ୍ରମଣ ନେଇ ରାଜନୀତି ଜୋର । ମୁଖପାତ୍ରଙ୍କ ପ୍ରତିକ୍ରିୟା, ଲକ୍ଷ୍ମଣରେଖା ଟପି ସାରିଛନ୍ତି ସାଂସଦ
କନକ ବ୍ୟୁରୋ : ତୃତୀୟ ମହଲା, ବିଜେଡି ବନାମ ବୈଜୟନ୍ତ ପଣ୍ଡା । ମୁଖ୍ୟମନ୍ତ୍ରୀଙ୍କ ଅଫିସ ଉପରେ ସୋସିଆଲ ମିଡିଆରେ ସାଂସଦ ବୈଜୟନ୍ତ ପଣ୍ଡାଙ୍କ ଆକ୍ରମଣ ରାଜନୀତି ଜୋର ଧରିଛି । ଆଜି ଏ ନେଇ ବିଜେଡି ପୁଣି ମୁହଁ ଖୋଲିଛି । ବିଜେଡି ମୁଖପାତ୍ର ପ୍ରଶାନ୍ତ ନନ୍ଦ କହିଛନ୍ତି, ଦଳରେ ରହିବା ପାଇଁ ଲକ୍ଷ୍ମଣରେଖା ଦରକାର ଓ ସେ ଏହା ଟପି ସାରିଛନ୍ତି । ଅନ୍ୟ ଦଳକୁ ଧରିଲେ ବି ଚିନ୍ତା ନାହିଁ । ସେ ରୋକଠୋକ ଶୁଣାଇଛନ୍ତି- ଆମ ସପକ୍ଷବାଦୀଙ୍କ ସଂଖ୍ୟା ଏତେ ଅଧିକ ଯେ ବିରୋଧୀଙ୍କ କଥା ଚିନ୍ତା କରୁନା । ମୁଖ୍ୟମନ୍ତ୍ରୀ ଠିକ ସମୟରେ ଠିକ ପଦକ୍ଷେପ ନେବେ । ପ୍ରଥମ ଥର ଲାଗି ଦଳର ସଭାପତି ଏହି ପ୍ରସଙ୍ଗ ଉପରେ ଧ୍ୟାନ ଦେଇଛନ୍ତି । ମୁଖ୍ୟମନ୍ତ୍ରୀଙ୍କ ଦପ୍ତର ଉପରେ ସୋସିଆଲ ମିଡିିଆରେ ସାଂସଦ ବୈଜୟନ୍ତ ପଣ୍ଡାଙ୍କ ଘନ ଘନ ଆକ୍ରମଣ କରିଥିଲେ । ତୃତୀୟ ମହଲା ଉପରେ ବୈଜୟନ୍ତଙ୍କ ଟାର୍ଗେଟ୍ ପରେ, ଏ ନେଇ ପ୍ରତିକ୍ରିୟା ରଖିଥିଲେ ନବୀନ । ନବୀନଙ୍କ ପ୍ରତିକ୍ର୍ରିୟା ପରେ ତୃତୀୟ ମହଲାର ଅଧିକାରୀଙ୍କ ବିରୋଧରେ ପୁଣି ଥରେ ବର୍ଷିଥିଲେ ବୈଜୟନ୍ତ ।
Kanak News is now on WhatsApp
Join and get latest news updates delivered to you via WhatsApp
ନିଶ୍ଚିନ୍ତ କୋଇଲିରେ ପାଣି ଟାଙ୍କି ଉଦଘାଟନ ସମୟରେ ବିଜେଡିର କର୍ମୀମାନେ କୌଣସି ବାଧା ଦେଇ ନଥିଲେ ଏବଂ ସାଂସଦ ସିଧା ସିଧା ପାଣି ଟାଙ୍କି ଉଦଘାଟନ କରିଥିଲେ । କିନ୍ତୁ ପାଣିଟାଙ୍କି ଉଦଘାଟନ ପରେ ତୃତୀୟ ମହଲାର ନିର୍ଦ୍ଦିଷ୍ଟ ଅଫିସରଙ୍କୁ ଟାର୍ଗେଟ କରିଥିଲେ । ଏପରିକି ବିଜୁ ତତ୍ତ୍ୱ କଥା ବି ମନେ ପକାଇ ଦେଇଥିଲେ । ବିଜୁ ବାବୁ କହିଥିଲେ ଯେଉଁ ଅଫିସର କାମ କରୁନାହିଁ ତାକୁ ମାଡ଼ ମାର । ଆଉ ପରୋକ୍ଷରେ ବୈଜୟନ୍ତ ଏଭଳି ଇସାରା କରିବାକୁ ପଛାଇ ନଥିଲେ । ଏହାସହ ବୈଜୟନ୍ତ କହିଥିଲେ କିଛି ଅଫିସର ଏବେ ନିଜ ଲକ୍ଷ୍ମଣ ରେଖା ଡେଇଁ ଦଳୀୟ କାର୍ୟ୍ୟକ୍ରମରେ ମୁଣ୍ଡ ପୂରାଉଛନ୍ତି । ସେହିଭଳି ନେତାଙ୍କୁ ସମ୍ମାନ ଦେବା ଆବଶ୍ୟକ ନାହିଁ ।
ତେବେ ବୈଜୟନ୍ତଙ୍କ ଏଭଳି ବୟାନକୁ ଭିନ୍ନ ଦୃଷ୍ଟିରେ ଦେଖୁଥିଲା ବିଜେଡି । ଦଳର ବରିଷ୍ଠ ନେତା ତଥା ସାଂସଦ ପ୍ରତାପ ଦେବ ବି ଆଶଙ୍କା କରୁଥିଲେ ବିଜେପିରେ ଯୋଗ ଦେବାକୁ ଚାହୁଁଛନ୍ତି ବୈଜୟନ୍ତ । ସେଥିପାଇଁ ଏଭଳି ଯୁକ୍ତି ରଖିଛନ୍ତି ସାଂସଦ । କାରଣ ଅଫିସର ମାନେ ରାଜନୀତି କରୁଛନ୍ତି ବୋଲି ପୂର୍ବରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର କହୁଥିଲେ ଏବେ ବୈଜୟନ୍ତ କହୁଛନ୍ତି । ତେଣୁ ଦୁଇଜଣଙ୍କର ଏବେ ଗୋଟିଏ ସ୍ୱର ହୋଇଯାଇଛି । ବୈଜୟନ୍ତଙ୍କ ଏହି ବୟାନ ପରେ ସେ ବିଜେପିରେ ଯୋଗଦେବା ନେଇ ଚର୍ଚ୍ଚା ହୋଇଛି । ଏନେଇ ପ୍ରତାପ ଦେବ କହିଛନ୍ତି, ବୈଜୟନ୍ତ ବିଜେପିରେ ମିଶିବେ କି ନାହିଁ ସେଇଟା ସେ କହିବେ । କିନ୍ତୁ ଯେହେତୁ ନିର୍ବାଚନ ପାଖେଇ ଆସିଲାଣି ତେଣୁ ଏଭଳି ବୟାନ ଆହୁରି ଦେଖିବାକୁ ମିଳିବ