ହ୍ଵାଟସଆପ୍‌ ତଥ୍ୟକୁ ନିୟନ୍ତ୍ରଣ କରାଯାଇପାରିବ : ସୂଚନା ଦେଲେ ସରକାର

1

କୌଣସି ସେବା ପ୍ରଦାନକାରୀ ବା ସୋସିଆଲ ମିଡିଆ ପ୍ଲାଟଫର୍ମ ପକ୍ଷରୁ ଯଦି ଜଣଙ୍କ ବ୍ୟକ୍ତିଗତ ତଥ୍ୟ କାହାରିକୁ ପ୍ରଦାନ କରାଯାଏ ତାହା ସମ୍ବିଧାନର ଧାରା ୨୧ ଅନୁଯାୟୀ ତାହା ଜଣଙ୍କ ବ୍ୟକ୍ତିଗତ ଗୋପନୀୟତା ଅଧିକାରକୁ କ୍ଷୁର୍ଣ୍ଣ କରୁଛି । ତେଣୁ ଯଦି କୌଣସି ସେବା ପ୍ରଦାନକାରୀ ବା ସୋସିଆଲ ମିଡିଆ ପ୍ଲାଟଫର୍ମ ଯିଏ କି ଜଣଙ୍କ ଜୀବନ ପ୍ରତି ଅଧିକାରରେ ହସ୍ତକ୍ଷେପ କରୁଛି ତାହାକୁ ନିୟନ୍ତ୍ରଣ କରାଯିବାର ଆବଶ୍ୟକତା ରହିଛି । ସୁପ୍ରିମକୋର୍ଟର ବିଚାରପତି ଜଷ୍ଟିସ ଦୀପକ ମିଶ୍ରଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ଖଣ୍ଡପୀଠରେ ସରକାର ଆଜି ଏହି ମତ ରଖିଛନ୍ତି ।

୨୦୧୬ରେ ଫେସବୁକ୍‌ ଏବଂ ହ୍ଵାଟସଆପ୍‌ ମଧ୍ୟରେ ହୋଇଥିବା ତଥ୍ୟ ଆଦାନପ୍ରଦାନ ରାଜିନାମାକୁ ବିରୋଧ କରି କେତେଜଣ ଛାତ୍ର ଅଦାଲତର ଦ୍ୱାରସ୍ଥ ହୋଇଛନ୍ତି । ତଥ୍ୟ ଆଦାନ ପ୍ରଦାନ ଗୋପନୀୟତା ଆଇନର ଉଲ୍ଲଂଘନ କରୁଛି ବୋଲି ଏମାନେ ଅଭିଯୋଗ କରିଛନ୍ତି । ଏହି ତଥ୍ୟ ମଧ୍ୟରେ ହ୍ଵାଟସଆପରେ ବ୍ୟବହାରକାରୀମାନେ ଆଦାନପ୍ରଦାନ କରୁଥିବା ଫଟୋ, ମେସେଜ୍‌, ପିକ୍‌ଚର ଆଦି ଅନ୍ତର୍ଭୁକ୍ତ । ସରକାରଙ୍କ ପକ୍ଷରୁ ଅତିରିକ୍ତ ସଲିସିଟର ଜେନେରାଲ ପି. ଏସ. ନରସିଂହ ଯୁକ୍ତି ଉପସ୍ଥାପନ କରି କହିଲେ, ମୋ ବ୍ୟକ୍ତିତ୍ୱ ସମ୍ପର୍କିତ ତଥ୍ୟ ମୋ ଜୀବନ ଏବଂ ମର୍ଯ୍ୟାଦାର ଅବିଚ୍ଛିନ୍ନ ଅଙ୍ଗ ।

ତେଣୁ ସମ୍ବିଧାନର ଧାରା ୨୧ ଉପରେ ଯଦି କେହି ହସ୍ତକ୍ଷେପ କରେ ତାହାକୁ ନିୟନ୍ତ୍ରିତ କରାଯିବା ଉଚିତ ବୋଲି ସେ କହିଛନ୍ତି । ତେବେ ଆଧାର ମାମଲାରେ ସରକାର ୯ ଜଣିଆ ବିଚାରପତିଙ୍କୁ ନେଇ ଗଠିତ ସାମ୍ବିଧାନିକ ଖଣ୍ଡପୀଠ ସମ୍ମୁଖରେ ବ୍ୟକ୍ତିଗତ ଗୋପନୀୟତା ଉପରେ ଯେଉଁ ମତ ରଖିଛନ୍ତି ତାହା ସହିତ ଏହି ଖଣ୍ଡପୀଠରେ ରଖିଥିବା ମତ ଖାପ ଖାଉନାହିଁ । ଆଧାର ମାମଲାରେ ସରକାର ଯୁକ୍ତି ବାଢ଼ିଛନ୍ତି ଯେ, ସମ୍ବିଧାନ ଅନୁଯାୟୀ ଗୋପନୀୟତା ଏକ ମୌଳିକ ଅଧିକାର ନୁହେଁ । ଏହା ଏକ ସାଧାରଣ ଆଇନଗତ ଅଧିକାର ଏବଂ ଏଥିରେ ସରକାର ହସ୍ତକ୍ଷେପ କରିପାରିବେ ।

Comments are closed.