କାରଗିଲ୍ ଯୁଦ୍ଧରେ ଶତ୍ରୁଦେଶକୁ ନାକେଦମ୍ କରିଥିବା ଏଭଳି ଜଣେ ସାହସୀ ଯବାନଙ୍କ ବିଜୟ ଗାଥା,ଯାହାଙ୍କୁ ଆଜି ମଧ୍ୟ ଝୁରୁଛି ଭାରତ ।
ଦେଶ ପାଇଁ,ମାତୃଭୂମି ପାଇଁ ହସି ହସି ଜୀବନକୁ ବାଜି ଲଗାଇବାର ସତସାହସ ଜଣେ ବୀର ଯବାନ ହିଁ ଜୁଟାଇ ପାରିବେ । ଖରା,ବର୍ଷାକୁ ଭ୍ରୁକ୍ଷେପ ନକରି ବିପଦପୂର୍ଣ୍ଣ ସୀମାରେ ନିଜ ଜୀବନର ଅନ୍ତିମ ମୂହୁର୍ତ୍ତରେ ମଧ୍ୟ ଜଣେ ଯବାନ ପରିବାରକୁ ପଛରେ ପକାଇ ଭାରତମାତା ଏବଂ ଭାରତୀୟଙ୍କ ସୁରକ୍ଷା ସକାଶେ ଅହରହ ଚେଷ୍ଟା କରିଥାଏ । ଯାହାଙ୍କ ବଳିଦାନ ଯୋଗୁଁ ଆଜି ଭାରତ ଦେଶର ପ୍ରତ୍ୟେକଟି ଘରେ ଲୋକେ ଆରାମରେ ନିଶ୍ୱାସ ମାରି ପାରୁଛନ୍ତି । କହିବାକୁ ଗଲେ ବାସ୍ତବ ଜୀବନରେ ଭାରତୀୟଙ୍କ ହିରୋ ପାଲଟିଥିବା ବୀର ଯବାନଙ୍କ ଋଣ କେହି ଚାହିଁଲେ ବି ଶୁଝି ପାରିବେ ନାହିଁ । ଆଜି ଆମେ ଏଭଳି ଜଣେ ସାହସୀ ଯବାନଙ୍କ କଥା କହିବାକୁ ଯାଉଛୁ ଯେ କାରଗିଲ୍ ଯୁଦ୍ଧ ସମୟରେ ଶତ୍ରୁଙ୍କୁ ନାକେଦମ୍ କରି ଶେଷରେ ନିଜ ସାଥିଙ୍କୁ ବଞ୍ଚାଇବାକୁ ଯାଇ ନିଜେ ସହିଦ୍ ହୋଇଯାଇଥିଲେ । ପରମବୀର ଚକ୍ର ପ୍ରାପ୍ତ କରିଥିବା ସେହି ଭାରତମାତାର ସାହସୀ ସନ୍ତାନ ହେଲେ କ୍ୟାପଟେନ୍ ବିକ୍ରମ ବତ୍ରା । ବିକ୍ରମ ବତ୍ରା କାରଗିଲ ଯୁଦ୍ଧରେ ଅଦ୍ଭୁତପୂର୍ଣ୍ଣ ବୀରତାର ପରିଚୟ ଦେଇ ସହିଦ ହୋଇଯାଇଥିଲେ । ଏହାପରେ ତାଙ୍କୁ ଭାରତର ବୀରତା ସମ୍ମାନ ପରମବୀର ଚକ୍ରରେ ସମ୍ମାନିତ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
୧୯୯୯ ମସିହା ଜୁନ ମାସ ୧୯ ତାରିଖରେ କ୍ୟାପଟେନ୍ ବିକ୍ରମ ବତ୍ରାଙ୍କ ଲିଡରସିପରେ ଭାରତୀୟ ସେନା ପାକିସ୍ତାନ ବିପକ୍ଷରେ ଯୁଦ୍ଧ କ୍ଷେତ୍ରରେ ଓହ୍ଲାଇଥିଲା ଏବଂ ସେହି ବର୍ଷ ଜୁଲାଇ ମାସ ୭ ତାରିଖରେ ତାଙ୍କର ମୃତ୍ୟୁ ନିଜର ଜଣେ ସାଥୀ ଅଫିସରଙ୍କୁ ବଞ୍ଚାଇବାକୁ ଯାଇ ହୋଇଥିଲା । ଏହି ଅଫିସରଙ୍କୁ ବଞ୍ଚାଇବା ବେଳେ ବିକ୍ରମ କହିଥିଲେ ତୁମ୍ ହଟ୍ ଯାଓ, ତୁମହାରେ ବିବି-ବଚେ ହେଁ । ତେବେ ସବୁବେଳେ ନିଜ ମିଶନରେ ସଫଳତା ପାଇବା ପରେ କ୍ୟାପଟେନ୍ ବିକ୍ରମ ବତ୍ରା ଜୋରରେ ଚିଲାଇଥାନ୍ତି । ତାଙ୍କ ସାଥୀ ନବୀନ, ଯିଏକି ବଙ୍କରରେ ତାଙ୍କ ସହ ଥିଲେ, ସିଏ କହନ୍ତି ଯେ, ହଠାତ ଏକ ବମ୍ ଆସି ତାଙ୍କ ପାଦ ପାଖରେ ଫାଟିଥିଲା । ନବୀନ ସମ୍ପୂର୍ଣ୍ଣ ଭାବରେ ଆହତ ହୋଇଯାଇଥିଲେ । କିନ୍ତୁ ବିକ୍ରମ ବତ୍ରା ସଙ୍ଗେ ସଙ୍ଗେ ତାଙ୍କୁ ସେଠାରୁ ହଟାଇଥିଲେ । ଆଉ ଯେଉଁଥିପାଇଁ ତାଙ୍କ ଜୀବନ ବଞ୍ଚିଯାଇଥିଲା । କିନ୍ତୁ ଏହା ପରେ ଘଟିଥିଲା ଅତି ହୃଦୟ ବିଦାରକ ଘଟଣା । ଆଉ ଜଣେ ସାଥୀ ଅଫିସରଙ୍କୁ ବଞ୍ଚାଇବାକୁ ଯାଇ ସହିଦ ହୋଇଯାଇଥିଲେ କ୍ୟାପଟେନ୍ ବିକ୍ରମ ବତ୍ରା ।
କ୍ୟାପଟେନ୍ ବିକ୍ରମ ବତ୍ରାଙ୍କ ସାହସିକତାର କାହାଣୀ ନା କେବଳ ଭାରତ ମନେ ରଖିଛି ବରଂ ପାକିସ୍ତାନରେ ମଧ୍ୟ ବିକ୍ରମ ଅତ୍ୟନ୍ତ ପପୁଲାର ଅଟନ୍ତି । ଗୋଟିଏ ସମୟରେ ବିକ୍ରମ ମଧ୍ୟ ପାକିସ୍ତାନର ମୁଣ୍ଡବିନ୍ଧାର କାରଣ ପାଲଟିଥିଲେ । ବିକ୍ରମ ବତ୍ରାଙ୍କର ୧୩ ଜାକ୍ ରାଇଫଲ୍ସରେ ୧୯୯୭ ମସିହା ଡିସେମ୍ବର ୬ ତାରିଖରେ ଲେଫ୍ଟନେଣ୍ଟ ପୋଷ୍ଟରେ ପୋଷ୍ଟିଂ ହୋଇଥିଲା । ତେବେ ଦୁଇବର୍ଷ ମଧ୍ୟରେ ହିଁ ସେ କ୍ୟାପଟେନ୍ ହୋଇଯାଇଥିଲେ । ଆଉ ସେହି ସମୟରେ କାରଗିଲ୍ ଯୁଦ୍ଧ ଆରମ୍ଭ ହୋଇଯାଇଥିଲା । ବିକ୍ରମ ସହିଦ ହୋଇଗଲେ ସତ କିନ୍ତୁ ଯେତେ ପର୍ୟ୍ୟନ୍ତ ବଞ୍ଚିଥିଲେ ନିଜ ସାଥୀ ଅଫିସରଙ୍କ ଜୀବନ ବଞ୍ଚାଇଥିଲେ । ଯେଉଁଥିପାଇଁ ଆଜି ସାରା ଦେଶ ତାଙ୍କୁ ମନେ ରଖିଛି ଆଉ ସେ ଦେଶ ପାଇଁ ଅମର ହୋଇ ରହିଛନ୍ତି ।