ହକି ବିଶ୍ୱକପ ଉଦଘାଟନୀ ଉତ୍ସବ : ଆଜି ଅନଲାଇନରେ ବିକ୍ରି ହେବ ଟିକେଟ, ଜାଣନ୍ତୁ କେଉଁ ସାଇଟକୁ ଯାଇ କିଣିବେ ଟିକେଟ
କନକ ବ୍ୟୁରୋ : ହକି ବିଶ୍ୱକପର ଉଦଘାଟନୀ ଉତ୍ସବ ପାଇଁ ଆଜି ଅନଲାଇନରେ ବିକ୍ରି ହେବ ଟିକେଟ । ଦିନ ୧୨ଟା ସମୟରେ ଅନଲାଇନରେ ଟିକେଟ ବିକ୍ରି ହେବ । ଆଉ ଏହି ସମୟକୁ ଅପେକ୍ଷା କରି ବସିଛନ୍ତି ହକି ପ୍ରେମୀ ।୨୭ ଓ ୨୮ ଦୁଇଦିନ ଧରି ଭୁବନେଶ୍ୱର ଓ କଟକରେ ଆୟୋଜିତ ହେଉଥିବା ଉଦଘାଟନୀ ଉତ୍ସବ ପାଇଁ ଟିକେଟ ବିକ୍ରି କରାଯିବ । ଏନେଇ ହକି ଇଣ୍ଡିଆ ପକ୍ଷରୁ ପୂର୍ବରୁ ଘୋଷଣା କରାଯାଇଥିଲା । ହକିପ୍ରେମୀ ମାନେ www.ticketgenie.in ସାଇଟକୁ ଯାଇ ଅନଲାଇନରେ ଟିକେଟ କିଣିପାରିବେ । ପରେ ୨୨ ତାରିଖ ଅପରାହ୍ନ ୩ଟା ସମୟରେ କଳିଙ୍ଗ ଷ୍ଟାଡିୟମର ୪ ନମ୍ବର ଗେଟ କାଉଣ୍ଟରୁ ଟିକେଟ ନେଇପାରିବେ ହକିପ୍ରେମୀ ।
Kanak News is now on WhatsApp
Join and get latest news updates delivered to you via WhatsApp
କଳିଙ୍ଗ ଷ୍ଟାଡିୟମରେ ହେବାକୁ ଥିବା ଉଦଘାଟନୀ ଉତ୍ସବ ପାଇଁ ଟିକେଟର ମୂଲ୍ୟ ୫୦୦ ଟଙ୍କା ଥିବା ବେଳେ ବାରବାଟୀ ଷ୍ଟାଡିୟମରେ ହେବାକୁ ଥିବା ଉଦଘାଟନୀ ଉତ୍ସବ ପାଇଁ ଟିକେଟର ମୂଲ୍ୟ ୧୦୦ରୁ ୫୦୦ ଟଙ୍କା ପର୍ଯ୍ୟନ୍ତ ରହିଛି । ଉଦଘାଟନୀ ଉତ୍ସବ ପାଇଁ କୌଣସି ପାସର ବ୍ୟବସ୍ଥା ରହିନାହିଁ । କଳିଙ୍ଗ ଷ୍ଟାଡିୟମ ପାଇଁ ପ୍ରାୟ ୧୨୦୦୦ ଟିକେଟ ବିକ୍ରି ହେବାକୁ ଥିବା ବେଳେ ବାରବାଟୀ ଷ୍ଟାଡିୟମ ପାଇଁ ୩୦୦୦୦ ଟିକେଟ ବିକ୍ରି ହେବାକୁ ରହିଛି ।
ଗତକାଲି ହକି ଇଣ୍ଡିଆର ସିଇଓ ଏଲାନା ନରିମାନ ମୁଖ୍ୟମନ୍ତ୍ରୀଙ୍କୁ ଭେଟି ଉଦଘାଟନୀ ଉତ୍ସବର ପ୍ରଥମ ଟିକେଟ ଦେଇଥିଲେ । ଏଥିପାଇଁ ନବୀନ ୫୦୦ ଟଙ୍କା ମଧ୍ୟ ଦେଇଥିଲେ । ହକି ବିଶ୍ୱକପର ଉଦଘାଟନୀ ଉତ୍ସବରେ ବଲିଉଡ କଳାକାର ଶାହାରୁଖ ଖାନ, ଓସ୍କାର ବିଜେତା ଏ.ଆର ରେହମାନ ଯୋଗ ଦେଉଥିବାରୁ ଏହାକୁ ନେଇ ହକିପ୍ରେମୀଙ୍କ ମଧ୍ୟରେ ଜବରଦସ୍ତ କ୍ରେଜ ରହିଛି । ବଲିଉଡ ତାରକାଙ୍କୁ ଏତେ ପାଖରୁ ଦେଖିବାର ସୁଯୋଗ ହାତଛଡା କରିବାକୁ ଚାହୁଁନାହାନ୍ତି କ୍ରୀଡାପ୍ରେମୀ । ଏହାଛଡା ଭାରତ ଖେଳିବାକୁ ଥିବା ମ୍ୟାଚ୍ ଗୁଡିକର ଟିକେଟ ଶେଷ ହୋଇଯାଇଛି ।