ଆରମ୍ଭ ହେଲା ଜିଏସଟି ଯୁଗ : ଏବେ ଗୋଟିଏ ଦେଶ ଗୋଟିଏ ବଜାର, ଗୋଟିଏ ଦେଶ ଗୋଟିଏ ଟିକସ
ଏବେ ଗୋଟିଏ ଦେଶ ଗୋଟିଏ ବଜାର, ଗୋଟିଏ ଦେଶ ଗୋଟିଏ ଟିକସ । ଏହି ଲକ୍ଷ୍ୟ ନେଇ ଶୁକ୍ରବାର ମଧ୍ୟରାତ୍ରିରୁ ଆରମ୍ଭ ହୋଇଛି ଜିଏସଟି ଯୁଗ । ସାରାଦେଶରେ ଲାଗୁ ହୋଇଛି ଜିଏସଟି ବା ସାମଗ୍ରୀ ଓ ସେବା କର । ସଂସଦର ଐତିହାସିକ ସେଣ୍ଟ୍ରାଲ ହଲରେ ମଧ୍ୟରାତ୍ରିରେ ଅନୁଷ୍ଠିତ ଏକ ଭବ୍ୟ ସମାରୋହରେ ରାଷ୍ଟ୍ରପତି ପ୍ରଣବ ମୁଖାର୍ଜୀ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୁଇଚ୍ ଦବାଇ ଜିଏସଟିର ଶୁଭାରମ୍ଭ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦେଶର ଟିକସ୍ ଇତିହାସରେ ସବୁଠାରୁ ବଡ଼ ସଂସ୍କାର ଭାବରେ ଉତ୍ପାଦ ଶୁଳ୍କ, ସେବା କର ଏବଂ ଭାଟ୍ ଭଳି କେନ୍ଦ୍ର ଓ ରାଜ୍ୟ ସରକାରଙ୍କର ୧୬ ପ୍ରକାର ଟିକସକୁ ଉଚ୍ଛେଦ କରାଯାଇ ତା ବଦଳରେ ଗୋଟିଏ ପ୍ରକାର ଟିକସ ‘ଜିଏସଟି’ ବ୍ୟବସ୍ଥା ପ୍ରଚଳନ କରାଯାଇଛି । ଏହି ନୂତନ ଟିକସ ବ୍ୟବସ୍ଥା ୧୩୦ ଲକ୍ଷ କୋଟି ଟଙ୍କାର ଭାରତୀୟ ଅର୍ଥନୀତିକୁ ୧୩୦ କୋଟି ଲୋକଙ୍କ ସହିତ ଯୋଡ଼ି ଗୋଟିଏ ବଜାରରେ ପରିଣତ କରିବ ବୋଲି କୁହାଯାଉଛି ।
ସଂସଦର ଏହି ସ୍ୱତନ୍ତ୍ର ସମାରୋହ ରାତି ୧୧ଟାରୁ ଆରମ୍ଭ ହୋଇ ୧୨ଟା ୫ ମିନିଟ୍ ପର୍ୟ୍ୟନ୍ତ ଚାଲିଥିଲା । ଏହି କାର୍ୟ୍ୟକ୍ରମରେ ଉପରାଷ୍ଟ୍ରପତି ହମିଦ ଅନସାରୀ, ପୂର୍ବତନ ପ୍ରଧାନମନ୍ତ୍ରୀ ଦେବେଗୌଡ଼ା, ଲୋକସଭା ବାଚସ୍ପତି ସୁମିତ୍ରା ମହାଜନ, ରିଜର୍ଭ ବ୍ୟାଙ୍କ ଗଭର୍ଣ୍ଣର ଉର୍ଜିତ୍ ପଟେଲଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ । ଏହି ଅବସରରେ ରାଷ୍ଟ୍ରପତି ଏହାକୁ ଐତିହାସିକ ସଫଳତା ବୋଲି ବର୍ଣ୍ଣନା କରିଥିବା ବେଳେ ପ୍ରଧାନମନ୍ତ୍ରୀ ଏହାକୁ ସବୁ ଦଳ ଓ ସରକାରଙ୍କ ମିଳିତ ଉଦ୍ୟମର ଫଳ ବୋଲି କହିଥିଲେ ।
ପ୍ରଧାନମନ୍ତ୍ରୀ କହିଲେ ଯେ ଜିଏସଟି କେବଳ ଏକ ଟିକସ ସଂସ୍କାର ନୁହେଁ, ଅର୍ଥନୈତିକ ସଂସ୍କାର ଦିଗରେ ଏକ ବଡ଼ ପଦକ୍ଷେପ । ସ୍ୱାଧୀନତା ପରେ ସର୍ଦ୍ଦାର ବଲ୍ଲଭ ଭାଇ ପଟେଲ ଦେଶକୁ ଯେଉଁଭଳି ଏକତ୍ରିତ କରିଥିଲେ ଜିଏସଟି ସେହିଭଳି ଦେଶର ଅର୍ଥନୈତିକ ଏକତ୍ରୀକରଣରେ ସହାୟକ ହେବ । ଜିଏସଟି କୌଣସି ଗୋଟିଏ ଦଳ ବା ସରକାରର ସଫଳତା ନୁହେଁ । ଏହା ଏକ ମିଳିତ ଉଦ୍ୟମର ଫଳ । ଏଥିପାଇଁ ସମସ୍ତ ରାଜନୈତିକ ଦଳ ଏବଂ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ସେ ଅଭିନନ୍ଦନ ଜଣାଇଥିଲେ ।
ସେ ଆହୁରି କହିଲେ, ଭାରତର ବିଭିନ୍ନ ପ୍ରକାର ଟିକସକୁ ନେଇ ବିଦେଶୀ ନିବେଶକଙ୍କ ମନରେ ରହିଥିବା ଦ୍ୱନ୍ଦ୍ୱ ଜିଏସଟି ଦ୍ୱାରା ଦୂର ହୋଇଯିବ । ଏହା ଅର୍ଥନୈତିକ ପ୍ରତିବନ୍ଧକ ହଟାଇ ଦେବ । ନୂତନ ଟିକସ ବ୍ୟବସ୍ଥା ଦ୍ୱାରା ଗରିବ ଲୋକମାନେ ଲାଭବାନ ହେବେ । ଏହା ଟିକସ ଆତଙ୍କବାଦ ଏବଂ ଇନ୍ସପେକ୍ଟରରାଜରେ ପୂର୍ଣ୍ଣଚ୍ଛେଦ ପକାଇବ । ସର୍ବୋପରି କଳାଧନକୁ ରୋକିବାରେ ଏହାର ଗୁରୁତ୍ୱପୂର୍ଣ୍ଣ ଭୂମିକା ରହିବ ।
ରାତି ପ୍ରାୟ ୧୧ଟାରେ ଜିଏସଟି ପାଇଁ ଆୟୋଜିତ ଏହି ଉତ୍ସବ ଅର୍ଥମନ୍ତ୍ରୀ ଅରୁଣ ଜେଟଲିଙ୍କ ଅଭିଭାଷଣ ସହ ଆରମ୍ଭ ହୋଇଥିଲା । ଦେଶ ପାଇଁ ଏହା ଏକ ମହତ୍ୱପୂର୍ଣ୍ଣ ସଫଳତା ବୋଲି ସେ କହିଥିଲେ । ଜିଏସଟି ଲାଗୁ ହେବା ଦ୍ୱାରା ଦେଶରେ ଗୋଟିଏ ଟିକସ ବ୍ୟବସ୍ଥା ଲାଗି ଦୀର୍ଘ ୧୭ ବର୍ଷ ଧରି ଚାଲିଥିବା କସରତ ଆଜି ଫଳପ୍ରଦ ହେଲା ବୋଲି କୁହାଯାଉଛି ।
ଉଲ୍ଲେଖଯୋଗ୍ୟ ଯେ ମୁଖ୍ୟ ବିରୋଧୀ ଦଳ କଂଗ୍ରେସ ସମେତ, ତୃଣମୂଳ କଂଗ୍ରେସ, ବାମ ସାମ୍ମୁଖ୍ୟ, ରାଷ୍ଟ୍ରୀୟ ଜନତା ଦଳ, ଡିଏମକେ ଆଜିର ଏହି ଉତ୍ସବକୁ ବର୍ଜନ କରିଥିଲେ ।