ଦିଲ୍ଲୀରେ ମନ୍ଥନ, ଉତ୍ତର ପ୍ରଦେଶରେ କମ୍ପନ । ବିଜେପି ବିରୋଧରେ ୟୁପିରେ ଆସନ ବୁଝାମଣା କଲେ ଏସପି ଓ ବିଏସପି
ବିଜେପି ଜାତୀୟ ପରିଷଦରେ ମୋଦିଙ୍କ ଟାର୍ଗେଟ: କହିଲେ, ଦେଶକୁ ଦୁର୍ବଳ ସରକାର ଦେବ ବିରୋଧୀ ମେଂଟ
କନକ ବ୍ୟରୋ: ଦୀର୍ଘଦିନର ମତଭେଦକୁ ଭୁଲି ହାତ ମିଶାଇଛନ୍ତି ଏସପି ଓ ବିଏସପି । ଉତର ପ୍ରଦେଶରେ ମୋଦି ବିରୋଧରେ ମହାମେଂଟ କରିଛନ୍ତି ସମାଜବାଦୀ ପାର୍ଟି ଓ ବହୁଜନ ସମାଜ ପାର୍ଟି । ଆସନ୍ତା ସାଧାରଣ ନିର୍ବାଚନରେ ଉଭୟ ଦଳ ସମାନ ସଂଖ୍ୟକ ୩୮ଟି ଲେଖାଏଁ ଆସନରେ ଲଢିବେ । ତେବେ ମହାମେଂଟରୁ କଂଗ୍ରେସକୁ ବାଦ୍ ଦିଆଯାଇଛି । ସେପଟେ ଦିଲ୍ଲୀ ରାମଲୀଳା ମୈଦାନରେ ବିଜେପି ଜାତୀୟ ପରିଷଦ ବୈଠକରେ ଆଗାମୀ ରଣନୀତି ସ୍ଥିର କରିଛନ୍ତି ନରେନ୍ଦ୍ର ମୋଦି । ଲୋକସଭା ନିର୍ବାଚନ ଲାଗି ପ୍ରସ୍ତୁତ ହେବାକୁ ଦିଲ୍ଲୀରେ ହୋଇଛି ବିଜେପିର ମାନସ ମନ୍ଥନ । ଯେଉଁଥିରେ କର୍ମୀଙ୍କୁ ବିଜୟର ମନ୍ତ୍ର ଦେଇଛନ୍ତି ମୋଦି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ସାଧାରଣ ନିର୍ବାଚନ ଲଢେଇର ଚିତ୍ର କିଭଳି ହେବ, ତାର ଏକ ମୋଟାମୋଟି ରୁପରେଖ ଶନିବାର ସ୍ପଷ୍ଟ ହୋଇଥିବା କୁହାଯାଉଛି । ଯେତିକିବେଳେ ଦିଲ୍ଲୀ ରାମଲୀଲା ମୈଦାନରେ ବିଜେପି ଜାତୀୟ ପରିଷଦ ବୈଠକରେ ଆଗାମୀ ରଣନୀତି ସ୍ଥିର କରିଛନ୍ତି ଦଳର ସର୍ବୋଚ୍ଚ ନୀତି ନିର୍ଦ୍ଧାରକ । ଆଉ ସେପଟେ ମୋଦୀଙ୍କ ପଥରୋଧ କରିବାକୁ ଏକାଠି ହୋଇଛନ୍ତି ପରସ୍ପରର ଘୋର ବିରୋଧୀ ଏସପି ଓ ବିଏସପି । କୁହାଯାଉଛି ଶତ୍ରୁର ଶତ୍ରୁ ମିତ୍ର ନ୍ୟାୟରେ ଏକାଠି ହୋଇଛନ୍ତି ସାପ ଓ ନେଉଳ । ୨୦୧୪ରେ ବିଜେପିର ସଫଳତା ଓ ଗତ ବିଧାନସଭା ନିର୍ବାଚନରେ କ୍ଷମତା ହାତରୁ ଖସିଯିବା ପରେ ନିଜ ରାଜନୈତିକ ଭବିଷ୍ୟତ ଦୃଷ୍ଟିରୁ ହାତ ଧରାଧରି ହୋଇଛନ୍ତି ପରସ୍ପରର ଘୋର ବିରୋଧୀ ଅଖିଳେଶ ଓ ମାୟାବତୀ ।
ଆଗାମୀ ଲୋକସଭା ନିର୍ବାଚନ ଲାଗି ପ୍ରସ୍ତୁତ ହେବାକୁ ଦିଲ୍ଲୀରେ ଚାଲିଛି ବିଜେପିର ମାନସ ମନ୍ଥନ । ଆଉ ଜାତୀୟ ପରିଷଦକୁ ସମ୍ବୋଧିତ କରି ପ୍ରମୁଖ ପ୍ରତିଦ୍ୱନ୍ଦ୍ୱି କଂଗ୍ରେସ ଉପରେ ଜୋରଦାର ଆକ୍ରମଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କେବଳ ଜଣେ ବ୍ୟକ୍ତିକୁ ଅଟକାଇବା ଲାଗି ବିରୋଧୀମାନେ ଏକାଠି ହେଉଥିବା କହିଛନ୍ତି ମୋଦି । ବିଜେପି ଦେଶକୁ ମଜଭୂତ ସରକାର ଦେବାକୁ ଚାହୁଁଥିବାବେଳେ ବିରୋଧୀ ମଜବୁର ସରକାର ଦେବାକୁ ଚାହୁଁଥିବା ସେ ଟିପ୍ପଣୀ କରିଛନ୍ତି । ଏପଟେ ଦୀର୍ଘଦିନର ମତଭେଦକୁ ଭୁଲି ହାତ ମିଶାଇଛନ୍ତି ଏସପି ଓ ବିଏସପି । ୨୦୧୯ରେ ବିଜେପିର ବାଟ ଓଗାଳିବାକୁ ଆସନ ବୁଝାମଣା କରିଛନ୍ତି ମାୟାବତୀ ଓ ଅଖିଳେଶ ଯାଦବା ଚୁକ୍ତି ଅନୁସାରେ
ବିଜେପି ବିରୋଧରେ ଏସପି ଓ ବିଏସପିକୁ ନେଇ ମହାଗଠବନ୍ଧନର ପରିକଳ୍ପନା କରୁଥିବା କଂଗ୍ରେସକୁ ଲାଗିଛି ଶକ୍ତ ଝଟକା । କାରଣ କଂଗ୍ରେସକୁ ବାଦ ଦେଇ ମେଂଟ କରିଛନ୍ତି ଦୁଇ ଆଂଚଳିକ ଶକ୍ତି । ତେବେ ସୌଜନ୍ୟ ଦୃଷ୍ଟିରୁ କେବଳ ରାଏବରେଲି ଓ ଆମେଥି ଆସନକୁ କଂଗ୍ରେସ ପାଇଁ ଛାଡି ଦେଇଛନ୍ତି । ଯେଉଁଠାରୁ ନିର୍ବାଚନ ଲଢି ଆସୁଛନ୍ତି ସୋନିଆ ଓ ରାହୁଲ । କଂଗ୍ରେସକୁ ଆମେଥି ଓ ରାଏବରେଲି ଆସନ ଛାଡି ଦେବା ପଛରେ ରହିଛି ଏକ ବଡ ମେସେଜ୍ । ୟୁପିରେ ପିଉସୀ-ପୁତୁରାଙ୍କ ମୁଖ୍ୟ ଲଢେଇ କଂଗ୍ରେସ ସହ ନୁହେଁ, ବରଂ ବିଜେପି ସହିତ ବୋଲି ସ୍ପଷ୍ଟ ସଂକେତ ଦେଇଛନ୍ତି ଦୁଇ ଆଂଚଳିକ ମହାଶକ୍ତି ।
୨୦୧୪ରେ ଉତ୍ତର ପ୍ରଦେଶରେ ୮୦ଟି ଲୋକସଭା ଆସନରୁ ୭୧ଟିରେ ଜିତିଥିଲା ବିଜେପି । ସେହିପରି ଗତ ବିଧାନସଭା ନିର୍ବାଚନରେ ବିପୁଳ ଜନମତ ସହ ସରକାର ଗଢିଥିଲା । କିନ୍ତୁ ଗତ ମାର୍ଚ୍ଚରେ ଗୋରଖପୁର ଓ ଫୁଲପୁର ଲୋକସଭା ଉପନିର୍ବାଚନ ଲାଗି ମିଳିତ ପ୍ରାର୍ଥୀ ଦେଇଥିଲେ ଏସପି ଓ ବିଏସପି । ସେହିପରି କୈରାନାରେ କଂଗ୍ରେସ ସହ ମିଶି ଆରଏଲଡି ପ୍ରାର୍ଥୀଙ୍କୁ ସମର୍ଥନ ଜଣାଇ ସମସ୍ତ ତିନିଟିଯାକ ଆସନ ଦଖଲ କରିଥିଲେ । ତେଣୁ ୟୁପିରେ ଏହି ଦୁଇ ଆଂଚଳିକ ଦଳଙ୍କ ରଣନୀତି ବିଜେପି ପାଇଁ ବଡ ଆହ୍ୱାନ ହେବା ଆଶଙ୍କା କରାଯାଉଛି ।