ଚେନ୍ନାଇରେ ସାଂଘାତିକ ଜଳ ସଙ୍କଟ ।ପାଣି ଠାରୁ ଶସ୍ତା ହେଲାଣି ସୁନା, ପାଣି ବିନା ବନ୍ଦ ହୋଇଗଲାଣି ବଡ ବଡ ରେଷ୍ଟୁରାଣ୍ଟ ।
ସୁନା ଠାରୁ ମହଙ୍ଗା ପାଣି । ଅନ୍ୟ କୌଣସି ଦେଶରେ ନୁହେଁ ବରଂ ଭାରତର ତାମିଲନାଡୁରେ ଏବେ ଏଭଳି ସ୍ଥିତି ଦେଖାଦେଲାଣି । ତାମିଲନାଡୁରେ ଏବେ ଭୟଙ୍କର ଜଳ ସଙ୍କଟ ଦେଖାଦେଇଛି । ଦେଶରେ ଦେଖା ଦେଇଥିବା ଉତ୍କଟ ଜଳ ସମସ୍ୟାକୁ ନେଇ ରାଜ୍ୟସଭାରେ ଆଲୋଚନା ଚାଲୁଥିବା ବେଳେ ତାମିଲନାଡୁର ରାଜ୍ୟସଭା ସାଂସଦ ଏକ ସାଂଘାତିକ ସତ ସାମ୍ନାକୁ ଆଣିଛନ୍ତି । ତାମିଲନାଡୁର ରାଜଧାନୀ ଚେନ୍ନାଇରେ ଏବେ ସୁନାର ଦର ମଧ୍ୟ ପାଣି ଠାରୁ ଶସ୍ତା ବୋଲି ରାଜ୍ୟସଭାରେ କହିଛନ୍ତି ସିପିଆଇଏମ ସାଂସଦ ଟି କେ ରଙ୍ଗରାଜନ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟସଭାରେ ଜଳସଙ୍କଟକୁ ନେଇ ଆଲୋଚନା ବେଳେ ରଙ୍ଗରାଜନ କହିଛନ୍ତି, ଚେନ୍ନାଇ ଦେଶର ପ୍ରଥମ ସହର ଭାବେ ଶୁଖି ସାରିଲାଣି । ଚେନ୍ନାଇରେ ବର୍ତ୍ତମାନ ସୁଦ୍ଧା ୪୧ ପ୍ରତିଶତ କମ ବର୍ଷା ହୋଇଥିବା ମଧ୍ୟ ସ୍ପଷ୍ଟ କରିଛି କେନ୍ଦ୍ରୀୟ ଜଳ ଆୟୋଗ । ଏବେ ଚେନ୍ନାଇର ଅଧିକାଂଶ ଲୋକେ ପାଣି ପାଇଁ ଟ୍ୟାଙ୍କର, ବେସରକାରୀ ସଂସ୍ଥା ଯେଉଁମାନେ ଜଳ ଯୋଗାଣ କରୁଛନ୍ତି ସେମାନଙ୍କ ଉପରେ ନିର୍ଭର କରୁଛନ୍ତି । ଏପରିକି ଗୋଟିଏ ଟ୍ୟାଙ୍କ ପାଣିର ଦାମ ଗୋଟିଏ ଗ୍ରାମ ସୁନାର ଦାମ ଠାରୁ ମଧ୍ୟ ଅଧିକରେ ବିକ୍ରି ହେଉଛି ।
ଏହାସହ ରଙ୍ଗରାଜନ କହିଛନ୍ତି ଚେନ୍ନାଇରେ ସ୍ଥିତି ଏମିତି ହେଲାଣି ଯେ, ଆଇଟି ସେକ୍ଟରରେ କାମ କରୁଥିବା କର୍ମଚାରୀଙ୍କୁ ଘରୁ କାମ କରିବାକୁ କୁହାଯାଉଛି । ଏପରିକି ଜଳସଙ୍କଟ ପାଇଁ ଚେନ୍ନାଇର ଅଧିକାଂଶ ହୋଟେଲ ଓ ରେଷ୍ଟୁରାଣ୍ଟ ମଧ୍ୟ ବନ୍ଦ ହୋଇଗଲାଣି । ଏବେ କେବଳ ଅନ୍ୟ ରାଜ୍ୟ ହିଁ ଚେନ୍ନାଇକୁ ଏହି ସଙ୍କଟରୁ ରକ୍ଷା କରିପାରିବ ।
ସେହିଭଳି ସିପିଆଇର ଡି ରାଜା କହିଛନ୍ତି, ତାମିଲନାଡୁରେ ଯେଉଁ ଜଳସଙ୍କଟ ଦେଖାଦେଇଛି ତାହା ବେଶ ଉଦବେଗଜନକ । ତେଣୁ କେନ୍ଦ୍ର ସରକାର ଯଥାଶୀଘ୍ର ଏହି ସମସ୍ୟାର ସମାଧାନ ବାହାର କରିବା ଉଚିତ । ଏପରିକି ବିଭିନ୍ନ ରାଜ୍ୟର ନଦୀକୁ ଅନ୍ୟ ନଦୀ ସହ ଯୋଡିବାର ସମୟ ଆସିଯାଇଛି । ଏଥିପାଇଁ କେନ୍ଦ୍ର ସରକାର ପ୍ରୟାସ ଆରମ୍ଭ କରିବା ଆବଶ୍ୟକ ।
କେବଳ ତାମିଲନାଡୁ ନୁହେଁ ଦେଶର ୨୧ଟି ସହରରେ ଏବେ ସାଂଘାତିକ ଜଳ ସଙ୍କଟ ଦେଖାଦେଇଛି । ଆଉ ଏଭଳି ସମସ୍ୟାର ସମାଧାନ ପାଇଁ ଏବେ ସବୁଦଳ ଏକାଠି ହୋଇଛନ୍ତି । କାରଣ ଅଧିକାଂଶ ରାଜ୍ୟର ମୁଖ୍ୟ ସହରରେ ଜଳସଙ୍କଟ ଦେଖାଦେଲାଣି । ସବୁଠୁ ବଡ କଥା ହେଉଛି ପୂରା ବିଶ୍ୱରେ ଯେଉଁଭଳି ଜଳସଙ୍କଟ ଦେଖାଦେଲାଣି ସେଥିରୁ ସ୍ପଷ୍ଟ ଯେ, ଆଗକୁ ଜଳ ପାଇଁ ହିଁ ଦେଶ ଓ ଦେଶ ମଧ୍ୟରେ ଯୁଦ୍ଧ ହେବ । ତେଣୁ ଏହି ସମସ୍ୟାର ସମାଧାନ କରିବା ପାଇଁ ଏବେ ସମସ୍ତେ ଏକ ହୋଇ ପ୍ରୟାସ ଆରମ୍ଭ କରିବା ଆବଶ୍ୟକ ।