ମୋଦି ସରକାରଙ୍କ ୩ଟି ମହତ୍ୱାକାଂକ୍ଷୀ ଯୋଜନା ! ବୟସ୍କଙ୍କ ପାଇଁ ପେନସନ, ଗର୍ଭବତୀଙ୍କୁ ଆର୍ଥିକ ସହାୟତା ଓ ମୋଦି କେୟାର ଉପରେ ଗୁରୁତ୍ୱ ।
କନକ ବୁରୋ : ବିଭିନ୍ନ ଉପନିର୍ବାଚନରେ ବିଜେପିର ପରାଜୟ ମୋଦିଙ୍କ ଲୋକପ୍ରିୟତା ଉପରେ ସନ୍ଦେହ ସୃଷ୍ଟି କରୁଥିବା ବେଳେ ସମସ୍ତଙ୍କୁ ଚମକାଇବା ଭଳି ଏକ ବଡ ଯୋଜନା ମୋଦି ଆଣୁଛନ୍ତି ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ଜୋର୍ ଧରିଛି । କୁହାଯାଉଛି, ମାଷ୍ଟରଷ୍ଟ୍ରୋକ ମାରିବାକୁ ଯାଉଛନ୍ତି ମୋଦି । ୨୦୧୯ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଦେଶର ପ୍ରାୟ ୫୦ କୋଟି ଲୋକଙ୍କୁ ଆଖିରେ ରଖି ଏକ ବଡ ଯୋଜନା ଲାଗୁ କରିବାକୁ ଯାଉଛନ୍ତି ପ୍ରଧାନମନ୍ତ୍ରୀ ମୋଦି । ଜାତୀୟ ଗଣମାଧ୍ୟମରେ ହେଉଥିବା ଚର୍ଚ୍ଚା ଅନୁସାରେ ତିନିଟି ବଡ ଜନକଲ୍ୟାଣକାରୀ ଯୋଜନାକୁ ଏକକାଳୀନ କାର୍ଯ୍ୟକାରୀ କରି ଭୋଟ ବ୍ୟାଙ୍କକୁ ପ୍ରଭାବିତ କରିପାରନ୍ତି ମୋଦି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ସାଧାରଣ ନିର୍ବାଚନ ପୂର୍ବରୁ ଦେଶର ପ୍ରାୟ ୫୦ କୋଟି ଲୋକଙ୍କୁ ପ୍ରଭାବିତ କଲା ଭଳି ତିନିଟି ବଡ ଯୋଜନା ଲାଗୁ କରିପାରନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବ୍ଲୁମବର୍ଗ ନ୍ୟୁଜକୁ କେନ୍ଦ୍ରମନ୍ତ୍ରୀ ସନ୍ତୋଷ ଗଙ୍ଗୱାର ଦେଇଥିବା ସୂଚନା ଅନୁସାରେ ଆସନ୍ତା ଲୋକସଭା ନିର୍ବାଚନ ପୂର୍ବରୁ ଭାରତର ଇତିହାସରେ ଏତେ ସଂଖ୍ୟାରେ ଲୋକଙ୍କୁ ପ୍ରଭାବିତ କଲାଭଳି ସବୁଠାରୁ ବଡ ଯୋଜନା ହାତକୁ ନେବାକୁ ଯାଉଛନ୍ତି ମୋଦି । ପ୍ରମୁଖ ଜାତୀୟ ଗଣମାଧ୍ୟମ ଗୁଡିକରେ ହେଉଥିବା ଚର୍ଚ୍ଚା ଅନୁସାରେ ବୟସ୍କଙ୍କୁ ପେନସନ୍, ଗରିବଙ୍କୁ ସ୍ୱାସ୍ଥ୍ୟ ବୀମା ଓ ଗର୍ଭବତୀ ମହିଳାଙ୍କ ପାଇଁ ଆର୍ଥିକ ସହାୟତା ଭଳି ତିନିଟି ବଡ ଯୋଜନା ଏକକାଳୀନ ଲାଗୁ କରିବା ଉପରେ ଚିନ୍ତା କରୁଛନ୍ତି ମୋଦି ସରକାର ।
୧- ବୟସ୍କଙ୍କ ପାଇଁ ପେନସନ୍
– ଦେଶର ପ୍ରାୟ ୫୦ କୋଟି କର୍ମଜୀବୀଙ୍କ ପାଇଁ ନ୍ୟୁନତମ ପେନସନ ନିଶ୍ଚିତ ହେବ
– ଅଣସଂଗଠିତ କ୍ଷେତ୍ରରେ କାମ କରୁଥିବା ଲୋକ ମଧ୍ୟ ଏହାର ପରିସରଭୁକ୍ତ ହେବେ
– ଆକଳନ ଅନୁସାରେ ଦେଶର ଜିଡିପିକୁ ଅଣସଂଗଠିତ କ୍ଷେତ୍ରର ଅବଦାନ ଅଧା ରହିଛି
– ଏମାନଙ୍କ ଜୀବନଧାରଣ ମାନରେ ଉନ୍ନତି ହେଲେ ଉତ୍ପାଦନ କ୍ଷମତା ବଢିବା ଆଶା
୨- ଗରିବଙ୍କ ପାଇଁ ସ୍ୱାସ୍ଥ୍ୟ ବୀମା
– ଫେବ୍ରୁଆରୀ ୧ ତାରିଖରେ ରାଷ୍ଟ୍ରୀୟ ସ୍ୱାସ୍ଥ୍ୟ ବୀମା ଯୋଜନା ଘୋଷଣା ହୋଇଥିଲା
– ୧୦କୋଟି ପରିବାରଙ୍କୁ ସ୍ୱାସ୍ଥ୍ୟ ବୀମା ଯୋଗାଇଦେବାକୁ ବଜେଟରେ ଘୋଷଣା ଥିଲା
– ଅର୍ଥାତ ପ୍ରାୟ ୫୦କୋଟି ଲୋକ ବାର୍ଷିକ ୫ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱାସ୍ଥ୍ୟ ବୀମା ପାଇବେ
– ଓବାମା କେୟାର ପରି ଏହାକୁ ମୋଦି କେୟାର ନାଁରେ ବ୍ରାଣ୍ଡିଂ କରିବାକୁ ଯୋଜନା
୩- ଗର୍ଭବତୀଙ୍କ ପାଇଁ ସହାୟତା
– ଗର୍ଭବତୀ ମହିଳାଙ୍କୁ କେନ୍ଦ୍ର ସରକାର ୬ହଜାର ଟଙ୍କାର ଆର୍ଥିକ ସହାୟତା ଦେଉଛନ୍ତି
– ପ୍ରସବଠୁ ଆରମ୍ଭ କରି ନବଜାତର ଟୀକାକରଣ ଓ ପୁଷ୍ଟି ସାଧନ ପାଇଁ ଦିଆଯାଉଛି ଟଙ୍କା
– ଦେଶର ୬୫୦ ଜିଲ୍ଲାରେ ଏହାକୁ କାର୍ଯ୍ୟକାରୀ କରିବାକୁ ଘୋଷଣା କରିଥିଲେ ମୋଦି
– ସହାୟତା ରାଶି ବୃଦ୍ଧି କରିବା ସହ ଏହାର ପରିସର ବୃଦ୍ଧି କରିବାକୁ ଯୋଜନା ହେଉଛି
ଏକକାଳୀନ ଏହି ତିନି ଯୋଜନା ଲାଗୁ କରିବାରେ ଏକ ବଡ ଆର୍ଥିକ ବୋଝ ପଡିବ । ହେଲେ ନିର୍ବାଚନୀ ବର୍ଷ ଥିବାରୁ ଭିତ୍ତିଭୂମି କ୍ଷେତ୍ରରେ ବ୍ୟୟ କାଂଟଛାଂଟ କରି ସରକାର ଜନକଲ୍ୟାଣକାରୀ ଯୋଜନାରେ ଅଧିକ ବ୍ୟୟ କରିବାକୁ ଚିନ୍ତା କରିପାରନ୍ତି । ଭାରତ ତାର ଜିଡିପିର ପ୍ରାୟ ୨ ପ୍ରତିଶତ ସାମାଜିକ ସୁରକ୍ଷା ଦିଗରେ ବ୍ୟୟ କରୁଛି । ଦେଶର ପ୍ରାୟ ୯୦ ପ୍ରତିଶତ ମାନବ ସମ୍ବଳ ବିନା ସାମାଜିକ ସୁରକ୍ଷାରେ କାମ କରୁଥିବାରୁ ଏହି ତିନି ବଡ ଯୋଜନା ମୋଦି ସରକାରଙ୍କ ପାଇଁ ଗେମ ଚେଞ୍ଜର ହୋଇପାରେ ବୋଲି ବିଶେଷଜ୍ଞମାନେ ଆକଳନ କରୁଛନ୍ତି । ହେଲେ ସାଧାରଣ ନିର୍ବାଚନ ପୂର୍ବରୁ ଏଗୁଡିକୁ କାର୍ଯ୍ୟକାରୀ କରିବା ମୋଦି ସରକାରଙ୍କ ପାଇଁ ଏକ ବଡ ଆହ୍ୱାନ ହୋଇପାରେ ।