ଯୋଗୀଙ୍କ ରାଜ୍ୟରେ ଭୋଗୀଙ୍କ ଉପଦ୍ରବ ! ଦିନ ଦ୍ୱିପହରରେ ଯୁବତୀଙ୍କୁ ଅସଦାଚରଣ
ଉତ୍ତରପ୍ରଦେଶର ରାମପୁର ଅଞ୍ଚଳରେ ଲଜ୍ଜା । ଯୋଗୀଙ୍କ ରାଜ୍ୟରେ ଭୋଗୀଙ୍କ ଉପଦ୍ରବ । କିଛି ଉନ୍ମତ୍ତ ତଥା ଅସାମାଜିକ ଯୁବକ ଦୁଇଜଣ ଝିଅଙ୍କୁ ଦିନ ଦ୍ୱିପହରରେ କରିଛନ୍ତି ଅସଦାଚରଣ । କେବଳ ସେତିକି ନୁହେଁ ସଂପୂର୍ଣ୍ଣ ଘଟଣାର ଭିଡ଼ିଓ ମଧ୍ୟ ତିଆରି କରିଛନ୍ତି । ଯାହା ଏବେ ଭାଇରାଲ ହେବା ପରେ ସେଠାକାର ପୋଲିସ୍ ୧୪ ଜଣଙ୍କ ବିରୁଦ୍ଧରେ ମାମଲା ରୁଜୁ କରି ତନାଘନା ଆରମ୍ଭ କରିଛି।
Kanak News is now on WhatsApp
Join and get latest news updates delivered to you via WhatsApp
ଭିଡ଼ିଓରେ ଦେଖିବାକୁ ମିଳିଛି , ଏକ ଶୁନଶାନ୍ ରାସ୍ତାରେ ଦୁଇଜଣ ଝିଅ ଚାଲିଚାଲି ଯାଉଥିବା ସମୟରେ କିଛି ଯୁବକ ସେମାନଙ୍କୁ ଘେରିଯାଇଥିଲେ । ଝିଅମାନେ ସେମାନଙ୍କୁ ଛାଡ଼ିଦେବାପାଇଁ ଗୁହାରୀ ମଧ୍ୟ କରୁଥିଲେ । ମାତ୍ର ସେସବୁକୁ ଭ୍ରୁକ୍ଷେପ ନକରି ସେମାନେ ଅସଦାଚରଣ କରି ଚାଲିଥିଲେ । ସେମାନଙ୍କ ମଧ୍ୟରୁ ଜଣେ ଏହାର ଭିଡ଼ିଓ କରି ଫେସବୁକରେ ଛାଡିବାକୁ କହୁଥିବା ଶୁଣାଯାଉଛି । ତେବେ ଝିଅମାନେ ସେମାନଙ୍କ ପାଖରୁ ଖସିଆସିବା ବେଳେ ସେମାନେ ପୁଣି ତାଙ୍କୁ ଧରି ଟେକି ନେଇ ଅସଦାଚରଣ କରୁଥିବା ଦେଖାଯାଉଛି । ଏପରିକି କିଛି ଯୁବକ ଏହାର ଭିଡ଼ିଓ କରି ସୋସିଆଲ ମିଡ଼ିଆରେ ମଧ୍ୟ ଛାଡ଼ିଥିଲେ।
ତେବେ ଭିଡିଓ ପ୍ରମାଣ କରୁଛି ଏହି ଯୁବକ ମାନଙ୍କର ନା ପୋଲିସ୍କୁ ଡ଼ର ଅଛି ନା ଆଇନ୍କୁ ଏବଂ ସରକାରଙ୍କୁ । ଘଟଣାଟି ସାମ୍ନାକୁ ଆସିବା ପରେ ପୋଲିସ୍ କାର୍ଯ୍ୟାନୁଷ୍ଠାନ ଗ୍ରହଣ କରି ଏମାନଙ୍କ ମଧ୍ୟରୁ ଦୁଇଜଣଙ୍କୁ ଗିରଫ କରିଛି । ତେବେ ଏବେ ମଧ୍ୟ ସେମାନଙ୍କ ମଧ୍ୟରୁ ଅନେକ ଫେରାର ଥିବା ବେଳେ ସେମାନଙ୍କୁ ଖୋଜାଯାଉଛି।