ଆଗାମୀ ଲୋକସଭା ନିର୍ବାଚନ ପାଇଁ ପ୍ରସ୍ତୁୁୁତି ଜୋରଦାର ! ବିଜେପି ଶାସିତ ମୁଖ୍ୟମନ୍ତ୍ରୀଙ୍କ ସହ ଆଜି ବୈଠକ କରିବେ ମୋଦି ଓ ଅମିତ ଶାହ
କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୯ ଲୋକସଭା ନିର୍ବାଚନ ପାଇଁ ଏବେ ଠାରୁ ପ୍ରସ୍ତୁତି ଆରମ୍ଭ କଲେଣି । ବିଜେପି ରାଷ୍ଟ୍ରିୟ ଅଧ୍ୟକ୍ଷ ଅମିତ ଶାହଙ୍କ ସହ ମିଶି ମୋଦି ରଣନୀତି ପ୍ରସ୍ତୁତ କରୁଛନ୍ତି । କିଛି ଦିନ ପୂର୍ବରୁ ଖବର ଆସିଥିଲା ୨୦୧୯ ପୂର୍ବରୁ ନିର୍ବାଚନ କରିପାରନ୍ତି ମୋଦି । ତେବେ ନିର୍ବାଚନ କେବେ ହେବ ସେକଥା ପରେ ଜଣାପଡ଼ିବ । ଆଜିଠାରୁ କିନ୍ତୁ ଜୋରସୋରରେ ଚାଲିଛି ପ୍ରସ୍ତୁୁୁତି । ସେଥିପାଇଁ ନରେନ୍ଦ୍ର ମୋଦି ଓ ଅମିତ ଶାହ ଆଜି ଅପରାହ୍ନ ୪ଟାରେ ବିଜେପି ଶାସିତ ମୁଖ୍ୟମନ୍ତ୍ରୀଙ୍କ ସହ ବୈଠକ କରିବେ । ଏହି ବୈଠକରେ ୨୦୧୯ ନିର୍ବାଚନକୁ ଦୃଷ୍ଟିରେ ରଖି କେନ୍ଦ୍ର ଓ ରାଜ୍ୟ ସରକାରଙ୍କ ଯୋଜନା ଉପରେ ବିଚାର କରାଯିବ । ବୈଠକରେ ଏକ ଦେଶ ଏକ ନିର୍ବାଚନ ଉପରେ ମଧ୍ୟ ଚର୍ଚ୍ଚା ହେବ । ୨୦୧୯ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ସହ ଏହି ବୈଠକକୁ ଗୁରୁତ୍ୱପୂର୍ଣ୍ଣ କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ବର୍ତ୍ତମାନ ଏବେ ପ୍ରାୟ ୧୯ ରାଜ୍ୟରେ ବିଜେପି ସରକାର ତଥା ବିଜେପି ସରକାରଙ୍କ ସହଯୋଗୀ ଦଳ ଶାସନରେ ଅଛନ୍ତି । ଏପରିସ୍ଥଳେ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀ ଆଜି ବିଜେପି ମୁଖ୍ୟାଳୟରେ ହେଉଥିବା ବୈଠକରେ ଉପସ୍ଥିତ ରହିବେ । ବୈଠକରେ ରାଜ୍ୟ ସ୍ତରରେ ହେଉଥିବା ଜନହିତକର ଯୋଜନା ସହ କେନ୍ଦ୍ର ସରକାରଙ୍କ ଯୋଜନାର ସମୀକ୍ଷା କରାଯିବ । ବିଜେପି ଶାସିତ ରାଜ୍ୟର ଯୋଜନା କେତେ ପର୍ଯ୍ୟନ୍ତ ସଫଳ ହୋଇଛି ଓ କେତ ପର୍ଯ୍ୟନ୍ତ ଅସଫଳ ହୋଇଛି ସେ ନେଇ ମଧ୍ୟ ସମୀକ୍ଷା ହେବ । ନିକଟରେ ଉପସ୍ଥାପନ ହୋଇଥିବା ବଜେଟରେ ଗରିବ ଲୋକଙ୍କୁ ବୀମା, କୃଷକଙ୍କୁ ଗୁରୁତ୍ୱ ଦେଇ କେନ୍ଦ୍ର ସରକାରଙ୍କ ଯୋଜନା ସାଧାରଣ ଲୋକଙ୍କୁ ବେଶ୍ ଛୁଇଁଥିବ ବୋଲି ଦଳ ଆଶା କରୁଛି । ଯଦି କୌଣସି ରାଜ୍ୟରେ କିଛି ଯୋଜନାର କାର୍ଯ୍ୟକାରୀ ହୋଇପାରି ନାହିଁ କିମ୍ବା କିଛି ଅସୁବିଧା ରହିଛି, ତେବେ ସେହି ମାମଲା ଉପରେ ବୈଠକରେ ଚର୍ଚ୍ଚା ହେବ ।
ଏହାସହ ଏକ ରାଜ୍ୟ ଏକ ନିର୍ବାଚନ ପାଇଁ ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଚିଠି ପଠାଯାଇଛି । ଆଉ ସମସ୍ତଙ୍କ ପରାମର୍ଶ ମଗାଯାଇଛି । ଏବଂ ସମୟ ପୂର୍ବରୁ ନିର୍ବାଚନ କରିବା ପାଇଁ ପ୍ରସ୍ତୁତ ଅଛନ୍ତି କି ନାହିଁ ବୋଲି ମଧ୍ୟ ଚିଠିରେ ପ୍ରଶ୍ନ କରାଯାଇଛି । କିଛି ଦିନ ପୂର୍ବରୁ ଏକ ଦେଶ ଏକ ନିର୍ବାଚନ କରିବା ଦେଶ ପାଇଁ ଉଚିତ ହେବ ବୋଲି ମୋଦି କହିଥିଲେ । ସବୁ ସମୟରେ ନିର୍ବାଚନ ହେବା ଦ୍ୱାରା ବିକାଶ ବାଧାପ୍ରାପ୍ତ ହେଉଛି ଓ ନିର୍ବାଚନରେ ଅଧିକ ସମୟ କଟିବା ସହ ଅଧିକ ଟଙ୍କା ମଧ୍ୟ ଖର୍ଚ୍ଚ ହେଉଛି । ଏପରିସ୍ଥଳେ ଗୋଟିଏ ଦେଶ ଗୋଟିଏ ନିର୍ବାଚନ ଦେଶର ବିକାଶ ଦିଗରେ ସହାୟକ ହେବ ବୋଲି ମୋଦି କହିଥିଲେ ।
ସୂଚନାଯୋଗ୍ୟ ଦୁଇ ଦିନ ତଳେ ଖବର ଆସିଥିଲା ମୋଦି ତାଙ୍କର ପୁରୁଣା ରଣନିତୀଜ୍ଞଙ୍କ ପ୍ରଶାନ୍ତ କିଶୋରଙ୍କ ସହ ସାକ୍ଷାତ କରିଛନ୍ତି । ପ୍ରଶାନ୍ତ କିଶୋର ୨୦୧୪ରେ ନିର୍ବାଚନ ସମୟରେ ମୋଦିଙ୍କୁ ନିର୍ବାଚନ ଜିତିବା ପାଇଁ ସହଯୋଗ କରିଥିଲେ । ତାଙ୍କ ରଣନୀତି ମଧ୍ୟ କାମ ଆସିଥିଲା । ତେବେ ପରେ ମନୋମାଳିନ୍ୟ ଯୋଗୁଁ ଉଭୟେ ଉଭୟଙ୍କ ଠାରୁ ଦୂରେଇ ଯାଇଥିଲେ ବୋଲି ଖବର ଆସିଥଲା । ତେବେ ଆଗାମୀ ନିର୍ବାଚନକୁ ଦୃଷ୍ଟିରେ ରଖି ମୋଦି ପ୍ରଶାନ୍ତ କିଶୋରଙ୍କୁ ସାକ୍ଷାତ କରିଛନ୍ତି ବୋଲି ଶୁଣିବା ପାଇଁ ମିଳୁଛି ।