ମାଲକାନଗିରି : ମାଲକାନଗିରି ଜିଲ୍ଲା ତେଲେରାଇରେ ମାଓବାଦୀଙ୍କ ଶକ୍ତିଶାଳୀ ଲ୍ୟାଣ୍ଡମାଇନ ବିସ୍ଫୋରଣରେ ପ୍ରାଣ ହରାଇ ଥିଲେ ୧୭ ଜଣ ଏସ.ଓ.ଜି ଯବାନ । ପ୍ରତି ବର୍ଷ ସହିଦ ସ୍ତମ୍ଭରେ ଫୁଲମାଳ ପକାଇ ସହିଦ ମାନଙ୍କୁ ଶ୍ରଦ୍ଧାଂଜଳି ଦେଇ ନିଜ ଦାୟିତ୍ୱ ତୁଲାଇ ଆସୁଛି ମାଲକାନଗିରି ପୁଲିସ । ତେବେ ରାଜ୍ୟର ଚର୍ଚିତ ଘଟଣାକୁ ୮ ବର୍ଷ ବିତି ଯାଇ ଥିଲେ ହେଁ ରାଜ୍ୟ ସରକାରଙ୍କ ପ୍ରତିଶୃତି ମୁତାବକ ଏ ଯାଏଁ ଜାଗା ଖଣ୍ଡେ ପାଇ ନାହାନ୍ତି ସହିଦଙ୍କ ପରିବାର । ବାରମ୍ବାର ତହସିଲଦାରଙ୍କ ଠାରୁ ଆରମ୍ଭ କରି ଜିଲ୍ଲାପାଳଙ୍କ ଦ୍ୱାରସ୍ତ ହୋଇ ମଧ୍ୟ କୌଣସି ସୁଫଳ ପାଇ ପାରୁନାହାନ୍ତି ସହିଦଙ୍କ ପରିବାର ଲୋକେ ।
Kanak News is now on WhatsApp
Join and get latest news updates delivered to you via WhatsApp
୨୦୦୮ ଜୁଲାଇ ୧୬, କମ୍ବିଂ ସାରି ମାଲକାନଗିରି ଫେରୁଥିବା ବେଳେ ୧୭ ଜଣ ଏସ.ଓ.ଜି ଯବାନ ଫସିଯାଇଥିଲେ ଲାଲବାହିନୀର ଚକ୍ରବ୍ୟୁହ ଭିତରେ । କାଲିମେଳା ଥାନା ତେଲେରାଇରେ ମାଓବାଦୀଙ୍କ ଲ୍ୟାଣ୍ଡମାଇନ ବିସ୍ଫୋରଣରେ ସହିଦ ହୋଇଥିଲେ ଆଂଟି ଲ୍ୟାଣ୍ଡମାଇନ୍ ଗାଡିରେ ଥିବା ସମସ୍ତ ଯବାନ । ସେଇ ଲୋମହର୍ଷଣକାରୀ ଘଟଣାକୁ ୮ ବର୍ଷ ବିତିଛି । ପ୍ରତି ବର୍ଷ ପରି ଏ ବର୍ଷ ବି ମାଲକାନଗିରି ପୁଲିସ ନିରବ ଶୋଭାଯାତ୍ରା କରିଛି । ସହିଦ ସ୍ତମ୍ଭରେ ପୁଷ୍ପମାଲ୍ୟ ଅର୍ପଣ କରି ସହିଦଙ୍କୁ ଶ୍ରଦ୍ଧାଂଜଳି ଜଣାଇଛନ୍ତି ମାଲକାନଗିରି ଏସ.ପି ଓ ବହୁ ବରିଷ୍ଠ ପୁଲିସ ଅଧିକାରୀ । ହେଲେ ପରିତାପର ବିଷୟ ଯେ ମା’ ମାଟି ପାଇଁ ଜୀବନ ହାରି ଥିବା ଯବାନଙ୍କ ପରିବାରକୁ ସେମାନଙ୍କ ପ୍ରାପ୍ୟ ପାଇଁ ବାରଦୁଆର ବୁଲିବାକୁ ପଡୁଛି । ଇନସ୍ୟୁରାନ୍ସ ଓ କ୍ଷତିପୁରଣ ଟଙ୍କା ମିଳିଛି, ଏବଂ ସହିଦ ପରିବାର ସଦସ୍ୟଙ୍କୁ ପୁଲିସ ଚାକିରି ଖଣ୍ଡେ ମିଳିଛି ସତ । ହେଲେ ରାଜ୍ୟ ସରକାରଙ୍କ ସହିଦ ଥଇଥାନ ନିତି ଅନୁଯାୟୀ ଘରଡିହ ଯାଗା ଖଣ୍ଡେ ପାଇ ହିନସ୍ତା ହେବାକୁ ପଡୁଛି । ପ୍ରଶାସନିକ ଅଧିକାରୀଙ୍କ ଠାରୁ ଆରମ୍ଭ କରି ଲୋକ ପ୍ରତିନିଧିଙ୍କ ଯାଏଁ ସମସ୍ତଙ୍କୁ ଜଣାଇ ବି ନିରାଶ ଏମାନେ ।
ମାଲକାନଗିରି ଜିଲ୍ଲାରେ ୨୮ ଜଣ ଯବାନ ମାଓ ଗୁଳିରେ ସହିଦ ହୋଇଛନ୍ତି । ଏମାନଙ୍କ ମଧ୍ୟରୁ ମାତ୍ର ୭ ଜଣଙ୍କ ପରିବାର ସଦସ୍ୟଙ୍କୁ ଚାକିରି ମିଳିଛି । ସେପଟେ ଜିଲ୍ଲା ପ୍ରଶାସନ ପାଖରେ ଫାଇଲ ଅଟକି ରହିଛି । ଖୁବ ଶୀଘ୍ର ସହିଦ ପରିବାରଙ୍କୁ ଘରଡିହ ପଟ୍ଟା ପ୍ରଦାନ କରାଯିବ ବୋଲି କହିଛନ୍ତି ମାଲକାନଗିରି ଏସ.ପି ମିତ୍ରଭାନୁ ମହାପାତ୍ର । ମାଓ ମୁକାବିଲା ଲାଗି ରାଜ୍ୟ ସରକାର ତତ୍ପରତା ଦେଖାଉ ଥିବା ବେଳେ ସହିଦ ପରିବାରଙ୍କ ପ୍ରତି ସରକାର ଆଖି ବୁଜି ଦେଇଛନ୍ତି । ଅଧିକ ତଥ୍ୟ ଏହି ଭିଡିଓରେ :