କ୍ୟାନସର ରୋଗୀଙ୍କୁ ସହାୟତାର ହାତ ବଢାଇଲେ କିନ୍ନର ସଂଘ ! ରୋଗୀଙ୍କ ଦୁଃଖ ଶୁଣିଲାନି ପ୍ରଶାସନ କିନ୍ତୁ ସହାୟତାର ହାତ ବଢାଇଲେ କିନ୍ନର ସଂଘ ।
କନକବ୍ୟୁରୋ: ଯୋଜନା ଉପରେ ଯୋଜନା ହେଉଛି । ସରକାର ଘୋଷଣା କରିଛନ୍ତି ଯେ, କ୍ୟାନସର ଓ କିଡନୀ ଭଲି ମାରାତ୍ମକ ରୋଗରେ ଆକ୍ରାନ୍ତ ହେଲେ ରୋଗୀମାନଙ୍କୁ ସରକାରଙ୍କ ପକ୍ଷରୁ ଅଧିକ ସହାୟତା ରାଶି ପ୍ରଦାନ କରାଯିବ । ତେବେ ପ୍ରକୃତରେ ରୋଗୀଙ୍କୁ ସହାୟତା ମିଳୁନଥିବା ବେଳେ ଅନେକ ଗୁଡିଏ ସଂଘ ସାହାଯ୍ୟ ଲାଗି ଆଗେଇ ଆସୁଛନ୍ତି । ଏପରି ଏକ ଖବର ଭଦ୍ରକ ଜିଲ୍ଲାର ବନ୍ତ ବ୍ଲକରେ ଦେଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବନ୍ତ ଅଞ୍ଚଳର ତଭୋଙ୍ଗ ଗ୍ରାମର ଦିନ ମଜୁରିଆ ନରେନ୍ଦ୍ର ଜେନାଙ୍କ ୧୪ ବର୍ଷର ପୁଅ ଯଯାତି କ୍ୟାନସର ରୋଗରେ ଆକ୍ରାନ୍ତ ହୋଇଛି । ହଠାତ ପେଟରେ ଯନ୍ତ୍ରଣା ହେବାରୁ ମେଡିକାଲରେ ପରୀକ୍ଷା ହେବା ପରେ ଜଣାପଡିଥିଲା କି ଯଯାତି କ୍ୟାନସର ରୋଗରେ ପାଡିତ ହୋଇଛନ୍ତି । ବାପା ନରେନ୍ଦ୍ର ଦିନମଜୁରିଆ କାମ କରୁଥିବାରୁ ପୁଅର ଚିକିତ୍ସାଲାଗି ଆବଶ୍ୟକ ଅର୍ଥ ଯୋଗାଡ କରି ପାରୁନାହାନ୍ତି ।
ଚିକିତ୍ସା ହୋଇ ପାରୁନଥିବାରୁ ବାରଣ୍ଡାରେ ପଡିରହିଛନ୍ତି ଯଯାତି । ପ୍ରବଳ ଯନ୍ତ୍ରଣା ହେଉଥିବାରୁ ଆହାର ମଧ୍ୟ ଛାଡିସାରିଲେଣି ଯଯାତି । ତାଙ୍କର ଏକମାତ୍ର ପୁଅର ଏପରି ଅବସ୍ଥା ଦେଖି ଦୁଃଖରେ ଭାଙ୍ଗି ପଡିଲେଣି ବାପା ଓ ମା । ତେବେ ପୁଅର ଚିକିତ୍ସା ଲାଗି ଅନେକଙ୍କୁ ସାହାଯ୍ୟ ମାଗିଥିଲେ ମଧ୍ୟ କେହି ସାହାଯ୍ୟ କରିନଥିଲେ । ଏପରି କି ଜିଲ୍ଲା ପ୍ରଶାସନକୁ ଗୁହାରୀ କଲାପରେ ମଧ୍ୟ କୌଣସି ସହାୟତା ମିଳିନାହିଁ ।
କୌଣସି ସହାୟତା ନପାଇ ଦୁଃଖରେ ଭାଙ୍ଗିପଡିଥିବା ବେଳେ ଯାଜପୁର ଜିଲ୍ଲାର କିନ୍ନର ସଂଘ ଯଯାତିଙ୍କୁ ସହାୟତାର ହାତ ବଢାଇଛନ୍ତି । ଯାହାକୁ ନେଇ ସେ ଖୁସି ଥିବା ସହ ତାଙ୍କ ବାପା ଓ ମା ଏବଂ ତାଙ୍କ ଗ୍ରାମବାସୀମାନେ କିନ୍ନର ସଂଘକୁ ଧନ୍ୟବାଦ ଦେବା ସହ ପୁଅକୁ ଯଥାଶୀଘ୍ର ମେଡିକାଲରେ ଭର୍ତ୍ତି କରାଯିବ ବୋଲି ବାପା ନରେନ୍ଦ୍ର କହିଛନ୍ତି ।
ତେବେ ପ୍ରଶ୍ନ ଉଠୁଛି ଯୋଜନା ସାଧାରଣ ଜନତାଙ୍କ ଲାଗି ହେଉଥିଲେ ମଧ୍ୟ ପ୍ରକୃତରେ ପାଇବା ବ୍ୟକ୍ତି ପାଖରେ ଯୋଜନା ପହଞ୍ଚିପାରୁନାହିଁ । ଏପରି ସାହାଯ୍ୟ କରିଥିବାରୁ ଯାଜପୁର କିନ୍ନର ସଂଘକୁ ସବୁଆଡୁ ପ୍ରଶଂସାର ସୁଅ ଛୁଟୁଛି ।