କନକ ବ୍ୟୁରୋ : ଆଗାମୀ ୧୧ ତାରିଖରେ ତ୍ରିସ୍ତରୀୟ ପଂଚାୟତ ନିର୍ବାଚନ ପାଇଁ ନାମାଙ୍କନ ଦାଖଲ ହେବ । ୧୭ ତାରିଖ ଭିତରେ ପ୍ରାର୍ଥୀପତ୍ର ଦାଖଲ ପାଇଁ ନିର୍ବାଚନ କମିଶନ ବିଜ୍ଞପ୍ତି ପ୍ରକାଶ କରିଥିବାବେଳେ ଏପର୍ଯ୍ୟନ୍ତ ପ୍ରାର୍ଥୀ ତାଲିକା ଚୂଡାନ୍ତ କରିପାରି ନାହାନ୍ତି ୩ ପ୍ରମୁଖ ରାଜନୈତିକ ଦଳ ।
Kanak News is now on WhatsApp
Join and get latest news updates delivered to you via WhatsApp
ବିଶେଷ କରି ଜିଲ୍ଲା ପରିଷଦ ସଭ୍ୟ ନିର୍ବାଚନ, ଦଳୀୟ ଚିହ୍ନରେ ହେଉଥିବାବେଳେ ଅନ୍ତଦ୍ଦ୍ୱର୍ନ୍ଦ୍ୱ ଯୋଗୁଁ ଏଯାଏଁ ତାଲିକା ଚୂଡାନ୍ତ କରିପାରି ନାହାନ୍ତି ବିଜେଡି, ବିଜେପି ଓ କଂଗ୍ରେସ । ହାତରେ ଆଉ ଅଳ୍ପଦିନ ଥିବାବେଳେ କେବେ ପ୍ରାର୍ଥୀ ତାଲିକା ଘୋଷଣା କରିବେ ଦଳ ଓ କେବେ ଆରମ୍ଭ ହେବ ପଂଚାୟତ ପ୍ରଚାର ପ୍ରସ୍ତୁତି ତାକୁ ନେଇ ଆଶଙ୍କାରେ ନେତା ଓ କର୍ମୀ ।
କୁହାଯାଉଛି କେନ୍ଦ୍ରାପଡାରେ ମୁହାଁମୁହିଁ ବିଜେଡିର ଦୁଇ ହେଭିୱେଟ ନେତା । ଗୋଟିଏ ପଟେ ସାଂସଦ ବୈଜୟନ୍ତ ପଣ୍ଡା ଓ ଅନ୍ୟପଟେ ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ତଥା ମହାକାଳପଡା ବିଧାୟକ ଅତନୁ ସବ୍ୟସାଚୀ ନାୟକ । ନିଜନିଜ ପ୍ରାର୍ଥୀଙ୍କୁ ବିଭିନ୍ନ ଆସନରେ ବସାଇ ତୃଣମୂଳ ସ୍ତରରେ ନିଜ ଗଡ ମଜଭୂତ କରିବାକୁ ଜୋରଦାର ଗୋଟି ଚାଳନା କରୁଛନ୍ତି ଏହି ଦୁଇ ନେତା ।
ସେହିପରି କୋରାପୁଟ କନ୍ଦଳରେ ଛନ୍ଦି ହୋଇପଡିଛି ଶାସକ ଦଳ । ଏଠାରେ ଦୁଇ କ୍ଷମତା କେନ୍ଦ୍ର, ପୂର୍ବତନ ମନ୍ତ୍ରୀ ରବି ନାରାୟଣ ନନ୍ଦ ଓ ଜିଲ୍ଲା ବିଜେଡି ସଭାପତି ଜୟରାମ ପାଙ୍ଗିଙ୍କ ମଧ୍ୟରେ ବଳ କଷାକଷି ଚାଲିଥିବା ଚର୍ଚ୍ଚା ହେଉଛି । ୨୦୧୨ରେ ଏଠାରେ ବିଜେଡି ଓ କଂଗ୍ରେସ ସମାନ ସଂଖ୍ୟକ ୧୪ଟି ଲେଖାଏଁ ଜିଲ୍ଲା ପରିଷଦ ଆସନ ହାତେଇଥିଲେ । ଜଣେ ସ୍ୱାଧୀନ ପ୍ରାର୍ଥୀଙ୍କ ସମର୍ଥନରେ ଦଳ ଏହି ଜିିଲ୍ଲା ଉପରେ କବଜା କରିଥିଲା । ତେଣୁ ଏଥର ବିଜୟ ସମ୍ଭାବନା ଥିବା ପ୍ରାର୍ଥୀଙ୍କୁ ଗୁରୁତ୍ୱ ଦେବା ଅନୁମାନ କରାଯାଉଛି ।
ରାଜ୍ୟ କଂଗ୍ରେସରେ ଥିବା ଅନ୍ତଦ୍ଦ୍ୱର୍ନ୍ଦ୍ୱ ଦାଣ୍ଡରେ ପଡି ହାଟରେ ଗଡୁଛି । ପିସିସି ସଭାପତି ପ୍ରସାଦ ହରିଚନ୍ଦଙ୍କ ବିରୋଧରେ ଅନେକ ବିଧାୟକ ସ୍ୱର ଉତୋଳନ କରୁଥିବାର ନଜିର ରହିଛି । ଜିଲ୍ଲା ପରିଷଦ ପ୍ରାର୍ଥୀ ଚୟନକୁ ନେଇ ମଧ୍ୟ ଜିଲ୍ଲା ସଭାପତି ଓ ବିଧାୟକମାନଙ୍କ ଭିତରେ ତାଳମେଳ ନାହିଁ । ଏଭଳି ସ୍ଥିତିରେ ପଂଚାୟତ ଫାଇଟ ପାଇଁ ପ୍ରାର୍ଥୀ ତାଲିକା ପ୍ରସ୍ତୁତ କରିବା ମୁସ୍କିଲ ହୋଇପଡିଛି ।
ସେହିପରି ରାଜ୍ୟ ବିଜେପିରେ ମଧ୍ୟ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଗୋଷ୍ଠୀରେ ବରିଷ୍ଠ ନେତା ବିଜୟ ମହାପାତ୍ର ଓ ରାଉରକେଲା ବିଧାୟକ ଦିଲ୍ଲୀପ ରାୟ ନଥିବା ଚର୍ଚ୍ଚା ହେଉଛି । ଅନେକ ଦଳୀୟ କାର୍ଯ୍ୟକ୍ରମରୁ ଏମାନେ ନିଜକୁ ଦୂରେଇ ରଖୁଥୁବାରୁ ଏଭଳି ସନ୍ଦେହ ପ୍ରକାଶ ପାଇଛି । ଆଉ ଚର୍ଚ୍ଚା ଏପରି ମଧ୍ୟ ହେଉଛି ଯେ, ପଂଚାୟତ ସ୍ତରରେ ନିଜ ଲୋକଙ୍କୁ ଥଇଥାନ କରିବା ପାଇଁ ଚାହୁଁଥିବା ଗୋଷ୍ଠୀଙ୍କୁ, ଦଳର ଏହି ତୁଙ୍ଗ ନେତାଙ୍କ ବିରୋଧର ସାମ୍ନା କରିବାକୁ ପଡୁଛି ।
ସମସ୍ତ ପ୍ରମୁଖ ରାଜନୈତିକ ଦଳରେ ଲାଗିରହିଥିବା ଛକାପଂଝାକୁ ନେଇ ବିଳମ୍ବିତ ହୋଇଛି ଜିଲ୍ଲା ପରିଷଦ ପ୍ରାର୍ଥୀ ତାଲିକା ପ୍ରକାଶ । ଆଉ ସବୁଠାରୁ ଅଧିକ ଦ୍ୱନ୍ଦ୍ୱ ଶାସକ ଦଳ ବିଜେଡିରେ ରହିଛି । ୨୦୧୨ ପଂଚାୟତ ଭୋଟରେ ସର୍ବାଧିକ ୬୫୧ ସିଟ ହାତେଇଥିବା ବିଜେଡି ପାଇଁ ପୁଣିଥରେ ଜିଲ୍ଲା ପରିଷଦ କବଜା କରିବା ଚ୍ୟାଲେଞ୍ଜ ହୋଇଥିବାରୁ ତରବରିଆ ଭାବେ ଦଳ ପ୍ରାର୍ଥୀ ଚୟନ କରିବାକୁ ଚାହୁଁନାହିଁ ।