ପଡିଆରେ ବିପକ୍ଷ ଦଳ ପାଇଁ ଘାତକ ସାଜୁଥିଲେ ବୋଲର ଓ ଅଧିନାୟକ । ଆଜି ଚାଲିବା ପାଇଁ ସଂଘର୍ଷ କରୁଛନ୍ତି କିମ୍ବଦନ୍ତୀ କ୍ରିକେଟର ଜୟସୁରିଆ
ଦିନେ ପଡିଆରେ ନିଜ ବୋଲିଂ ମାଧ୍ୟମରେ ବିପକ୍ଷ ଦଳର ନିଦ ହଜାଉଥିବା ଦୁର୍ଦ୍ଦଷ ବୋଲର ତଥା ଶ୍ରୀଲଙ୍କାର ପୂର୍ବତନ ଅଧିନାୟକ ଆଜି ନିଜେ ଠିକ ଭାବେ ଚାଲିବାକୁ ସକ୍ଷମ ନୁହନ୍ତି । ବିନା ସାହାରାରେ ସେ ଗୋଟିଏ ପାଦ ବି ଚାଲିପାରୁନାହାନ୍ତି । କେବଳ ବୋଲର ନୁହନ୍ତି ଆକ୍ରମଣାତ୍ମକ ବାମହାତୀ ବ୍ୟାଟସମ୍ୟାନ ଆଜି ନିଜ ଆଣ୍ଠୁ ଜନିତ ସମସ୍ୟାରେ ସଂଘର୍ଷ କରୁଛନ୍ତି । ଆଉ ଖୁବଶୀଘ୍ର ତାଙ୍କ ଆଣ୍ଠୁରେ ଅସ୍ତ୍ରୋପଚାର କରାଯିବା ଆବଶ୍ୟକ ହୋଇପଡିଛି ।
Kanak News is now on WhatsApp
Join and get latest news updates delivered to you via WhatsApp
କ୍ରିକେଟରୁ ଅବସର ନେବା ପରେ ଜୟସୁରିଆ, ଶ୍ରୀଲଙ୍କା ଚୟନ କମିଟିର ଅଧ୍ୟକ୍ଷ ଭାବେ ଦୁଇଥର ଦାୟିତ୍ୱ ନେଇଥିଲେ । ତାଙ୍କର କାର୍ଯ୍ୟକାଳ ବିବାଦ ଭିତରେ ଶେଷ ହୋଇଥିଲା । ଏପରିକି ତାଙ୍କ କାର୍ଯ୍ୟକାଳ ଭିତରେ ସେ ଏପରି କେତେଗୁଡିଏ ବିବାଦୀୟ ପରିବର୍ତନ ଆଣିଥିଲେ ଯାହାଦ୍ୱାରା ଖେଳାଳିମାନେ ପ୍ରଭାବିତ ହୋଇଥିଲେ ଓ ଟିମରେ ସ୍ଥାନ ପାଇବା ନେଇ ଚିନ୍ତିତ ଥିଲେ । ଏପରିକି ୨୦୧୭ରେ ସାଉଥଆଫ୍ରିକା ଓ ଭାରତରେ ଦୟନୀୟ ପ୍ରଦର୍ଶନ ପରେ ଜୟସୁରିଆ ଓ ତାଙ୍କ ଟିମକୁ ଇସ୍ତଫା ଦେବାକୁ ପଡିଥିଲା ।
ଜୟସୁରିଆ ବର୍ତମାନ ଆଶାବାଡି ବିନା ଚାଲିବାକୁ ସକ୍ଷମ ନୁହନ୍ତି ଓ ତାଙ୍କ ଆଣ୍ଠୁରେ ଅସ୍ତ୍ରୋପଚାର ହେବା ଦରକାର । ସେ ଏହି ସପ୍ତାହରେ ଅଷ୍ଟ୍ରେଲିଆ ଯାଇପାରନ୍ତି । ମେଲବୋର୍ଣ୍ଣରେ ତାଙ୍କର ଅସ୍ତ୍ରୋପଚାର ହେବ । ଏହା ଏକ ଜଟିଳ ଅସ୍ତ୍ରୋପଚାର ହୋଇଥିବାରୁ ଏଥିପାଇଁ ତାଙ୍କୁ ଡାକ୍ତରଙ୍କ ପ୍ରତ୍ୟକ୍ଷ ତତ୍ୱାବଧାନରେ ମାସେ ରହିବାକୁ ପଡିବ ।ଏପରିକି ଅପରେସନ ପରେ ସେ ଠିକ ଭାବେ ଠିଆ ହୋଇପାରୁଛନ୍ତି କି ନାହିଁ ଚେକ କରିବାକୁ ପଡିବ ବୋଲି ଡାକ୍ତର କହିଛନ୍ତି ।
୨୦୧୧ରେ ଅବସର ନେବା ପୂର୍ବରୁ ୪୮ ବର୍ଷିୟ ଜୟସୁରିଆ ଶ୍ରୀଲଙ୍କାର ଜଣେ ଜଶାଶୁଣା ବ୍ୟାଟସମ୍ୟାନ ଥିଲେ । ଏମିତି କେହି ବୋଲର ନଥିଲେ ଯିଏ ଜୟସୁରିଆଙ୍କୁ ଭୟ କରୁନଥିଲେ । କ୍ରିଜରେ ରହିଲେ ବିପକ୍ଷ ଦଳର ସବୁ ରଣନୀତି ବିଫଳ ହେଉଥିଲା । ବ୍ୟାଟିଂ ମାଧ୍ୟମରେ ସେ କେବଳ ଶ୍ରୀଲଙ୍କାରେ ନୁହେଁ ସାରା ବିଶ୍ୱରେ ନିଜର ଫ୍ୟାନ ସୃଷ୍ଟି କରିପାରିଛନ୍ତି ।
ଜୟସୁରିଆ ହାରାହାରି ୪୦ ହିସାବରେ ୧୧୦ ଟେଷ୍ଟ ମ୍ୟାଚରୁ ୬୯୭୩ ରନ ସଂଗ୍ରହ କରିଥିଲେ ।ସେହିପରି ୪୩୩ଟି ଦିନିକିଆ ମ୍ୟାଚରୁ ୧୩ହଜାର ସଂଗ୍ରହ କରିଥିଲେ । ୨୦-୨୦ରେ ତାଙ୍କର ବ୍ୟାଟିଂ ଦକ୍ଷତା ଦେଖାଇଥିଲେ ବାମହାତି ବ୍ୟାଟସମ୍ୟାନ ଜୟସୁରିଆ । ଅବସର ନେବା ପୂର୍ବରୁ ୩୧ଟି ଟି-ଟ୍ୱେଂଟି ମ୍ୟାଚ ଖେଳିଥିଲେ କିମ୍ବଦନ୍ତି କ୍ରିକେଟର,ବର୍ତମାନ ଆଣ୍ଠୁ ଜନିତ ସମସ୍ୟାରେ ଜର୍ଜରିତ ।