ଦିଲ୍ଲୀ ବିଶ୍ୱବିଦ୍ୟାଳୟ ଛାତ୍ର ସଂସଦ ନିର୍ବାଚନରେ ‘ABVP’ର ବାଜିମାତ । ଗୋଟିଏ ସିଟରେ ସନ୍ତୁଷ୍ଟ ହେଲା କଂଗ୍ରେସ ସମର୍ଥିତ ଛାତ୍ର ସଙ୍ଗଠନ NSUI
କନକ ବ୍ୟୁରୋ : ଦିଲ୍ଲୀ ବିଶ୍ୱବିଦ୍ୟାଳୟ ଛାତ୍ର ସଂସଦ ନିର୍ବାଚନରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ବାଜିମାତ୍ । ଏହି ନିର୍ବାଚନରେ ଏବିଭିପି ୩ଟି ପଦରେ ଜିତି ଥିବା ବେଳେ ଗୋଟିଏ ସିଟରେ ସନ୍ତୁଷ୍ଟ ହୋଇଛି ଏନଏସୟୁଆଇ । ତେବେ ବାମଦଳ ଓ ଆପର ଛାତ୍ର ସଙ୍ଗଠନ ଗୁଡିକ ମିଳିତ ଭାବେ ନିର୍ବାଚନ ଲଢିଥିଲେ ମଧ୍ୟ ଗୋଟିଏ ବି ସିଟରେ ଜିତିବାକୁ ସକ୍ଷମ ହୋଇନଥିଲେ ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ ବିଶ୍ୱବିଦ୍ୟାଳୟର ଛାତ୍ର ସଂସଦର ନିର୍ବାଚନରେ ସଭାପତି ପଦରେ ଏବିଭିପି ପ୍ରାର୍ଥୀ ଅଙ୍କିତ ବସୋୟା ବିଜୟୀ ହୋଇଥିବା ବେଳେ ଉପସଭାପତି ଓ ସହ-ସାଧାରଣ ସଂପାଦକ ପଦ ମଧ୍ୟ ଏବିଭିପି ଖାତାକୁ ଯାଇଛି । ତେବେ କେବଳ ସଂପାଦକ ପଦରେ କଂଗ୍ରେସର ଛାତ୍ର ସଙ୍ଗଠନ ଏନଏସୟୁଆଇର ପ୍ରାର୍ଥୀ ଆକାଶ ଚୌଧୁରୀ ବିଜୟୀ ହୋଇଛନ୍ତି । ଫଳାଫଳ ଘୋଷଣାର କିଛି ସମୟ ପୂର୍ବରୁ ଇଭିଏମ ମେସିନରେ ଗଡବଡ ହୋଇଥିବା ଯୋଗୁଁ ଭୋଟ ଗଣନାକୁ କିଛି ସମୟ ବନ୍ଦ କରାଯାଇଥିଲା । ଯାହାକୁ ନେଇ ଛାତ୍ର ସଙ୍ଗଠନ ଗୁଡିକ କ୍ୟାମ୍ପସ ପରିସରରେ ହଙ୍ଗାମା ସୃଷ୍ଟି କରିଥିଲେ । ଏପରିକି ପୁର୍ନବାର ନିର୍ବାଚନ କରିବାକୁ ଏନଏସୟୁଆଇ ଅଡି ବସିଥିଲା । ତେବେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ବୁଝାସୁଝା କରିବା ପରେ ପୁଣିଥରେ ଗଣନା ଆରମ୍ଭ ହୋଇଥିଲା ।
ଏନଏସୟୁଆଇ ସଙ୍ଗଠନ ଅଭିଯୋଗ ସହ କହିଛି ଯେ, ଆମେ ସଭାପତି ଓ ସଂପାଦକ ପଦରେ ବିଜୟୀ ହେବୁ ବୋଲି ଆଶା ଥିଲା । ଏପରିକି ଗଣନାର ପ୍ରାଥମିକ ପର୍ଯ୍ୟାୟରେ ମଧ୍ୟ ଆମ ପ୍ରାର୍ଥୀ ଆଗୁଆ ଥିଲା ତେବେ ଏହି ସମୟରେ ଏଭିଏମ ହଠାତ୍ ଖରାପ ହୋଇଥିଲା । ଯାହା ଦର୍ଶାଉଛି ଯେ, ଏଭିଏମରେ କୌଣସି ଗଡବଡ କରାଯାଇଛି । ଛାତ୍ର ସଂସଦ ନିର୍ବାଚନ ପାଇଁ ଗତକାଲି ମତଦାନ ହୋଇଥିଲା ।