ଲୋକସଭାରେ କଂଗ୍ରେସର ଅଜବ ଦାବି । ୱିଙ୍ଗ୍ କମାଣ୍ଡର ଅଭିନନ୍ଦନଙ୍କ ନିଶକୁ ‘ରାଷ୍ଟ୍ରୀୟ ନିଶ’ ଘୋଷଣା କରନ୍ତୁ ମୋଦି ସରକାର ।
କଂଗ୍ରେସର ଅଜବ ଦାବି । ବାୟୁସେନାର ସାହସୀ ୱିଙ୍ଗ୍ କମାଣ୍ଡର ଅଭିନନ୍ଦନଙ୍କୁ ପୁରସ୍କାର ଦେବାକୁ ଦାବି କରିଛି କଂଗ୍ରେସ । ଆଉ ଏହାସହ ଅଭିନନ୍ଦନଙ୍କ ନିଶକୁ ‘ରାଷ୍ଟ୍ରୀୟ ନିଶ’ ଭାବେ ଘୋଷଣା କରାଯିବା ଦରକାର ବୋଲି ଲୋକସଭାରେ ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ଅଧୀର ରଞ୍ଜନ ଚୌଧୁରୀ କହିଛନ୍ତି । ଲୋକସଭାରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଚର୍ଚ୍ଚା ହେଉଥିବା ବେଳେ ଏଭଳି ଦାବି କରିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ଲୋକସଭାରେ ଭାଷଣ ଦେବା ସମୟରେ ଅଧୀର ମୋଦି ସରକାରଙ୍କୁ କଡା ସମାଲୋଚନା କରିବା ସହ ଏୟାରଷ୍ଟ୍ରାଇକର କଥା ମଧ୍ୟ ଉଠାଇଥିଲେ । ବାଲାକୋଟରେ ବାୟୁସେନା ଯେଉଁ ଏୟାରଷ୍ଟ୍ରାଇକ କରିଛି ତାହାକୁ କଂଗ୍ରେସ ପାର୍ଟି ସମର୍ଥନ କରି ଆସିଛି । ଏହାସହ ପାକିସ୍ତାନ ସୀମାରେ ପଶି ପାକ୍ ବାୟୁସେନାର ବିମାନକୁ ଖସାଇ ୱିଙ୍ଗ କମାଣ୍ଡର ଅଭିନନ୍ଦନ ଯେଉଁ ବୀରତ୍ୱ ପ୍ରଦର୍ଶନ କରିଛନ୍ତି ସେଥିପାଇଁ ତାଙ୍କୁ ପୁରସ୍କୃତ କରାଯିବା କଥା । ଏପରିକି ତାଙ୍କ ନିଶକୁ ମଧ୍ୟ ରାଷ୍ଟ୍ରୀୟ ନିଶ ଘୋଷଣା କରାଯିବାକୁ ଦାବି କରିଛି କଂଗ୍ରେସ । ଆଉ କଂଗ୍ରେସ ଏଭଳି ଦାବି କରିବା ପରେ ତାଳିମାଡରେ ଗୃହ କମ୍ପି ଉଠିଥିଲା ।
ପୁଲୱାମା ଆତଙ୍କବାଦୀ ଆକ୍ରମଣ ପରେ ଭାରତୀୟ ବାୟୁସେନା ପାକିସ୍ତାନର ବାଲାକୋଟରେ ଏୟାରଷ୍ଟ୍ରାଇକ କରିଥିଲା । ଆଉ ଏୟାରଷ୍ଟ୍ରାଇକର ପରଦିନ ଭାରତୀୟ ସୀମା ମଧ୍ୟକୁ ପଶି ଆସିଥିଲା ପାକିସ୍ତାନ ବାୟୁସେନାର ଫାଇଟର ଜେଟ୍ । ଆଉ ଜବାବରେ ପାକିସ୍ତାନ ଯୁଦ୍ଧ ବିମାନକୁ ଭାରତୀୟ ସୀମାରୁ ତଡ଼ିବାରେ ସକ୍ଷମ ହୋଇଥିଲା ଭାରତୀୟ ବାୟୁସେନା । ଏପରିକି ପାକିସ୍ତାନ ଯୁଦ୍ଧ ବିମାନକୁ ପିଛା କରୁ କରୁ ଭାରତର ୱିଙ୍ଗ କମାଣ୍ଡର ଅଭିନନ୍ଦନ ପାକିସ୍ତାନ ସୀମାରେ ଭୁଲବଶତଃ ଖସିପଡିଥିଲା ।
ଆଉ ଅଭିନନ୍ଦନଙ୍କୁ ସଙ୍ଗେ ସଙ୍ଗେ ନିଜ କବଜାକୁ ନେଇଥିଲେ ପାକିସ୍ତାନ ଯବାନ । ଅଭିନନ୍ଦନଙ୍କୁ ପାକିସ୍ତାନ ୨ ଦିନ ଅଟକ ରଖିଥିଲା । ତେବେ ଭାରତର ଚାପ ପରେ ଅଭିନନ୍ଦନଙ୍କୁ ଛାଡିବାକୁ ବାଧ୍ୟ ହୋଇଥିଲା ପାକିସ୍ତାନ । ଆଉ ଅଭିନନ୍ଦନଙ୍କ ଏଭଳି ବୀରତ୍ୱ ପାଇଁ ପୂରା ଦେଶ ତାଙ୍କୁ ସାଲ୍ୟୁଟ କରିଥିଲା ।