ସୁରକ୍ଷାକୁ ଆଖିଠାର ! ଭିତରକନିକା ଜଙ୍ଗଲରୁ ପ୍ରାୟ ୧୦ ଏକର ଜମିରେ ବିରଳ ଲୁଣା ଜଙ୍ଗଲ ସଫା
କନକ ବ୍ୟୁରୋ: ରାଜନଗର ଭିତରକନିକା ଅଂଚଳରେ ଲୁଣା ଜଙ୍ଗଲର ସୁରକ୍ଷା ଓ ନୂତନ ଲୁଣା ଜଙ୍ଗଲ ସୃଷ୍ଟି ପାଇଁ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି । କିନ୍ତୁ ସୁରକ୍ଷା ପରିବର୍ତ୍ତେ ଜାତୀୟ ଉଦ୍ୟାନରେ ଥିବା ଲୁଣା ଜଙ୍ଗଲ ଧ୍ୱଂସ ହେବାରେ ଲାଗିଛି । ଭିତରକନିକା ରେଂଜ ଅନ୍ତର୍ଗତ ଶୈଳେନ୍ଦ୍ରସରାଇ ଗାଁ ନିକଟରେ ଥିବା ଜଙ୍ଗଲରୁ ପ୍ରାୟ ୧୦ ଏକର ଜମିରେ ବିରଳ ଲୁଣା ଜଙ୍ଗଲକୁ କାଟି ସଫା କରିଦିଆଯାଇଛି । ଏହି ୧୦ ଏକର ଜମିରେ ଥିବା ୨ ହଜାରରୁ ଅଧିକ ଗଛକୁ କାଟିଦିଆଯାଇଛି । ଗଛ ମୂଳରୁ ଫୁଟେ ଓ ଅଧଫୁଟ ଲେଖାଁଏ ଛାଡି ଗଛଟିକୁ ଲୁଟି ନିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ କଥା ହେଉଛି, ତାଳଚୁଆରୁ ପ୍ରଭାତି ଲୁଣା ଘେରିବନ୍ଧର ଶୈଳେନ୍ଦ୍ରସରାଇ ନିକଟରେ ଏହି ଜଙ୍ଗଲକୁ କାଟି ସଫା କରିଦିଆଯାଇଛି । ଜଙ୍ଗଲ କଟାଯାଉଥିବା ସମ୍ପର୍କରେ ଯେମିତି କେହି କିଛି ଜାଣିନପାରିବେ ସେଥିପାଇଁ ରାସ୍ତାକଡରେ କିଛି ଗଛକୁ ଛାଡି ଜଙ୍ଗଲ ଭିତରେ ଏହି ବିରଳ ଲୁଣା ଜାତୀୟ ଗଛକୁ କଟାଯାଇଛି । ବଡ ପ୍ରଶ୍ନ ଉଠୁଛି, କଡା ସୁରକ୍ଷା ସତ୍ୱେ ରାସ୍ତା କଡର ମାତ୍ର ୧୦ ଫୁଟ ଜଙ୍ଗଲକୁ ଛାଡି ୨ ହଜାର ବିରଳ ଲୁଣା ଜାତୀୟ ଗଛକୁ କିଭଳି କାଟିନିଆଗଲା ।