ପାଚେରୀରେ ମାଡ ହେବା ଯୋଗୁଁ କ୍ଷତିଗ୍ରସ୍ତ ହେଲା ବିମାନ, ଏ ଖବରରୁ ଅଜ୍ଞ ପାଇଲଟ୍ ୪ ଘଣ୍ଟା ଧରି ଉଡାଇ ଚାଲିଥିଲେ ବିମାନ
ବେଳେ ବେଳେ ମୃତ୍ୟୁ ଆସିବା ଯେମିତି ଜଣାପଡ଼େନି, ସେମିତି ବେଳେ ବେଳେ ଜୀବନ ବି ଚମତ୍କାର ଢ଼ଙ୍ଗରେ ବଞ୍ଚିଯାଏ। ଚାରି ଘଣ୍ଟା କାଳ ମୃତ୍ୟୁର ରାସ୍ତାରେ ଯାଇ ବି ମୃତ୍ୟୁକୁ ହରାଇଥିବା ୧୩୬ ଏୟାର ଇଣ୍ଡିଆ ବିମାନ ଯାତ୍ରୀଙ୍କ କାହାଣୀ ଅତ୍ୟନ୍ତ ରୋମାଞ୍ଚକର।
Kanak News is now on WhatsApp
Join and get latest news updates delivered to you via WhatsApp
ଘଟଣାଟି ଏମିତି। ରାତି ୧.୩୦ ସମୟରେ ଏୟାର ଇଣ୍ଡିଆ ଏକ୍ସପ୍ରେସ୍ ଇଣ୍ଟରନ୍ୟାସନାଲ ବିମାନଟି ୧୩୬ ଜଣ ଯାତ୍ରୀଙ୍କୁ ଧରି ତାମିଲନାଡୁର ତ୍ରିଚି ଠାରୁ ଦୁବାଇ ଅଭିମୁଖେ ବାହାରି ଥିଲା। ଦୁର୍ଘଟଣାବଶତଃ ବିମାନ୍ ଟେକ୍-ଅଫ୍ କରିବା ସମୟରେ ରନୱେ ନିକଟରେ ଥିବା ପାଚେରିରେ ମାଡ଼ ହୋଇଥିଲା। କାନ୍ଥରେ ବାଜି ବିମାନର କିଛି ଅଂଶ ଖସିକି ଗଳି ପଡ଼ିଥିଲା। ମାତ୍ର ଆଶ୍ଚର୍ଯ୍ୟର କଥା ହେଉଛି ପାଇଲଟ ଏହା ଜାଣି ପାରି ନଥିଲେ। ଫଳରେ ବିମାନଟି ଉଡ଼ିବା ଆରମ୍ଭ କରିଥିଲା। ଦୀର୍ଘ ୪ ଘଣ୍ଟା ପର୍ଯ୍ୟନ୍ତ ଯାତ୍ରା କରିବା ପରେ ମଧ୍ୟ ଚାଳକଙ୍କୁ ଦୁର୍ଘଟଣା ସଂପର୍କରେ କୌଣସି ଖବର ନଥିଲା।
ଯେତେବେଳେ ଏଟିସି କର୍ମଚାରୀ ଏ ସଂପର୍କରେ ଜାଣିବାକୁ ପାଇଲେ ସେମାନେ ଆଲାର୍ମ ଜାରି କଲେ। ଏ ସଂପର୍କରେ ପାଇଲଟଙ୍କୁ ସୂଚୀତ କରାଗଲା। ସୌଭାଗ୍ୟକୁ ପାଇଲଟ୍ ଜଣକ ଅଭିଜ୍ଞ ଥିବା ସହ ସାହସୀ ବି ଥିଲେ। ଏପରି ପରିସ୍ଥିତିରେ ସେ ଆଦୌ ବି ଭୟଭୀତ ନହୋଇ ମୁମ୍ବାଇ ବିମାନବନ୍ଦର ଆଡ଼େ ବିମାନ ଉଡ଼ାଇଥିଲେ ଓ ଶେଷରେ ଜରୁରୀକାଳୀନ ଅବତରଣ କରିଥିଲେ।
ଏୟାର୍ ଇଣ୍ଡିଆ ବିମାନ ଆଇଏକ୍ସ୬୧୧ରେ ସମୁଦାୟ ୧୩୦ ଜଣ ଯାତ୍ରୀ ଓ ୬ ଜଣ କ୍ରିୟୁ ମେମ୍ବର ଯାତ୍ରା କରୁଥିଲେ। ଚାଳକ ବିମାନଙ୍କୁ ନେଇ ସୁରକ୍ଷିତ ଭାବେ ସକାଳ ୫.୩୦ ସମୟରେ ଛତ୍ରପତି ଶିବାଜୀ ମହାରାଜ ଇଣ୍ଟରନ୍ୟାସନାଲ୍ ଏୟାରପୋର୍ଟରେ ଲ୍ୟାଣ୍ଡ୍ କରାଇଥିବା ସୂଚନା ରହିଛି। ଏକଥା ସ୍ପଷ୍ଟ କି ଏହି ୧୩୬ ଜଣ ଏକ ନିଶ୍ଚିତ ଦୁର୍ଘଟଣାରୁ ସୌଭାଗ୍ୟବଶତଃ ରକ୍ଷା ପାଇଯାଇଥିଲେ।