ପୁଣି ସର୍ଜିକାଲ ଷ୍ଟ୍ରାଇକ୍ କରିବ କି ଭାରତ?
ଜମ୍ମୁ-କଶ୍ମୀରର ପୁଂଜ ସେକ୍ଟରରେ ପୁଣି ଉତ୍ତେଜନା । ଏଲଓସିରେ ଅସ୍ତ୍ରବିରତି ଉଲ୍ଲଂଘନ କରିଛି ପାକିସ୍ତାନ, ଫଳରେ ୨ ଜବାନ ଶହୀଦ ହୋଇଛନ୍ତି । ଭାରତୀୟ ସେନାର କହିବା ଅନୁସାରେ, ପାକିସ୍ତାନ ସେନା ଦୁଇଟି ସେନା ପୋଷ୍ଟ ଉପରେ ରକେଟ ଓ ମୋର୍ଟାର ମାଡ କରିଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ବଡ କଥା ହେଉଛି, ଭାରତୀୟ ସେନାର ନଦର୍ଣ୍ଣ କମାଣ୍ଡ ଜାରି କରିଥିବା ପ୍ରେସ ରିଲିଜରେ କୁହାଯାଇଛି, ପାକିସ୍ତାନର ବର୍ଡର ଆକ୍ସନ ଟିମ୍ର ଆକ୍ରମଣରେ ଯେଉଁ ଦୁଇ ଯବାନ ଶହୀଦ ହୋଇଛନ୍ତି, ସେମାନଙ୍କ ଶବକୁ କ୍ଷତ ବିକ୍ଷତ କରିଛି ପାକିସ୍ତାନୀ ସେନା । ଏହି ଘୃଣିତ କାର୍ଯ୍ୟର ଉପଯୁକ୍ତ ଯବାବ ଦିଆଯିବ ବୋଲି ସେନା ପକ୍ଷରୁ ସ୍ପଷ୍ଟ କରିଦିଆଯାଇଛି ।
ଅନୁମାନ କରାଯାଉଛି, ପାକିସ୍ତାନକୁ ଉଚିତ ଶିକ୍ଷା ଦେବାକୁ ଭାରତ ପୁଣି ଥରେ କିଛି ବଡ ପଦକ୍ଷେପ ନେଇପାରେ । ଦୁଇ ଯବାନ ଶହୀଦ ହେବା ପରେ ଅନ୍ତର୍ଜାତୀୟ ନିୟନ୍ତ୍ରଣ ରେଖା ନିକଟରେ ଉତ୍ତେଜନା ଲାଗିରହିଛି । ଭାରତୀୟ ସେନା ଗୁଳିର ଯବାବ ଗୁଳିରେ ଦେଉଛି ନା ସର୍ଜିକାଲ ଷ୍ଟ୍ରାଇକ୍ର ତରିକା ଆପଣାଉଛି ।
ଗତବର୍ଷ ଉରୀ ସେକ୍ଟରରେ ସେନା କ୍ୟାମ୍ପ ଉପରକୁ ଆତଙ୍କବାଦୀ ହମଲା ପରେ ଭାରତ ସର୍ଜିକାଲ ଷ୍ଟ୍ରାଇକ୍ କରିଥିଲା । ଆଉ ଆଜି ଘଟିଥିବା ଏଭଳି ଘୃଣିତ କାର୍ଯ୍ୟର ଉଚିତ ଯବାବ ଦେବାକୁ ଭାରତ ଏହି ପନ୍ଥା ଆପଣାଇ ପାରେ ବୋଲି କିଛି ପୂର୍ବତନ ସେନା ଅଧିକାରୀ ମତ ଦେଇଛନ୍ତି ।