ଖୋର୍ଦ୍ଧା: ବାଣ ବିସ୍ଫୋରଣ ଘଟି ୫ ମୃତ, ୪ ଗୁରୁତର
କନକ ବ୍ୟୁରୋ: ଖୋର୍ଦ୍ଧା ବେଗୁନିଆରେ ଅଘଟଣ । ବାଣ ବିସ୍ଫୋରଣରେ ୫ ଜଣଙ୍କର ମୃତ୍ୟୁ ହୋଇଥିବା ବେଳେ ୪ ଜଣ ଗୁରୁତର ହୋଇଛନ୍ତି । ବିସ୍ଫୋରଣର ମାତ୍ରା ଏତେ ଭୟଙ୍କର ଥିଲା ଯେ, ଘଟଣାସ୍ଥଳରେ ଥିବା ଘରଟି ସମ୍ପୂର୍ଣ୍ଣ ଭୁଷୁଡି ଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବେଗୁନିଆ ବ୍ଲକର ସିକୋ ଗାଁର କୁମ୍ଭାର ସାହୀରେ ଆଜି ସକାଳ ପ୍ରାୟ ସାଢେ ୫ରୁ ୬ଟା ମଧ୍ୟରେ ଏଭଳି ଏକ ଅଘଟଣ ଘଟିଛି । କୁମ୍ଭାର ସାହୀର ସନେଇ ସେଠୀଙ୍କ ଘରେ ବାଣ ଭଡା ଯାଉଥିବା ସମୟରେ ଏହି ବିସ୍ଫୋରଣ ଘଟିଥିଲା । ତେବେ ବିସ୍ଫୋରଣର ମାତ୍ରା ଏତେ ଥିଲା ଯେ, ଏଥିରେ ଘରର ଛାତ ପ୍ରାୟ ୨୦ଫୁଟ୍ ଉଚ୍ଚକୁ ଉଠିଯାଇ ପୁଣି ପଡିଯାଇଥିଲା । ଏଥିସହିତ ପାଖରେ ଥିବା ୨ରୁ ଅଧିକ ଘର ମଧ୍ୟ ଏହାଦ୍ୱାରା କ୍ଷତିଗ୍ରସ୍ତ ହୋଇଛି । ଫଳରେ ସନେଇଙ୍କ ପୁରା ପରିବାର ଛାତ ତଳେ ଚାପି ହୋଇଯାଇଛି ।
ଏହି ବିସ୍ଫୋରଣରେ ସନେଇଙ୍କ ସ୍ତ୍ରୀ ଓ ତିନି ଝିଅଙ୍କର ମୃତ୍ୟୁ ହୋଇଥିବାବେଳେ ପଡୋଶୀ ଘର କାନ୍ଥ ପଡି ଜଣେ ବୃଦ୍ଧାଙ୍କ ମୃତ୍ୟୁ ହୋଇଛି । ଏଥିରେ ସନେଇ ସେଠୀ ସାମାନ୍ୟ ଆହତ ହୋଇଥିବାବେଳେ ପଡୋଶୀ ଘରର ୩ଶିଶୁ ଗୁରୁତର ଭାବେ ଆହତ ହୋଇଛନ୍ତି । ଗୁରୁତରଙ୍କୁ ଖୋର୍ଦ୍ଧା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ତେବେ ବର୍ଷା ଯୋଗୁଁ ଉଦ୍ଧାର କାର୍ଯ୍ୟରେ ବାଧା ଉପୁଜିଛି । ତେବେ ଏବେ ବି ଆଉ କିଛି ଭଙ୍ଗା ଛାତ ତଳେ ଚାପି ହୋଇ ରହିଥିବା ଅନୁମାନ କରାଯାଉଛି । ଘଟଣାସ୍ଥଳରେ ପୁଲିସ୍ ଓ ଦମକଳ ବାହିନୀ ପହଂଚି ଉଦ୍ଧାର କାମ ଜାରି ରଖିଛନ୍ତି ।