ବଢ଼ିବ ଭାରତୀୟ ସେନାର ବଳ ! ବଦଳିବ ବ୍ରିଟିଶ ଅମଳର ଢାଞ୍ଚା, ପୁର୍ନନିଯୁକ୍ତି ପାଇବେ ୫୭ ହଜାର ଯବାନ
କନକ ବ୍ୟୁରୋ : ପ୍ରଧାନମନ୍ତ୍ରୀ ମୋଦିଙ୍କ ଆଉ ଏକ ମାଷ୍ଟରଷ୍ଟ୍ରୋକ । ବଦଳିବ ଭାରତୀୟ ସେନାର ରୂପରେଖ । ପୂରା ସେନାର ହେବ ନବକଳେବର । ଏଥିପାଇଁ ପୁନାଦି ଖୋଳିଛନ୍ତି ସରକାର । ଭାରତୀୟ ସେନାରେ ଆସିବ ଐତିହାସିକ ସଂସ୍କାର । ଭାରତୀୟ ସେନାରୁ ହଟିବ ବ୍ରିଟିସ ଅମଳର ଢାଞ୍ଚା ପାକିସ୍ତାନ ଓ ଚୀନ ସବୁବେଳେ ଭାରତର ସୁରକ୍ଷା ପାଇଁ ଆହ୍ୱାନ ସୃଷ୍ଟି କରୁଥିବା ବେଳେ ଏକ ବଡ଼ ଧରଣର ସୈନ୍ୟ ସଂସ୍କାର ଆଡ଼କୁ ଆଗେଇଛି ଭାରତୀୟ ସେନା । ପୂର୍ବତନ ଜେନେରାଲ ଲେଫନାଣ୍ଟ ଡି.ବି. ସେକେଟକର କମିଟି ସୁପାରିଶ କ୍ରମେ ସ୍ୱାଧୀନତା ପରେ ଦେଶର ସବୁଠୁ ବଡ଼ ସୈନ୍ୟ ସଂସ୍କାର ଭାବେ ସେନାରେ ୫୭ ହଜାର ଯବାନଙ୍କୁ ପୁର୍ନନିଯୁକ୍ତି ମିଳିବ । ଏ ନେଇ ସୂଚନା ଦେଇଛନ୍ତିି ପ୍ରତିରକ୍ଷା ମନ୍ତ୍ରୀ ଅରୁଣ ଜେଟଲୀ । ତତକାଳ ଆଧାରରେ ଏହାକୁ ଆରମ୍ଭ କରିବ ସେନା ।
Kanak News is now on WhatsApp
Join and get latest news updates delivered to you via WhatsApp
ସାମରିକ ଶକ୍ତି ବୃଦ୍ଧି ତଥା ସନ୍ତୁଳନ ବଜାୟ ରଖିବାକୁ ଏକ ବଡ଼ ଧରଣର ସୈନ୍ୟ ସଂସ୍କାରକୁ ଚୂଡ଼ାନ୍ତ ରୂପ ଦେବ ସେନା । ଭାରତୀୟ ସେନାର ଅଣ ସାମରିକ ଦାୟିତ୍ୱରେ ନିଯୁକ୍ତ ୫୭ ହଜାର ଯବାନଙ୍କ କ୍ଷେତ୍ରରେ ଅଦଳବଦଳ କରାଯିବ । ପ୍ରତିରକ୍ଷା ମନ୍ତ୍ରୀ ଅରୁଣ ଜେଟଲୀଙ୍କ ସୂଚନା ଅନୁଯାୟୀ ସେନାଧିକାରୀ, ଜେସିଓ ଓ ଅନ୍ୟ ର୍ୟାଙ୍କର କର୍ମଚାରୀଙ୍କୁ ପ୍ରତ୍ୟକ୍ଷ ଯୁଦ୍ଧ ପ୍ରସ୍ତୁତିରେ ନିୟୋଜିତ କରାଯିବ । ସେହିପରି ସୈନିକ ଦରକାର ନଥିବା ବିଭାଗ ପାଇଁ ସିଭିଲିଆନ୍ ବା ସାଧାରଣ ନାଗରିକଙ୍କୁ ନିଯୁକ୍ତ କରା ଯିବ । ସରକାରଙ୍କ ନୂଆ ନୀତି ମୁତାବକ ସୈନ୍ୟ ସଂସ୍କାରକୁ ୩୧ ଡିସେମ୍ବର ୨୦୧୯ ମଧ୍ୟରେ ଚୂଡ଼ାନ୍ତ ରୂପ ଦିଆଯିବ । ସ୍ୱତନ୍ତ୍ର କମିଟିର ୯୯ଟି ସୁପାରିଶ ମଧ୍ୟରୁ ପ୍ରାଥମିକ ଭାବେ ୬୫ଟି ସୁପାରିଶକୁ ସରକାର ଅନୁମତି ଦେଇଥିବା ଜଣାପଡ଼ିଛି । ଦେଶ ସ୍ୱାଧୀନ ହେବା ପରେ ଏହାକୁ ଭାରତୀୟ ସେନାର ସବୁଠୁ ବଡ଼ ସୈନ୍ୟସଂସ୍କାର କୁହାଯାଉଛି ।
ସେନାରୁ ଉଚ୍ଛେଦ ହେବ ବ୍ରିଟିଶ ସମୟର ବ୍ୟବସ୍ଥା । ସରକାରଙ୍କ ନୂଆ ନୀତି ଅନୁଯାୟୀ ଶାନ୍ତ ଇଲାକାରେ ସେନାର ୩୯ଟି ପଶୁପାଳନ ଫାର୍ମ ବନ୍ଦ ହେବ । ସମର ଶିକ୍ଷାର୍ଥୀ ବାହିନୀରେ ଅବସରପ୍ରାପ୍ତ ସେନାଧିକାରୀଙ୍କୁ ନିଯୁକ୍ତ କରାଯିବ । ଏନସିସିରେ ନିଯୁକ୍ତ ଅଧିକାରୀଙ୍କୁ ତାଲିମ ଓ ପ୍ରଶିକ୍ଷଣ ବଦଳରେ ପ୍ରତ୍ୟକ୍ଷ ଯୁଦ୍ଧ କାର୍ଯ୍ୟକ୍ରମକୁ ଅଣା ଯିବ । ତେବେ ସେନାର ସବୁ ବିଭାଗରେ ଅତ୍ୟାଧୁନିକ କୌଶଳକୁ ଗୁରୁତ୍ୱ ଦିଆଯିବ ।
ଯୁଦ୍ଧ ପାଇଁ ଉଦ୍ଦିଷ୍ଟ ସୈନିକ ଓ ସେନାର ଅଣ ସାମରିକ କ୍ଷେତ୍ରରେ ଥିବା ଯବାନଙ୍କ ନିଯୁକ୍ତି ଅନୁପାତରେ ବ୍ୟାପକ ସଂସ୍କାର ଅଣାଯିବ ବୋଲି କହିଛନ୍ତି ପ୍ରତିରକ୍ଷା ମନ୍ତ୍ରୀ ଅରୁଣ ଜେଟଲି । ଏହା ବ୍ୟତୀତ ସେନାର ବାହନ ଡିପୋ, ଯୁଦ୍ଧାସ୍ତ୍ର ଡିପୋ ପରି ଗୁରୁତ୍ୱପୂର୍ଣ୍ଣ ବିଭାଗକୁ ମଧ୍ୟ ପୁନର୍ଗଠନ କରାଯିବ ବୋଲି ଜଣାପଡ଼ିଛି । ଏଭଳି ସୈନ୍ୟସଂସ୍କାର ହେବା ଦ୍ୱାରା ଆଧୁନୀକୀକରଣ ଆଡକୁ ଗତି କରୁଥିବା ଭାରତୀୟ ସେନା ଦେଶର ସୁରକ୍ଷାକୁ ସୁନିଶ୍ଚିତ କରିବ ।
ସେନାରେ ବ୍ରିଟିସ ଅମଳର ଢାଞ୍ଚାରେ ସଂସ୍କାର ଆଣିବା ପାଇଁ ସରକାର ବହୁ ଦିନ ପୂର୍ବରୁ ପ୍ରସ୍ତୁତି ଆରମ୍ଭ କରିଥିଲେ ବୋଲି ଜେଟଲୀ କହିଛନ୍ତି ।