କନକ ବ୍ୟୁରୋ : ଯେକୌଣସି ମୁହୂର୍ତ୍ତରେ ଗିରଫ ହୋଇପାରନ୍ତି କଂଗ୍ରେସର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ପି.ଚିଦାମ୍ବରମ । ଆଇଏନଏକ୍ସ ମିଡିଆ ଲାଂଚ ମାମଲାରେ ଚିଦାମ୍ବରମଙ୍କ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ, ଲୁକ୍ ଆଉଟ୍ ନୋଟିସ୍ ଜାରି କରିଛି । ନୋଟିସ ପରେ ଚିଦାମ୍ବରମ ଆଉ, ଦେଶ ବାହାରକୁ ଯାଇପାରିବେ ନାହିଁ । ଏପରିକି ଏହି ନୋଟିସ୍ ବଳରେ ପଳାୟନ କରିଥିବା ଅଭିଯୁକ୍ତଙ୍କୁ ଖୋଜିବା ସହ ଗିରଫ ମଧ୍ୟ କରାଯାଇପାରିବ । ସେପଟେ ଏହି ମାମଲାରେ ଦିଲ୍ଲୀ ହାଇକୋର୍ଟରୁ ନିରାଶ ହେବା ପରେ ସୁପ୍ରିମକୋର୍ଟଙ୍କ ଦ୍ୱାରସ୍ତ ହୋଇଥିଲେ ଚିଦାମ୍ବରମ । ତେବେ ମାମଲାର ତୁରନ୍ତ ଶୁଣାଣି କରିବାକୁ ମନା କରିଦେଇଛନ୍ତି ସର୍ବୋଚ୍ଚ ନ୍ୟାୟାଳୟ ।
Kanak News is now on WhatsApp
Join and get latest news updates delivered to you via WhatsApp
ଆଇଏନଏକ୍ସ ମିଡ଼ିଆ ଦୁର୍ନୀତି ମାମଲାରେ ଦିଲ୍ଲୀ ହାଇକୋର୍ଟରୁ ନିରାଶ ହେବା ପରେ ସୁପ୍ରିମକୋର୍ଟର ଦ୍ୱାରସ୍ତ ହୋଇଥିଲେ ପୂର୍ବତନ ଅର୍ଥମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ପି.ଚିଦାମ୍ବରମ୍ । ହେଲେ ସୁପ୍ରିମେକୋର୍ଟ ଚିଦାମ୍ବରମଙ୍କ ସମସ୍ୟାକୁ ଆହୁରି ବଢ଼ାଇ ଦେଇଛନ୍ତି । କାରଣ, ମାମଲାର ତୁରନ୍ତ ଶୁଣାଣି କରିବାକୁ ମନା କରିଦେବା ସହ ୨୩ ତାରିଖରେ ପରବର୍ତ୍ତୀ ଶୁଣାଣି କରିବାକୁ କହିଛନ୍ତି ସର୍ବୋଚ୍ଚକୋର୍ଟ । ମାମଲାର ଶୁଣାଣି ନହେବା ପର୍ଯ୍ୟନ୍ତ ଚିଦାମ୍ବରମଙ୍କୁ ଗିରଫ ନକରିବାକୁ ତାଙ୍କ ଓକିଲ ଆବେଦନ କରିଥିବା ବେଳେ ଗିରଫଦାରୀ ଏଡାଇବାକୁ ଭରପୁର ଉଦ୍ୟମ କରୁଛନ୍ତି ଚିଦାମ୍ବରମ । ଆଉ ଏପଟେ ଚିଦାମ୍ବରମଙ୍କ ବିରୋଧରେ ଜାରି ହୋଇଛି ଲୁକ୍ଆଉଟ୍ ନୋଟିସ୍ । ଅର୍ଥାତ୍ ଦେଶ ବାହାରକୁ ଯାଇ ପାରିବେ ନାହିଁ ପୂର୍ବତନ ଅର୍ଥମନ୍ତ୍ରୀ ।
ଏପଟେ ଚିଦାମ୍ବରମଙ୍କ ସୁରକ୍ଷାରେ ବାହାରି ଆସିଛି କଂଗ୍ରେସ ବ୍ରିଗେଡ୍ । ରାହୁଲ ଗାନ୍ଧୀ ଟ୍ୱିଟ୍ କରି କହିଛନ୍ତି- ମୋଦି ସରକାର, ଇଡି ଓ ସିବିଆଇର ଦୁରୁପୋଯୋଗ କରି ଚିଦାମ୍ବରମଙ୍କ ଛବିକୁ ଖରାପ କରିବାକୁ ଚାହୁଁଛନ୍ତି । ସେହିପରି ପ୍ରିୟଙ୍କା ଗାନ୍ଧୀ ଟ୍ୱିଟରରେ ଲେଖିଛନ୍ତି-ପରିଣାମ ଯାହା ହେଲେ ବି ସେ ଚିଦାମ୍ବରମଙ୍କ ସହ ଛିଡା ହୋଇଛନ୍ତି ଓ ସତ୍ୟ ପାଇଁ ଲଢ଼େଇ ଜାରି ରହିବ ।
ମଙ୍ଗଳବାର ଯେତେବେଳେ ଦିଲ୍ଲୀ ହାଇକୋର୍ଟ ଜାମିନ ନାମଞ୍ଜୁର କରିଦେଲେ, ତା’ପରେ ରାତି ସାରା ଦେଖିବାକୁ ମିଳିଥିଲା ଏକ ବଡଧରଣର ଡ୍ରାମା । ଇଡି ଓ ସିବିଆଇ ଟିମ୍ ଚିଦାମ୍ବରମଙ୍କ ଘରେ ପହଂଚିବା ସହ ରାତି ଅଧରେ ୨ ଘଂଟା ଭିତରେ ହାଜିର ହେବାକୁ ନୋଟିସ୍ କରିଥିଲେ ।
୨୦୦୭ରେ ଚିଦାମ୍ବରମ ଅର୍ଥମନ୍ତ୍ରୀ ଥିବା ସମୟରେ ଆଇଏନଏକ୍ସ ମିଡିଆକୁ ପ୍ରାୟ ୩୦୫କୋଟି ଟଙ୍କା ବିଦେଶ ପାଣ୍ଠି ଗ୍ରହଣ କରିବା ଦିଗରେ ବେଆଇନ ଭାବେ ଏଫଆଇପିବି ମଂଜୁର ପ୍ରଦାନ କରିଥିବା ଅଭିଯୋଗ ରହିଛି । ଏଥି ପାଇଁ ତାଙ୍କ ପୁଅ କାର୍ତ୍ତି ଚିଦାମ୍ବରମ ଲାଂଚ ନେଇଥିଲେ । ଯେଉଁଥି ପାଇଁ କାର୍ତ୍ତିଙ୍କୁ ଗରିଫ ହେବାକୁ ମଧ୍ୟ ପଡ଼ିଥିଲା ।