କନକ ବ୍ୟୁରୋ: ଧାମନଗରର ଦୁଇଟି ଦୃଶ୍ୟ ସାମ୍ନାକୁ ଆସିଛି । ପ୍ରଥମ ଦୃଶ୍ୟରେ ଜଣେ ବିଜେଡି କର୍ମୀ କହୁଛନ୍ତି ଯେଉଁ ପଞ୍ଚାୟତ ଅଧିକ ଭୋଟ ଦେଇ ବିଜେଡି ପ୍ରାର୍ଥୀଙ୍କୁ ଜିତାଇବ, ସେହି ପଞ୍ଚାୟତକୁ ଏକ କୋଟି ଟଙ୍କାର ପୁରସ୍କାର ମିଳିବ । ଦ୍ୱିତୀୟ ଭିଡିଓରେ ଏସଏଚଜି ମହିଳା ଟଙ୍କା ବାଣ୍ଟୁଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବିଜେଡିର ପ୍ରଚାର ରାଲିରେ ଭୋଟ ପାଇଁ କୋଟିଏ ଟଙ୍କାର ପୁରସ୍କାର ଘୋଷଣା କରାଯାଉଥିବା ସମୟର ଭିଡିଓ ସାମ୍ନାକୁ ଆସିଛି । ରାଧାବଲ୍ଲଭପୁରରେ ବିଜେଡିର ପ୍ରଚାର ସଭାରେ ଜଣେ ସ୍ଥାନୀୟ ବିଜେଡି ନେତା ମଞ୍ଚରୁ ମାଇକ ଯୋଗେ ଘୋଷଣା କରୁଛନ୍ତି । ନେତା ଜଣକ ମାଇକ ଧରି ପ୍ରଚାର ସଭାକୁ ସମ୍ବୋଧିତ କରି କହୁଛନ୍ତି, ଯେଉଁ ପଞ୍ଚାୟତ ଅଧିକ ଭୋଟ ଦେଇ ବିଜେଡି ପ୍ରାର୍ଥୀଙ୍କୁ ଜିତାଇବ, ସେହି ପଞ୍ଚାୟତକୁ ଏକ କୋଟି ଟଙ୍କାର ପୁରସ୍କାର ମିଳିବ । ବଡ କଥା ହେଉଛି ମଞ୍ଚରେ ମନ୍ତ୍ରୀ ପ୍ରୀତିରଞ୍ଜନ ଘଡେଇ ଓ ବିଜେଡି ସାଂସଦ ସୁଲତା ଦେଓଙ୍କ ଉପସ୍ଥିତିରେ ଏହି ଘୋଷଣା କରୁଛନ୍ତି ସ୍ଥାନୀୟ ବିଜେଡି ନେତା । ଏହି ଭାଇରାଲ ଭିଡିଓକୁ ନେଇ ଏବେ ଚର୍ଚ୍ଚା ଜୋର ଧରିଛି ।
ଧାମନଗର ନିର୍ବାଚନମଣ୍ଡଳୀରେ ଏସଏଚଜି ମହିଳା ଟଙ୍କା ବାଣ୍ଟୁଥିବା ଅଭିଯୋଗ ହୋଇଛି । ଏ ସମ୍ପର୍କିତ ଏକ ଭିଡିଓ ଏବେ ସାମ୍ନାକୁ ଆସିଛି । ଏକ ସ୍କୁଟିରେ ଜଣେ ମହିଳା ଗାଁରେ ପହଞ୍ଚି ମହିଳାଙ୍କୁ ଡାକି ଟଙ୍କା ବାଣ୍ଟୁଛନ୍ତି । ଆଉ ସେହି ସମୟର ଦୃଶ୍ୟକୁ କେହି ଜଣେ ମୋବାଇଲରେ କଏଦ କରି ଏବେ ସୋସିଆଲ ମିଡିଆରେ ଭାଇରାଲ କରି ଦେଇଛି । କୁହାଯାଉଛି ଟଙ୍କା ଦେଉଥିବା ମହିଳା ଜଣକ ଏସଏଚଜି ସଦସ୍ୟ, ଆଉ ଭୋଟ ପାଇଁ ସେ ଟଙ୍କା ଦେଉଛନ୍ତି ।
ଧାମନଗର ଉପନିର୍ବାଚନ ପାଇଁ ଟଙ୍କା ଉଡୁଛି । ଆଉ ଏପଟେ ବିଜେଡି-ବିଜେପି ମଧ୍ୟରେ ଆରୋପ ପ୍ରତ୍ୟାରୋପ ଆରମ୍ଭ ହୋଇଛି । ଉଭୟ ଦଳ ପରସ୍ପର ଉପରେ ଟଙ୍କା ବାଣ୍ଟୁଥିବା ଅଭିଯୋଗ ଆଣିଛନ୍ତି । ବିଜେପି ରାଜ୍ୟ ସଭାପତି ସମୀର ମହାନ୍ତିଙ୍କ ନେତୃତ୍ୱରେ ବିଜେପିର ଏକ ପ୍ରତିନିଧିମଣ୍ଡଳୀ ସିଇଓଙ୍କୁ ଭେଟିଛନ୍ତି । ଶାସକ ଦଳ ଭୋଟ ପାଇଁ ଟଙ୍କା ବାଣ୍ଟୁଥିବା ଅଭିଯୋଗ ଆଣିଛି ବିଜେପି । ସେହିପରି ବିଜେଡି ମୁଖପାତ୍ର ଲେନିନ ମହାନ୍ତିଙ୍କ ନେତୃତ୍ୱରେ ବିଜେଡିର ଏକ ପ୍ରତିନିଧି ମଣ୍ଡଳୀ ସିଇଓଙ୍କୁ ଭେଟିଛନ୍ତି । ଦଳ ଅଭିଯୋଗ କରିଛି ବିଜେପି ବେଆଇନ ଭାବେ ଭୋଟରଙ୍କୁ ପ୍ରଲୋଭିତ କରୁଛି । ଏଣୁ ପ୍ରଶ୍ନ ଉଠୁଛି ଧାମନଗରରେ ଟଙ୍କା ବାଣ୍ଟୁଛି କିଏ ।
ଧାମନଗରରେ ଟଙ୍କାବଣ୍ଟା ନେଇ ରାଜନୀତି ଜୋର ଧରିଥିବାବେଳେ ବୁଧବାରଠାରୁ ଷ୍ଟାର ପ୍ରଚାରକ ମୈଦାନକୁ ଓହ୍ଲାଇବେ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବୁଧବାର ଓ ଗୁରବାର ପ୍ରଚାର କରିବେ । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଓ ବିଶ୍ୱେଶର ଟୁଡୁ ବି ପ୍ରଚାରର ସାମିଲ ହେବେ । ସେପେଟ ଆବଶ୍ୟକ ହେଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ବି ମୈଦାନକୁ ଓହ୍ଲାଇବେ ବୋଲି ସୂଚନା ମିଳିଛି ।