ମଣିଷ ରକ୍ତ ପିଇ ବଂଚୁଥିବା ବାଦୁଡିଙ୍କୁ ନେଇ ଚର୍ଚ୍ଚା ! ଯାହାକୁ ନେଇ ବୈଜ୍ଞାନିକମାନେ ମଧ୍ୟ ହୋଇ ଯାଇଛନ୍ତି ଚକିତ
ଆପଣ ସାଧାରଣତଃ ବାଦୁଡି ସଂପର୍କରେ ଜାଣିଥିବେ । ଏମାନଙ୍କୁ ନେଇ ନିକଟରେ ଅନେକଗୁଡିଏ ସିନେମା ମଧ୍ୟ ନିର୍ମିତ ହୋଇଛି । ତେବେ ବାଦୁଡିମାନେ ବିଶେଷ କରି ରାତି ସମୟରେ ବାହାରକୁ ବାହାରିଥାନ୍ତି । ଆଉ ଛୋଟ ବଡ ପକ୍ଷୀଙ୍କୁ ତାଙ୍କ ଖାଦ୍ୟ ପାଇଁ ଶିକାର କରିଥାନ୍ତି । ସେହିଭଳି ଆଉ କିଛି ବାଦୁଡି ଅଛନ୍ତି ଯାହାକୁ ପିଶାଚ ବାଦୁଡି ବା (ଜଙ୍ଗଲୀ ବାଦୁଡି ତଥା ବେମ୍ପାୟର ବାଦୁଡି) କୁହାଯାଇଥାଏ । ଯାହା କେବଳ ବଡ ଆକାର ବିଶିଷ୍ଟ ପକ୍ଷୀଙ୍କ ରକ୍ତ ପିଇ ବଂଚି ଥାନ୍ତି । କିନ୍ତୁ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ପ୍ରଥମ ଥର ପାଇଁ ସେମାନଙ୍କୁ ମଣିଷଙ୍କ ରକ୍ତ ପିଉଥିବାର ଦେଖିବାକୁ ମିଳିଛି । ଏଭଳି ଘଟଣା ଦେଖିବାକୁ ମିଳିଛି ଉତ୍ତର-ପୂର୍ବ ବ୍ରାଜିଲର କତିମ୍ବଓ ନେସନାଲ ପାର୍କରେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ନିକଟରେ ଏକ ରିସର୍ଚ ଦଳ ଏହି ପାର୍କକୁ ଯାଇଥିଲେ ଏବଂ ସେଠାରୁ ପାଖାପାଖି ୭୦ଟି ବାଦୁଡିଙ୍କ ନଖ ନମୁନା ସଂଗ୍ରହ କରିଥିଲେ । ଶୁଣିଲେ ଚକିତ ହେବେ ଏହି ସବୁ ନମୁନାର ଡିଏନଏ ରିପୋର୍ଟରୁ ପ୍ରାୟ ୩ଟି ବାଦୁଡିଙ୍କ ମଧ୍ୟରେ ମଣିଷ ରକ୍ତ ପିଉଥିବାର ଗୁଣ ଥିବା ଜଣାପଡିଛି ।
ତେବେ, ଏହି ଘଟଣା ଜଣା ପଡିବା ପରେ ଏବେ ବୈଜ୍ଞାନିକଙ୍କ ପାଇଁ ଏହା ଚିନ୍ତାର ବିଷୟ ପାଲଟି ଯାଇଛି । ସେମାନଙ୍କ କହିବା କଥା ହେଲା, ଏଭଳି ରୋଗ ସଂକ୍ରମିତ ହେବାର ଯଥେଷ୍ଟ ସମ୍ଭାବନା ରହିଛି । ଅନ୍ୟପଟେ, ବ୍ରାଜିଲର ଫ୍ରେଡରଲ ୟୁନିଭର୍ସିଟି ଅଫ୍ ପରନାମ୍ବୁକୋ’ର ଜଣେ ବିଶେଷଜ୍ଞଙ୍କ କହିବା ମୁତାବକ, ଏହା ବାସ୍ତବରେ ଏକ ଅଦ୍ଭୁତ ତଥା ଆଶ୍ଚର୍ଯ୍ୟକର ବିଷୟ ଅଟେ । ଏହି ପ୍ରଜାତିର ବାଦୁଡି ଦେଖାଦେବା କୌଣସି ବିପଦରୁ କମ୍ ନୁହେଁ ।