ଅନଲାଇନରେ ସାବିତ୍ରୀ ବ୍ରତ ପାଳନ । ଭିଡିଓ କଲିଂରେ ଦୂରରେ ଥିବା ସ୍ୱାମୀଙ୍କ ଆର୍ଶୀବାଦ ନେଲେ ସ୍ତ୍ରୀ । ସଙ୍ଗରୋଧ କେନ୍ଦ୍ରରୁ ଆସିଲା ରୋଚକ ଚିତ୍ର, ସାମାଜିକ ଦୂରତା ରଖି ସ୍ୱାମୀଙ୍କୁ ପୂଜାର୍ଚ୍ଚନା କଲେ ମହିଳା ।
କନକ ବ୍ୟୁରୋ: ସ୍ୱାମୀଙ୍କ ଦୀର୍ଘ ଜୀବନ କାମନା କରି ଓଡିଆ ପରମ୍ପରାରେ ମହିଳାମାନେ ପାଳନ କରିଛନ୍ତି ସାବିତ୍ରୀ ବ୍ରତ । କରୋନା ଯୋଗୁଁ ବହୁ କଟକଣା ଥିବା ବେଳେ ଆସିଛି କିଛି ନିଆରା ଚିତ୍ର । ସ୍ୱାମୀଙ୍କ ପୂଜା କରି ଏବଂ ତାଙ୍କ ଆଶୀର୍ବାଦ ନେବାର ପରମ୍ପରା ରହିଛି ସାବିତ୍ରୀ ବ୍ରତରେ । କିନ୍ତୁ କରୋନା ଜନିତ ପ୍ରତିକୂଳ ପରିସ୍ଥିତିରେ ଏହା ସମ୍ଭବ ହୋଇ ନାହିଁ । ଫଳରେ ବଦଳିଛି ଚିତ୍ର ।
Kanak News is now on WhatsApp
Join and get latest news updates delivered to you via WhatsApp
ବରଗଡ ଟାଉନ ଥାନା ଅଧିକାରୀ ଥିବା ଦିଲ୍ଲୀପ ବେହେରା ଏହି ବ୍ରତ ସମୟରେ ଘରକୁ ଯାଇ ପାରି ନାହାନ୍ତି । କରୋନା ଯୋଗୁଁ ତାଙ୍କର ବହୁ ଦାୟିତ୍ୱ ରହିଛି । ଫଳରେ ଭିଡିଓ କଲିଂ ମାଧ୍ୟମରେ ପତ୍ନୀ ସହ କଥା ହୋଇ ସାବିତ୍ରୀ ବ୍ରତର ପରମ୍ପରା ରକ୍ଷା କରିଛନ୍ତି ଏହି ଦାୟିତ୍ୱ ସମ୍ପନ୍ନ ଅଧିକାରୀ ଜଣକ । ଠିକ୍ ସେହି ପରି ଏକ ଚିତ୍ର ଆସିଛି ସୋର ଅଂଚଳରୁ । ସ୍ୱାମୀ ସଙ୍ଗରୋଧ କେନ୍ଦ୍ରରେ ଥିବାରୁ କେଦାରପୁର ଅଂଚଳର ମହିଳା ଭିଡିଓକଲିଂ ମାଧ୍ୟମରେ ସ୍ୱାମୀଙ୍କ ପୂଜା ଶେଷ କରିଛନ୍ତି ।
ଅନ୍ୟପଟେ କେତେକ ସଙ୍ଗରୋଧ କେନ୍ଦ୍ରରୁ ଆସିଛି ରୋଚକ ଚିତ୍ର । ଏହି ସଙ୍ଗରୋଧ କେନ୍ଦ୍ରରେ ମହିଳା ମାନେ ପାଳନ କରିଛନ୍ତି ସାବିତ୍ରୀ ବ୍ରତ । ଆଠଗଡର ଖଣ୍ଡହତା ସଂଗରୋଧ କେନ୍ଦ୍ରରେ ଥିବା ପ୍ରବାସୀ ଓଡିଆମାନଙ୍କ ପାଇଁ ଏହି ବ୍ରତ ନେଇ ସମସ୍ତ ବ୍ୟବସ୍ଥା କରିଥିଲେ ସ୍ଥାନୀୟ ସରପଂଚ । ସାମାଜିକ ଦୂରତା ସହ ମାସ୍କ ପିନ୍ଧି ମହିଳାମାନେ ଏହି ବ୍ରତ ପାଳନ କରିଛନ୍ତି । ସେହିପରି ଗଂଜାମ ଜିଲ୍ଲା ସାନଖେମୁଣ୍ଡି ବ୍ଲକର ଆଡପଦା ଗାଁରେ ଥିବା ସଙ୍ଗରୋଧରେ କେନ୍ଦ୍ରରେ ମଧ୍ୟ ପ୍ରବାସୀ ମହିଳାଙ୍କ ପାଇଁ ସାବିତ୍ରୀ ବ୍ରତର ବ୍ୟବସ୍ଥା କରାଯାଇଥିଲା । ଏଥିପାଇଁ ସମସ୍ତଙ୍କ ପାଇଁ ପୂଜା ସାମଗ୍ରୀ ଯୋଗାଇ ଦେଇଥିଲେ ସ୍ଥାନୀୟ ସରପଂଚ ।
ସେପଟେ କରୋନା କଟକଣା ପାଇଁ ବିଭିନ୍ନ ମନ୍ଦିରରେ ୧୪୪ ଧାରା ଜାରି କରିଛନ୍ତି ସରକାର । ଫଳରେ କୌଣସି ବ୍ୟକ୍ତି ମନ୍ଦିରକୁ ଯାଇ ପୂଜା କରିପାରିବେ ନାହିଁ । ତେଣୁ ଖାଁ ଖାଁ ଲାଗୁଛି ସମସ୍ତ ମନ୍ଦିର । ପୁରୀ ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ କିଛି ମହିଳା ଭକ୍ତ ବଡଦାଣ୍ଡରେ ପତିତପାବନକୁ ଦର୍ଶନ କରି ଭୋଗ କରୁଥିବା ଦେଖିବାକୁ ମିଳିଛି ।