କନକ ବ୍ୟୁରୋ : ଭାରତ ଯୋଡ ଯାତ୍ରାରେ ଲାଗିଲା ସାମୟିକ ବିରତି । ଏହି ଯାତ୍ରା ସମୟରେ ରାହୁଲଙ୍କ ସହ ଚାଲୁଥିବା ବେଳେ କଂଗ୍ରେସ ସାଂସଦ ସନ୍ତୋଖ ସିଂ ଚୌଧୁରୀଙ୍କ ଦେହ ଭୀଷଣ ଅସୁସ୍ଥ ହୋଇଥିଲା । ପରେ ତାଙ୍କୁ ହସ୍ପିଟାଲ ନିଆଯାଇଥିଲେ ମଧ୍ୟ ଡାକ୍ତର ସେଠାରେ ମୃତ ଘୋଷଣା କରିଥିଲେ । ଆଉ ସନ୍ତୋଖଙ୍କ ଦେହାନ୍ତ କାରଣରୁ ଭାରତ ଯୋଡ ଯାତ୍ରାରେ ସାମୟିକ ରୋକ ଲାଗିଛି । ଏନେଇ ସୂଚନା ଦେଇଛନ୍ତି ପଞ୍ଜାବ କଂଗ୍ରେସ ସଭାପତି । ସନ୍ତୋଖ ସିଂଙ୍କ ଅନ୍ତ୍ୟେଷ୍ଟି କ୍ରିୟା ଶେଷ ହେବା ପରେ ଭାରତ ଯୋଡ ଯାତ୍ରା ବାବଦରେ ନିଷ୍ପତ୍ତି ନିଆଯିବ ବୋଲି କହିଛନ୍ତି ପଞ୍ଜାବ କଂଗ୍ରେସ ଅଧ୍ୟକ୍ଷ । ତେବେ ସନ୍ତୋଖଙ୍କ ଦେହାନ୍ତକୁ ନେଇ ଶୋକ ବ୍ୟକ୍ତ କରିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧୀ । ଟ୍ୱିଟ୍ କରି ରାହୁଲ କହିଛନ୍ତି, ସନ୍ତୋଖ ସିଂଙ୍କ ଦେହାନ୍ତ ଖବର ମୋତେ ସ୍ତବ୍ଧ କରି ଦେଇଛି । କଂଗ୍ରେସର ଶକ୍ତିଶାଳୀ ସ୍ତମ୍ଭ ଥିଲେ ସନ୍ତୋଖ । ପରିଶ୍ରମୀ ନେତା ଭାବେ ଜଣାଶୁଣା ସନ୍ତୋଖ ଯୁବ କଂଗ୍ରେସରୁ ନିଜର ଯାତ୍ରା ଆରମ୍ଭ କରି ସାଂସଦ ଭାବେ ନିଜର ଜୀବନ ଜନସାଧାରଣଙ୍କ ପାଇଁ ସମର୍ପିତ କରିଥିଲେ । ଏହି ଦୁଃଖଦ ସମୟରେ ସନ୍ତୋଖଙ୍କ ପରିବାରକୁ ସମବେଦନା ଜଣାଇଛନ୍ତି ରାହୁଲ । ସେହିଭଳି କଂଗ୍ରେସ ଅଧ୍ୟକ୍ଷ ମଲ୍ଲିକାଜୁର୍ନ ଖଡଗେ କହିଛନ୍ତି, ସନ୍ତୋଖଙ୍କ ମୃତ୍ୟୁରେ ପୂରା କଂଗ୍ରେସ ପରିବାର ମର୍ମାହତ । ତାଙ୍କର ଦେହାନ୍ତ ଉଭୟ ଦଳ ଓ ସଙ୍ଗଠନ ପାଇଁ ବଡ କ୍ଷତି ।
Kanak News is now on WhatsApp
Join and get latest news updates delivered to you via WhatsApp
श्री संतोख सिंह चौधरी जी के अकस्मात निधन से स्तब्ध हूं।
वो ज़मीन से जुड़े परिश्रमी नेता, एक नेक इंसान और कांग्रेस परिवार के मज़बूत स्तम्भ थे, जिन्होंने युवा कांग्रेस से सांसद तक अपना जीवन जनसेवा को समर्पित किया।
शोकसंतप्त परिवार को अपनी संवेदनाएं व्यक्त करता हूं। pic.twitter.com/1osKsVMugp
— Rahul Gandhi (@RahulGandhi) January 14, 2023
ସନ୍ତୋଖ ସିଂ ପଞ୍ଜାବ ସରକାରରେ ମନ୍ତ୍ରୀ ରହି ସାରିଛନ୍ତି । ଏହାସହ ଜଳନ୍ଧର ଲୋକସଭା ଆସନରୁ ମଧ୍ୟ ସାଂସଦ ରହିଛନ୍ତି । ୨୦୧୪ ଓ ୨୦୧୯ ଲୋକସଭା ନିର୍ବାଚନରେ ସନ୍ତୋଖ ସାଂସଦ ଭାବେ ନିର୍ବାଚିତ ହୋଇଥିଲେ । ପଞ୍ଜାବର ହେଭିୱେଟ ନେତାଙ୍କ ମଧ୍ୟରେ ସନ୍ତୋଖ ଅନ୍ୟତମ ଥିଲେ ।