କ୍ଷମା କରନ୍ତୁ , ମୁଁ ଏହାଠାରୁ ଅଧିକା କିଛି କହିପାରିବି ନାହିଁ: ଅଦମ୍ୟ ସାହସ ଦେଖାଇଲେ ଭାରତୀୟ ବାୟୁସେନାର ପାଇଲଟ୍
ଭାରତର ମିଗ୍-୨୧ ବିମାନ ନଷ୍ଟ ହେବା ପରେ ଯୁଦ୍ଧ ବିମାନରୁ ପାରାଚୁଟ ମାଧ୍ୟମରେ ଅବତରଣ କରି ପାକିସ୍ତାନ ମାଟିରେ ପଡିଯାଇଥିଲେ ଭାରତୀୟ ପାଇଲଟ । ଏହା ପରେ ତାଙ୍କୁ ସାଙ୍ଗେ ସାଙ୍ଗେ ନିଜ କବଜାକୁ ନେଇଯାଇଥିଲା ପାକ ସେନା । ଭାରତୀୟ ପାଇଲଟଙ୍କୁ ଗିରଫ କରିବା ପରେ ତାଙ୍କର କିଛି ଫଟୋ ଏବଂ ଭିଡିଓ ଭାଇରାଲ କରିଛି ପାକିସ୍ତାନ । ଯାହାକୁ ନେଇ ତିବ୍ର ଅସନ୍ତୋଷ ସୃଷ୍ଟି ହୋଇଛି । ତେବେ ପାକିସ୍ତାନ ପକ୍ଷରୁ ଜାରି ହୋଇଥିବା ଏହି ଭିଡିଓରେ ବାୟୁସେନାର ପାଇଲଟଙ୍କର ଆଖିରେ କଳାପଟି ବନ୍ଧା ଯାଇଥିବା ନଜର ଆସିଛି । ଆଉ ସୋସିଆଲ ମିଡିଆରେ ଭାଇରାଲ ହୋଇଥିବା ଏହି ୪୯ ସେକେଣ୍ଡର ଏହି ଭିଡିଓରେ ପାଇଲଟ ଜଣଙ୍କ ସଂପୂର୍ଣ୍ଣ ସାହାସର ସହ ପାକ ସେନା ପଚାରୁଥିବା ସମସ୍ତ ପ୍ରଶ୍ନର ଉତ୍ତର ଦେଉଛନ୍ତି । ଭିଡିଓରେ ପାଇଲଟ୍ ଜଣଙ୍କ କହୁଛନ୍ତି କି, ମୁଁ ଭାରତୀୟ ସେନା କମାଣ୍ଡର । ମୋ ସର୍ଭିସ ନମ୍ବର ୨୭୯୮୧ । ତା ପରେ ପାକିସ୍ତାନ ସେନା ଅଧିକାରୀ ଅଧିକ ତଥ୍ୟ ମାଗିବାରୁ ନିର୍ଭିକତାର ସହ ସେ ଏହାର ଉତର ଦେବାକୁ ରୋକ୍ ଠୋକ୍ ମନା କରିଦେଇଛନ୍ତି ଏବଂ କହୁଛନ୍ତି ଯେ, କ୍ଷମା କରନ୍ତୁ, ମୁଁ ୟାଠୁ ବେଶି କିଛି କହିପାରିବି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଭାଇରାଲ ହୋଇଥିବା ଦ୍ୱିତୀୟ ଭିଡିଓରେ ଦେଖିବାକୁ ମିଳିଛି, ଯେ ପାଇଲଟ ଜଣକ ବିମାନରୁ ଖସି ପଡିଥିବା ଅଂଚଳରେ ତାଙ୍କୁ କିଛି ଲୋକ ସ୍ଥାନୀୟ ଅଂଚଳର କିଛି ଲୋକ ମାରପିଟ କରୁଛନ୍ତି । ଏହା ପରେ ତୃତୀୟ ଥର ପାଇଁ ପାକିସ୍ତାନ ପକ୍ଷରୁ ଭାରତୀୟ ପାଇଲଟଙ୍କର ୧ ମିନିଟ ୧୯ ସେକେଣ୍ଡର ଏକ ଭିଡିଓ ଜାରି କରାଯାଇଛି । ଯେଉଁଥିରେ ପାଇଲଟ ଜଣକ ହାତରେ ଚା କପ ଧରିଥିବାର ଦେଖିବାକୁ ମିଳିଛି । ସେ ସମୟରେ କହିଛନ୍ତି ଯେ ପାକ ସେନା ତାଙ୍କୁ ଭଲ ବ୍ୟବହାର କରୁଛନ୍ତି । ମୋର ଯତ୍ନ ମଧ୍ୟ ନେଉଛନ୍ତି ।ପାକ ସେନାର ଅଧିକାରୀ ମାନେ ଖୁବ ଭଦ୍ର । ମୋତେ ମାରଧର କରୁଥିବା ଭିଡ ଭିତରୁ ସେମାନେ ମୋତେ ଉଦ୍ଧାର କରିଛନ୍ତି ।
ତେବେ ଶତ୍ରୁ ପକ୍ଷ ହାତରେ ଧରାପଡିଥିଲେ ମଧ୍ୟ ଅସୀମ ଧୈର୍ଯ୍ୟ ଓ ସାହାସର ନିଦର୍ଶନ ଦେଖାଇଛନ୍ତି ଭାରତୀୟ ପାଇଲଟ୍ ଜଣଙ୍କ । ହଡବଡେଇ ଯାଇ ହତାଶ ହେଉନାହାନ୍ତି କି ଶତ୍ରୁ ପକ୍ଷ ଆଗରେ ଜୀବନ ଭିକ୍ଷା ବି କରୁନାହାନ୍ତି । ଭାରତୀୟ ଯବାନଙ୍କ ଟାଣ ପଣ ଓ ନିର୍ଭିକତାର ବଡ ଉଦାହରଣ ଦେଖାଇଛନ୍ତି ଏହି ପାଇଲଟ ଜଣଙ୍କ ।