ମ୍ୟାନମାରରେ ସାମରିକ ଶାସନର କ୍ରୁରତା । ବିଭିନ୍ନ ସହରରେ ଆନ୍ଦୋଳନକାରୀଙ୍କ ଉପରକୁ ଗୁଳିମାଡ । ୧୮ ମୃତ, ୩୦ ରୁ ଅଧିକ ଗୁରୁତର
କନକ ବ୍ୟୁରୋ : ଫେବୃଆରୀ ପହିଲା ଦିନ ମ୍ୟାନମାର ସୈନ୍ୟବାହିନୀ ଦେଶର ଶାସନ କ୍ଷମତାକୁ ନିଜ ହାତକୁ ନେଇଛି । ଗଣତାନ୍ତ୍ରିକ ପଦ୍ଧତିିରେ ନିର୍ବାଚିତ ଆଙ୍ଗ ସାନ୍ ସ୍ୟୁ ଚୀ ସରକାରଙ୍କୁ ହଟାଇ କ୍ଷମତା ଦଖଲ କରିନେଇଥିଲା ସୈନ୍ୟବାହିନୀ । ଏନେଇ ସେହିଦିନ ଠାରୁ ମ୍ୟାନମାରରେ ସେନାବାହିନୀ ବିରୋଧରେ ସାଧାରଣ ଜନତା ବିକ୍ଷୋଭ ଜାରୀ ରଖିଛନ୍ତି । ଏହି କ୍ରମରେ ରବିବାର ଦିନ ସାମରିକ ଶାସନ ବିରୋଧରେ ବିକ୍ଷୋଭ ଚାଲିଥିବା ବେଳେ ସେନାବାହିନୀ ତା’ର କ୍ରୁରତା ଦେଖାଇଛି । ବିଭିନ୍ନ ସହରରେ ବିକ୍ଷୋଭକାରୀଙ୍କ ଉପରକୁ ପୋଲିସ ତରଫରୁ ଗୁଳି ଚଳାଯିବା ଫଳରେ ୧୮ ଜଣଙ୍କର ମୃତ୍ୟୁ ହୋଇଥିବା ବେଳେ ୩୦ ରୁ ଅଧିକ ଆନ୍ଦୋଳନକାରୀ ଗୁରୁତର ହୋଇଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଦାୱେଇ, ୟାଙ୍ଗୁନ, ମ୍ୟେଇକ୍, ମାଣ୍ଡାଲେ, ବାଗୋ ଏବଂ ପୋକୋକ୍କୁ ସହରରେ ଆନ୍ଦୋଳନକାରୀ ମାନେ ସାମରିକ ଶାସନ ବିରୋଧରେ ସମାବେଶ କରୁଥିବା ବେଳେ ହଠାତ ପୋଲିସ ତରଫରୁ ସମାବେଶ ଉପରକୁ ଗୁଳି ଚଳା ଯାଇଥିିବା କଥା ଜାତିସଂଘ ମାନବାଧିକାର କାର୍ଯ୍ୟାଳୟ ପକ୍ଷରୁ କୁହାଯାଇଛି । ସୂଚନା ମୁତାବକ ସମାବେଶ ସ୍ଥଳରୁ ଆନ୍ଦୋଳନକାରୀଙ୍କୁ ଘଉଡାଇବାକୁ ପୋଲିସ ପ୍ରଥମେ ଲୁହବୁହା ଗ୍ୟାସ୍, ଫ୍ଲାସବ୍ୟାଙ୍ଗ ଓ ଗ୍ରେନେଡ ମାଡ କରାଯାଇଥିଲା । ଏଥିରେ ଆନ୍ଦୋଳନକାରୀ ମାନେ ସମାବେଶ ସ୍ଥଳ ଛାଡି ନଯିବା ଫଳରେ ପୋଲିସ ଗୁଳି ଚାଳନା କରିଥିଲା । ମ୍ୟାନମାର ସାମରିକ ଶାସକଙ୍କ ଏଭଳି ଦମନଲୀଳାକୁ ଦୃଢ ନିନ୍ଦା କରିଛି ଜାତିସଂଘର ମାନବାଧିକାର କାର୍ଯ୍ୟାଳୟ । ଏହାସହ ଶାନ୍ତିପୂର୍ଣ୍ଣ ଆନ୍ଦୋଳନ ବିରୋଧରେ ବଳ ପ୍ରୟୋଗ ବନ୍ଦ କରିବାକୁ ମ୍ୟାନମାର ସାମରିକ ଶାସକଙ୍କୁ ଆହ୍ୱାନ ଦେଇଛନ୍ତି ମାନବାଧିକାର କାର୍ଯ୍ୟାଳୟର ମୁଖପାତ୍ର ରବିନା ଶାମଦସାନି ।