କର୍ଣ୍ଣାଟକ ନାଟକରେ ନୂଆ ମୋଡ : କାଲି ସକାଳ ସାଢେ ୧୦ଟାରେ ପୁଣି ସୁପ୍ରିମକୋର୍ଟରେ ଶୁଣାଣି । ସମସ୍ତ ପକ୍ଷଙ୍କୁ ନୋଟିସ, ଆଜି ସକାଳ ୯ଟାରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ ୟେଦିୟୁରପ୍ପା
କନକ ବ୍ୟୁରୋ : କର୍ଣ୍ଣାଟକରେ ବିଜେପିର ୟେଦ୍ୟୁରପ୍ପା ମୁଖ୍ୟମନ୍ତ୍ରୀ ଭାବେ ଶପଥ ନେବା ରାସ୍ତା ସଫା ହୋଇଛି । ଶପଥଗ୍ରହଣ ସମାରୋହ ଉପରେ ରୋକ ଲଗାଇବାକୁ ମନା କରିଦେଇଛନ୍ତି ସୁପ୍ରିମକୋର୍ଟ । ଆଜି ସକାଳ ୯ଟାରେ ୟେଦୁୟୁରପ୍ପା ବେଙ୍ଗାଲୁରୁରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ । ଗତକାଲି ରାଜ୍ୟପାଳ ୟେଦୁୟୁରପ୍ପାଙ୍କୁ ମୁଖ୍ୟମନ୍ତ୍ରୀ ଭାବେ ଶପଥ ନେବା ପାଇଁ ଆମନ୍ତ୍ରଣ କରିବା ପରେ ଏହା ବିରୋଧରେ ରାତି ଅଧରେ ସୁପ୍ରିମକୋର୍ଟ ଯାଇଥିଲେ । ଅଧରାତିରୁ ଭୋର ଯାଏଁ ସୁପ୍ରିମକୋର୍ଟରେ କର୍ଣ୍ଣାଟକ ଲଢେଇ ଜାରି ରହିଥିଲା । ତେବେ ଶପଥ ଗ୍ରହଣ ସମାରୋହ ଉପରେ ରୋକ ଲଗାଇବାକୁ ମନା କରିଦେଇଛନ୍ତି ସୁପ୍ରିମକୋର୍ଟ । ଏହା ସହ କଂଗ୍ରେସ-ଜେଡିଏସ ମାମଲାକୁ ଖାରଜ ବି କରିନାହାନ୍ତି । ମାମଲାରେ ୟେଦୁୟୁରପ୍ପାଙ୍କ ସହ ସମସ୍ତ ପକ୍ଷକୁ ନୋଟିସ ଜାରି କରିଛନ୍ତି ସୁପ୍ରିମକୋର୍ଟ । ଏହାସହ ୧୫ ଓ ୧୬ ତାରିଖର ସମସ୍ତ ତଥ୍ୟ ମାଗିଛନ୍ତି ସର୍ବୋଚ୍ଚ ନ୍ୟାୟାଳୟ, ଯାହାକୁ ୟେଦୁୟୁରପ୍ପା ରାଜ୍ୟପାଳଙ୍କୁ ଦେଇଥିଲେ । ମାମଲାର ଶୁଣାଣି ଆସନ୍ତାକାଲି ସକାଳ ସାଢେ ୧୦ଟାରେ ପୁଣି ହେବ ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଗତକାଲି କର୍ଣ୍ଣାଟକ ରାଜ୍ୟପାଳ ବିଜେପିକୁ ସରକାର ଗଠନ ପାଇଁ ଡାକିବା ପରେ ଆରମ୍ଭ ହୋଇଥିଲା ଅସଲ ନାଟକ । ସକାଳ ୯ଟାରେ ଶପଥ ପାଇଁ ସମୟ ଧାର୍ଯ୍ୟ ହୋଇଥିବା ବେଳେ ଗତକାଲି ରାତି ୧୧ଟା ୨୭ରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ କଂଗ୍ରେସ ଓ ଜେଡିଏସ । କଂଗ୍ରେସ କହିଥିଲା, ଦିନ ୪ଟା ଯାଏଁ ଶପଥ ଗ୍ରହଣ ସମାରୋହଙ୍କୁ ଟଳାଯାଉ । ରାତି ଗୋଟାଏ ୪୫ ମିନିଟିରେ ସୁପ୍ରିମକୋର୍ଟ ମାମଲାର ଶୁଣାଣି ପାଇଁ ରାଜି ହୋଇଥିଲେ । ଜଷ୍ଟିସ ସିକ୍ରିୀ, ଜଷ୍ଟିସ ଭୂଷଣ ଓ ଜଷ୍ଟିସ ବୋବଡେଙ୍କ ବେଂଚ ରାତି ୨ଟା ପରେ ମାମଲାର ଶୁଣାଣି କରିଥିଲେ । କଂଗ୍ରେସ ପକ୍ଷରୁ ଅଭିଷେକ ମନୁ ସିଙ୍ଗଭି ଓ ବିଜେପି ପକ୍ଷରୁ ପୂର୍ବତନ ଆଟର୍ଣ୍ଣିଂ ଜେନେରାଲ କୋର୍ଟରେ ପକ୍ଷ ରଖିଥିଲେ । ରାତି ୨ଟାରେ ସୁପ୍ରିମକୋର୍ଟ ୟେଦୁୟୁରପ୍ପା ଶପଥ ସମାରୋହ ଉପରେ ରୋକ ଲଗାଇବାକୁ ମନା କରିଦେଇଥିଲେ । ସୁପ୍ରିକୋର୍ଟରେ ଦ୍ୱିତୀୟ ଥର ପାଇଁ ରାତିରେ ଏଭଳି ଐତିହାସିକ ଶୁଣାଣି ହୋଇଛି ।
ସେପଟେ ରାଜ୍ୟପାଳଙ୍କ ନିଷ୍ପତି ବିରୋଧରେ କଂଗ୍ରେସ ଓ ଜେଡିଏସ ରାତିରେ ବେଙ୍ଗାଲୁରୁରେ ପ୍ରଦର୍ଶନ କରିଥିଲେ । ସେପଟେ ବିଧାୟକ ଦଳରେ କୌଣସି ବିଭାଜନ ଆଶଙ୍କାରେ ବେଙ୍ଗାଲୁରୁର ଏକ ହୋଟେଲରେ କଂଗ୍ରେସ ଓ ଜେଡିଏସ ବିଧାୟକଙ୍କୁ ରଖିବାକୁ ଉଦ୍ୟମ ଚାଲିଛି । ସୁପ୍ରିମକୋର୍ଟ ନିର୍ଦ୍ଦେଶ ପରେ ଏବେ ୧୫ ଦିନ ମଧ୍ୟରେ ବହୁମତ ସାବ୍ୟସ୍ତ କରିବେ । କିନ୍ତୁ ଏବେ ସବୁଠାରୁ ବଡ ଚ୍ୟାଲେଞ୍ଜ ପାଲଟିଛି କଂଗ୍ରେସ ଓ ଜେଡିଏସ ପାଇଁ ।