ସୁପ୍ରିମକୋର୍ଟଙ୍କ ରାୟ ଯୋଗୁଁ ଚାଲିଗଲା ଜୀବନ ! ପରକୀୟା ପ୍ରୀତି ଅବୈଧ ନୁହେଁ ବୋଲି ଯୁକ୍ତି କଲେ ସ୍ୱାମୀ, ଆତ୍ମହତ୍ୟା କଲେ ସ୍ତ୍ରୀ
ପରକୀୟା ପ୍ରୀତି ଅପରାଧ ନୁହେଁ । ଗତ ସପ୍ତାହରେ ଏପରି ରାୟ ଦେଇଛନ୍ତି ସୁପ୍ରିମକୋର୍ଟ । ତେବେ ଏହି ରାୟର ଶୁଣାଣି ପରେ ଅନେକ ବିବାଦ ମଧ୍ୟ ଉପୁଜିଥିଲା । ହେଲେ ନିକଟରେ ସୁପ୍ରିମକୋର୍ଟଙ୍କ ଏହି ରାୟ ଯୋଗୁଁ ଜଣେ ମହିଳା ଆତ୍ମହତ୍ୟା କରିଛନ୍ତି । ଚେନ୍ନାଇ ଏମଜିିଆର ନଗରରେ ଜଣେ ୨୪ ବର୍ଷୀୟ ମହିଳା ଫାଶୀ ଲଗାଇ ଆତ୍ମହତ୍ୟା କରିବାର ମାମଲା ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଚେନ୍ନାଇର ଏମଜିିଆର ନଗରରେ ରହୁଥିବା ଜଣେ ସିକ୍ୟୁରିଟି ଗାର୍ଡ଼ ନିଜ ସ୍ତ୍ରୀକୁ ସୁପ୍ରିମକୋର୍ଟର ରାୟ ବିଷୟରେ ବୁଝାଇବା ସହ ଏବେ ତୁମେ ମୋତେ ଅନ୍ୟ ମହିଳାଙ୍କ ସହ ଶାରୀରିକ ସଂପର୍କ ରଖିବା ପାଇଁ ମନା କରିପାରିବ ନାହିଁ ବୋଲି କହିଥିଲେ । କାରଣ ସୁପ୍ରିମ କୋର୍ଟ ପରକୀୟା ପ୍ରୀତି ଅପରାଧ ନୁହେଁ ବୋଲି କହି ସାରିଛନ୍ତି । ଏହା ଶୁଣିବା ପରେ ଚୌକିଦାରଙ୍କ ସ୍ତ୍ରୀ ଆତ୍ମହତ୍ୟା କରିଥିବା ସୂଚନା ମିଳିଛି । ଉଭୟଙ୍କର ଏକ ପୁଅ ମଧ୍ୟ ଅଛି ।
ସୂଚନା ମୁତାବକ, ଦୁଇ ବର୍ଷ ପୂର୍ବେ ପୁଷ୍ପଲତା ଏବଂ ଜନ୍ ଫ୍ରାଙ୍କଲିନ ପରସ୍ପରକୁ ପ୍ରେମ ବିବାହ କରିଥିଲେ । ଘର ଲୋକଙ୍କୁ ବିରୋଧ କରି ଦୁହେଁ ବିବାହ କରିଥିଲେ । କିଛି ମାସେ ତଳେ ଜନ୍ ପୁଷ୍ପଲତାଙ୍କୁ ଟିବି ହୋଇଥିବା ଜାଣି ତାଙ୍କ ଠାରୁ ଦୂରତା ବଜାୟ ରଖିବା ସହ ତାଙ୍କୁ କୌଣସି ଆର୍ଥିକ ସହାୟତା ଦେଇ ନଥିଲେ । ଏ ନେଇ ପୁଷ୍ପଲତା ଜନଙ୍କ ଜଣେ ସାଙ୍ଗକୁ ଜଣାଇବା ପରେ ଜନ୍ ଅନ୍ୟ ମହିଳାଙ୍କ ସହ ସଂପର୍କ ରଖିଥିବା କହିଥିଲେ ଜନଙ୍କ ସାଙ୍ଗ । ଏହା ଜାଣି ପୁଷ୍ପଲତା ଜନଙ୍କ ସହ ଝଗଡ଼ା କରିବା ସହ ସେ ମହିଳାଙ୍କଠାରୁ ଦୂରରେ ରହିବା ପାଇଁ କହିଥିଲେ ।
ଯଦି ଏମିତି ନ କର ମୁଁ ପୁଲିସରେ ଅଭିଯୋଗ କରିବି ବୋଲି ପୁଷ୍ପଲତା ଜନଙ୍କୁ କହିବା ପରେ ହସିବାକୁ ଲାଗିଥିଲେ ଜନ୍ । ହସିବାର କାରଣ ପଚାରିବା ପରେ ଜନ୍ ସୁପ୍ରିମ କୋର୍ଟଙ୍କ ରାୟ ବିଷୟରେ ପୁଷ୍ପଲତାଙ୍କୁ ଜଣାଇବା ସହ ଅନ୍ୟ ମହିଳା ସହ ଶାରୀରିକ ସଂପର୍କ ରଖିବା ଏବେ ଆଉ ଅପରାଧ ନୁହେଁ ବୋଲି କହିଥିଲେ । ଜନଙ୍କ କଥା ଶୁଣି ଆଘାତ ପାଇଥିଲେ ପୁଷ୍ପଲତା । ଆଉ ଶେଷରେ ଆତ୍ମହତ୍ୟାର ବାଟକୁ ବାଛିନେଲେ । ତେବେ ପୁଷ୍ପଲତାଙ୍କ ଆତ୍ମହତ୍ୟା ପରେ ଜନକୁ ଗିରଫ କରିଛି ପୋଲିସ୍ ।