ଲୋକସଭାର ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ବିଜେଡିର କସରତ ! ଦେଖିବାକୁ ମିଳିପାରେ ନୂଆ ମୁହଁ, ବିଜେଡି କରୁଛି ତନାଘନା ।
କନକ ବ୍ୟୁରୋ : ସାଧାରଣ ନିର୍ବାଚନର ପ୍ରଥମ ପର୍ଯ୍ୟାୟରେ ଆସନ୍ତା ଏପ୍ରିଲ ୧୧ ତାରିଖରେ ଦକ୍ଷିଣ ଓଡିଶାର ବ୍ରହ୍ମପୁର, ନବରଙ୍ଗପୁର ଏବଂ କୋରାପୁଟ ସମେତ ପଶ୍ଚିମ ଓଡିଶାର କଳାହାଣ୍ଡିରେ ମତଦାନ ହେବ । ଏସବୁ ନିର୍ବାଚନ ମଣ୍ଡଳୀ ପାଇଁ ବିଜେଡି, କଂଗ୍ରେସ ଓ ବିଜେପି ଶିବିରରେ ପ୍ରାର୍ଥୀ ଚୂଡାନ୍ତ ଚାଲିଛି । ଆସନ୍ତୁ ଜାଣିବା ଏସବୁ ନିର୍ବାଚନ ମଣ୍ଡଳୀରେ କାହା ସହ କାହାର ଲଢେଇ ହେବା ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ବ୍ରହ୍ମପୁରରେ ବିଜେଡିର ପ୍ରାର୍ଥୀ କିଏ?
ବ୍ରହ୍ମପୁର ଲୋକସଭା ଆସନ ପାଇଁ ବର୍ତମାନର ସାଂସଦ ସିଦ୍ଧାନ୍ତ ମହାପାତ୍ରଙ୍କୁ ପୁଣି ଟିକେଟ୍ ଦେଇପାରେ ବିଜେଡି । ତେବେ କଂଗ୍ରେସ ଛାଡି ବିଜେଡିରେ ଯୋଗ ଦେଇଥିବା ପୂର୍ବତନ ମନ୍ତ୍ରୀ ଚନ୍ଦ୍ରଶେଖର ସାହୁଙ୍କ ନାଁକୁ ନେଇ ଅଧିକ ଚର୍ଚ୍ଚା ହେଉଛି । ସେହିପରି ନିକଟରେ ବିଜେଡିରେ ସାମିଲ ହୋଇଥିବା ପାରଳା ରାଜକୁମାରୀ କଲ୍ୟାଣୀ ଦେବୀଙ୍କ ନାଁ ବି ବ୍ରହ୍ମପୁର ଲୋକସଭା ଆସନ ପାଇଁ ଶୁଣାଯାଉଛି ।
ସେପଟେ ପ୍ରଶ୍ନ ଉଠୁଛି କିଏ ହେବ କଂଗ୍ରେସର ପ୍ରାର୍ଥୀ ? ଭୃଗୁଙ୍କୁ ବିଜେପି ଦେବ କି ଟିକେଟ୍? ବ୍ରହ୍ମପୁର ଲୋକସଭା ଆସନ ପାଇଁ କଂଗ୍ରେସ, ଭି.ଚନ୍ଦ୍ରଶେଖର ନାଇଡୁଙ୍କୁ ଟିକେଟ୍ ଦେବା ସମ୍ଭାବନା ଅଧିକ । ଏପରିକି ନାଇଡୁଙ୍କ ନାଁରେ ପିସିସି ମୋହର ମାରିବା ସହ କେନ୍ଦ୍ରୀୟ ସ୍କ୍ରିନିଂ କମିଟି ତାଙ୍କ ନାଁକୁ ଚୂଡାନ୍ତ କରିସାରିଥିବା କୁହାଯାଉଛି । ସେପଟେ ବିଜେପି, ଭୃଗୁ ବକ୍ସିପାତ୍ରଙ୍କୁ ବ୍ରହ୍ମପୁର ଲୋକସଭା ପାଇଁ ମୈଦାନକୁ ଓହ୍ଲାଇପାରେ ବୋଲି ଚର୍ଚ୍ଚା ହେଉଛି ।
ସେହିପରି ନବରଙ୍ଗପୁରରେ କିଏ ହେବ ବିଜେଡି ପ୍ରାର୍ଥୀ ? କଂଗ୍ରେସରୁ ଲଢ଼ିପାରନ୍ତି ପ୍ରଦୀପ ମାଝି । ସାଂସଦ ବଳଭଦ୍ର ମାଝିଙ୍କୁ ବିଜେଡି ପୁଣି ଥରେ ନବରଙ୍ଗପୁର ଲୋକସଭା ଟିକେଟ୍ ଦେବା ନେଇ ଚର୍ଚ୍ଚା ହେଉଛି । ଏପଟେ ଝରିଗାଁ ବିଧାୟକ ତଥା ମନ୍ତ୍ରୀ ରମେଶ ମାଝି ବି ଦୌଡରେ ରହିଛନ୍ତି । କଂଗ୍ରେସ ପାଇଁ କିନ୍ତୁ ନବରଙ୍ଗପୁର ଆସନ ନେଇ ଦ୍ୱନ୍ଦ୍ୱ ନାହିଁ । କାର୍ଯ୍ୟକାରୀ ସଭାପତି ପ୍ରଦୀପ ମାଝିଙ୍କୁ ଦଳ ଲୋକସଭା ଟିକେଟ୍ ଦେବା ନେଇ ଚୂଡାନ୍ତ ହୋଇସାରିଥିବା ଶୁଣାଯାଉଛି ।
କୋରାପୁଟରେ ମହିଳା ପ୍ରାର୍ଥୀ ଦେବ ବିଜେଡି ? କଂଗ୍ରେସରୁ ଲଢିବେ କି ପୂର୍ବତନ ମନ୍ତ୍ରୀଙ୍କ ପୁଅ ? ବିଜେପିରୁ ଜୟରାମ ପାଙ୍ଗୀଙ୍କ ଟିକେଟ୍ ପକ୍କା ? କୋରାପୁଟ ଲୋକସଭା ଆସନ ପାଇଁ ବିଜେଡି ସାଂସଦ ଝିନ୍ନ ହିକକାଙ୍କ ନାଁ ଚର୍ଚାରେ ରହିଛି । ତେବେ ଏହି ଆସନରୁ ମହିଳା ପ୍ରାର୍ଥୀ ଭାବେ ଝିନ୍ନଙ୍କ ସ୍ତ୍ରୀ କୌଶଲ୍ୟାଙ୍କୁ ଦଳ ପ୍ରାର୍ଥୀ କରିବ ବୋଲି ଚର୍ଚ୍ଚା ହେଉଛି । ସେପଟେ ପୂର୍ବତନ ମନ୍ତ୍ରୀ ରାମଚନ୍ଦ୍ର ଉଲ୍ଲାକାଙ୍କ ପୁଅ ସପ୍ତଗିରି ଉଲ୍ଲାକାଙ୍କୁ କୋରାପୁଟରୁ ପ୍ରୋଜେକ୍ଟ କରିପାରେ କଂଗ୍ରେସ । ସେହିପରି ଶଙ୍ଖ ଛାଡି ପଦ୍ମ ଧରିଥିବା ଜୟରାମ ପାଙ୍ଗୀଙ୍କୁ ବିଜେପି କୋରାପୁଟରୁ ପ୍ରାର୍ଥୀ କରିବା ସମ୍ଭାବନା ଅଧିକ ।
କିଏ ହେବ ବିଜେଡିର କଳାହାଣ୍ଡି ପ୍ରାର୍ଥୀ ? ମୈଦାନରେ କଂଗ୍ରେସର ଭକ୍ତ ଦାସ, ବିଜେପିର ପ୍ରଦୀପ୍ତ ? ସାଂସଦ ଅର୍କକେଶରୀ ସିଂଦେଓଙ୍କୁ ବିଜେଡି ଏଥର କଳାହାଣ୍ଡି ବିଧାନସଭା ଟିକେଟ୍ ଦେବା ନେଇ ଚର୍ଚ୍ଚା ହେଉଛି । ସେହିପରି ଧର୍ମଗଡ ବିଧାୟକ ପୁଷ୍ପେନ୍ଦ୍ର ସିଂଦେଓ ଓ ଜୁନାଗଡ ବିଧାୟକ କ୍ୟାପଟେନ୍ ଦିବ୍ୟଶଙ୍କର ମିଶ୍ରଙ୍କ ନାଁ ବି ଶୁଣାଯାଉଛି । କଳାହାଣ୍ଡି ଆସନରୁ ପ୍ରଚାର କମିଟି ଅଧ୍ୟକ୍ଷ ତଥା ପୂର୍ବତନ ସାଂସଦ ଓ ମନ୍ତ୍ରୀ ଭକ୍ତଚରଣ ଦାସଙ୍କୁ ଟିକେଟ୍ ଦେଇପାରେ କଂଗ୍ରେସ । ସେପଟେ ବିଜେପି ପ୍ରଦୀପ୍ତ ନାୟକଙ୍କୁ କଳାହାଣ୍ଡି ବିଧାନସଭା ଟିକେଟ୍ ଦେବା ନେଇ ଚର୍ଚା ହେଉଛି ।