ପାକିସ୍ତାନ ପ୍ରଧାନମନ୍ତ୍ରୀଙ୍କ ସାଂଘାତିକ ବୟାନ । ପୁଲୱାମା ପରି ଆଉ ଏକ ଘଟଣା ଦେଖିବ ଭାରତ
କନକ ବ୍ୟୁରୋ : ଜମ୍ମୁ-କାଶ୍ମୀରରୁ ଧାରା ୩୭୦ର ଉଚ୍ଛେଦ ପରେ ଚିହିଁକି ଉଠିଛି ପାକିସ୍ତାନ । ପାକିସ୍ତାନର ପ୍ରଧାନମନ୍ତ୍ରୀ ପରୋକ୍ଷରେ ଭାରତକୁ ଧମକ ଦେବାକୁ ପଛାଇ ନାହାନ୍ତି । ଧାରା ୩୭୦ର ଉଚ୍ଛେଦ ପରେ ଭାରତରେ ପୁଲୱାମା ଭଳି ଅଧିକ ଘଟଣା ଦେଖିବାକୁ ମିଳିବ । ପାକିସ୍ତାନ ସଂସଦର ମିଳିତ ଅଧିବେଶନରେ ଏଭଳି କହିଛନ୍ତି ଇମ୍ରାନ । ଭାରତ ସରକାର ଯାହା କରିଛନ୍ତି ତାହା ଯୁଦ୍ଧ ଅପରାଧ । ଭବିଷ୍ୟତରେ ଅଧିକରୁ ଅଧିକ ପୁଲଓ୍ଵାମା ପରି ଘଟଣା ହେବ ପରୋକ୍ଷରେ ଧମକ ଦେଇଛନ୍ତି ଇମ୍ରାନ ।
Kanak News is now on WhatsApp
Join and get latest news updates delivered to you via WhatsApp
ଇମ୍ରାନ କହିଛନ୍ତି ଯେ ବିଜେପି ହେଉଛି ଏକ ହିନ୍ଦୁତ୍ୱବାଦୀ ଦଳ ଯିଏକି ହିନ୍ଦୁମାନଙ୍କୁ ଅନ୍ୟ ସଂପ୍ରଦାୟର ଲୋକମାନଙ୍କ ଅପେକ୍ଷା ଉଚ୍ଚ ବୋଲି ଭାବେ । ଦଳର ଏହି ହିନ୍ଦୁତ୍ୱବାଦୀ ଆଦର୍ଶକୁ ପାଳନ କରିବାକୁ ଯାଇ କାଶ୍ମୀରରୁ ଧାରା ୩୭୦ ଉଠାଇ ଦିଆଯାଇଛି । ବିଜେପି କାଶ୍ମୀର ଲୋକମାନଙ୍କୁ ହିନ୍ଦୁମାନଙ୍କ ପରି ସମାନ ମଣିଷ ବୋଲି ଭାବେ ନାହିଁ, ଏଣୁ ସେମାନଙ୍କ ସ୍ୱାଧୀନତା ଆନ୍ଦୋଳନକୁ ଦବାଇବାକୁ ଚାହୁଁଛି । ଏପରି କରି ସେମାନ କେବଳ ଅନ୍ତର୍ଜାତୀୟ ନିୟମ ନୁହେଁ, ନିଜ ଦେଶର ନିୟମର ଉଲ୍ଲଙ୍ଘନ କରୁଛନ୍ତି ବୋଲି ଇମ୍ରାନ କହିଛନ୍ତି । ଏଣୁ ଆମ ଲଢେଇ ଏକ ଜାତିବାଦୀ ସାଂପ୍ରଦାୟିକ ଦଳ ସହିତ ବୋଲି ସେ କହିଛନ୍ତି ।
ଇମ୍ରାନ କହିଛନ୍ତି, ବିଜେପି ଏବେ ଦଳର ପ୍ରତିଷ୍ଠାତାଙ୍କ ଜାତିବାଦ ବିଚାରଧାରା ଉପରେ କାମ କରୁଛି । ଏପରିକି ମିଳିତ ଅଧିବେଶନରେ କହିଛନ୍ତି, ମହମ୍ମଦ ଜିନ୍ନାଙ୍କ ହିନ୍ଦୁସ୍ତାନକୁ ବିଭାଜନ ନିଷ୍ପତିକୁ ସମର୍ଥନ କରିବା ସଠିକ୍ ଥିଲା । କାରଣ ସେ ଜାଣିଥିଲେ ଯେ ଆରଏସଏସ ଭାରତକୁ କେବଳ ହିନ୍ଦୁ ମାନଙ୍କ ରାଷ୍ଟ୍ର କରିବାକୁ ଚାହୁଁଥିଲେ । କିନ୍ତୁ ସବୁ ମଣିଷଙ୍କୁ ସମାନ ଅଧିକାର ଦେବା ପାଇଁ ପାକିସ୍ତାନ ଗଠନ ହୋଇଥିଲା ।
କାଶ୍ମୀରରୁ ଧାରା ୩୭୦ ଉଠାଇବା ପାଇଁ ଭାରତର ଘୋଷଣା ପରେ ପାକିସ୍ତାନରେ ଏହାକୁ ନେଇ କଡା ବିରୋଧ ପ୍ରକାଶ ପାଇଛି । ପାକିସ୍ତାନ ସରକାର ଭାରତ ସରକାରଙ୍କ ଏହି ପଦକ୍ଷେପକୁ ବେଆଇନ ବୋଲି ଘୋଷଣା କରିବା ସହ ଜାତିସଂଘର ସୁରକ୍ଷା ପରିଷଦରେ ଏହି ପ୍ରସଙ୍ଗ ଉଠାଯିବ ବୋଲି କହିଛନ୍ତି ।