ନବୀନଙ୍କ ଫେସବୁକ୍ ଏକାଉଂଟକୁ ନେଇ ସସପେନ୍ସ : ଲାଇକ୍ ନକରି ଫଲୋଅର୍ସରେ ଆସୁଛି ନାଁ
ସୋସିଆଲ ନେଟୱାର୍କିଂ ସାଇଟ୍ ଫେସବୁକରେ ଆସିଲେ ନବୀନ । ୩ ମେ’ରେ ତିଆରି ହେଲା ପେଜ୍, ଆଉ ଦୁଇ ଦିନ ଭିତରେ ପାଖାପାଖି ୫୦ ହଜାର ୟୁଜର ନବୀନଙ୍କ ପେଜକୁ ଲାଇକ କଲେଣି । ଚାରି ଚାରି ଥରର ମୁଖ୍ୟମନ୍ତ୍ରୀ ନବୀନଙ୍କ ଲୋକପ୍ରିୟତାକୁ ଦେଖିଲେ ସଂଖ୍ୟା ସେତେ ଅଧିକ ନୁହେଁ । ହେଲେ ଅଭିଯୋଗ ଆସିଛି ଯେ, ଫେସବୁକରେ ଏହି ଲୋକପ୍ରିୟତାକୁ ହାସଲ କରିବାକୁ ହୋଇଛି ଟାମ୍ପରିଂ । ବିରୋଧୀ କଂଗ୍ରେସ ଓ ବିଜେପିର ନେତା ଅଭିଯୋଗ କରିଛନ୍ତି, ସେମାନେ ନବୀନଙ୍କ ଫେସବୁକ ପେଜକୁ ଲାଇକ୍ କରିନାହାନ୍ତି । ହେଲେ ସେମାନଙ୍କ ନାଁ ଏହି ତାଲିକାରେ ଦର୍ଶାଉଛି । ଯାହାକୁ ନେଇ ଆରମ୍ଭ ହୋଇଛି ରାଜନୀତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଫେସବୁକରେ ନବୀନଙ୍କ ଲୋକପ୍ରିୟତାକୁ ବଢାଇବାକୁ ହୋଇଛି କି ଟାମ୍ପରିଂ? ଏହି ଦ୍ୱନ୍ଦ୍ୱକୁ ଆହୁରି ବଢାଇଛନ୍ତି ପାରାଦୀପର ଜଣେ ଯୁବକ । ଅଭିଯୋଗ ଅନୁସାରେ, ସେ ନବୀନଙ୍କ ନାଁରେ ଆଗରୁ ଫେସବୁକ ପେଜ ତିଆରି କରିଥିଲେ । ଯେଉଁଥିରେ ପାଖାପାଖି ୪୧ ହଜାରରୁ ଅଧିକ ୟୁଜର ଏହି ପେଜକୁ ଲାଇକ କରିଥିଲେ । ଆଉ ସେହି ଫେସବୁକ ପେଜକୁ ଟାମ୍ପରିଂ କରି ନବୀନଙ୍କ ଅଫିସିଆଲ ଫେସବୁକ ପେଜ ଖୋଲାଯାଇଥିବା ସେ ଅଭିଯୋଗ ଆଣିଛନ୍ତି । ଏପରିକି ତାଙ୍କ ପେଜକୁ ଲାଇକ କରିଥିବା ୟୁଜରଙ୍କ ସହ ନବୀନଙ୍କ ପେଜକୁ ଲାଇକ କରୁଥିବା ୟୁଜରଙ୍କ ତାଲିକା ମେଳ ଖାଉଛି ।
ପୂର୍ବରୁ ମୁଖ୍ୟମନ୍ତ୍ରୀଙ୍କ ଅଫିସ ଫେସବୁକକୁ ଆସି ସାରିଥିବା ବେଳେ ଏବେ ଆସିଛନ୍ତି ନବୀନ । ହେଲେ ଏହା ସହ କିନ୍ତୁ ଯୋଡି ହୋଇଛି ବିବାଦ । ତେବେ ଲୋକପ୍ରିୟତାକୁ ଦେଖିଲେ ଏତେ ସଂଖ୍ୟାରେ ଲାଇକ ପାଇବା ନବୀନଙ୍କ ପାଇଁ ଅସମ୍ଭବ ବ୍ୟାପାର ହୋଇନଥିବା ବେଳେ ବିରୋଧୀଙ୍କ ଅଭିଯୋଗ କିନ୍ତୁ ପୂରା ପ୍ରସଙ୍ଗକୁ ଭିନ୍ନ ମୋଡ ଦେଇଛି ।